Pagbulig sa mga Imol kag Nalisdan
Ang Simbahan ni Jesucristo komitido sa pag-alagad sa mga nagakinahanglan, kag komitido man ini sa pagkooperar sa iban sa sinang buluhaton.
Mga utod, ang aton pinalangga nga Pangulong Russell M. Nelson magahambal sa aton karon sa sini nga sesyon. Ginpangabay niya ako nga mangin una nga humalambal.
Ang akon topiko subong parte sa mga ginahatag kag ginahimo sang Ang Simbahan ni Jesucristo sang mga Santos sa Ulihing mga Adlaw kag sang iya mga myembro sa mga imol kag nalisdan. Mahambal man ako parte sa anggid nga mga paghatag sang iban nga maayo nga mga tawo. Ang paghatag sa mga nagakinahanglan prinsipyo sang tanan nga relihiyon nga nagapati kay Abraham kag sa iban man.
Pila ka bulan ang nagligad, Ang Simbahan ni Jesucristo sang mga Santos sa Ulihing mga Adlaw nagreport sa una nga tion sang nalab-otan sang aton tawhanon nga bulig sa bilog nga kalibutan.1 Ang aton nagasto sang 2021 para sa mga nagakinahanglan sa 188 ka mga pungsod sa bilog nga kalibutan may $906 milyones—halos isa ka bilyon dolyares. Dugang pa, ang aton mga miyembro nagboluntaryo sing 6 ka milyon ka oras sang pagpangabudlay sa amo man nga kawsa.
Inang mga numero siyempre, indi kumpleto nga report sang aton paghatag kag pagbulig. Wala ang mga ini nagalakip sang personal nga mga pag-alagad nga ginahatag sang aton mga miyembro sa pagminister sa iban sa ila mga calling kag sa boluntaryo nga pagserbisyo sang miyembro-sa-miyembro. Kag ang aton 2021 nga report wala nagasambit sang ginahimo sang aton indibidwal nga mga miyembro paagi sa madamo nga pilantropo nga mga organisasyon nga indi pormal nga konektado sa aton Simbahan. Magasugod ako sa mga ini.
Sang 1831, duha ka tuig pagkatapos naorganisa ang ginpanumbalik nga Simbahan, ang Ginuo naghatag sining rebelasyon agud giyahan ang iya mga miyembro kag, nagapati ako, ang tanan sang Iya kabataan, sa bilog nga kalibutan:
“Kay tan-awa, indi nagakabagay nga magsugo ako sa tanan nga butang; kay sia nga ginapilit sa tanan nga butang isa ka matamad kag indi maalam nga alagad. ….
“Sa pagkamatuod ginasiling ko, dapat mangin mapisan ang mga tawo sa pagpakigbahin sa maayo nga kawsa, kag maghimo sing madamo nga butang paagi sa ila kaugalingon nga pagbuot, kag magpahanabo sing madamo nga pagkamatarong;
“Kay ang gahum yara sa ila sa diin may ikasarang sila nga mangin hilway sa pagpili. Kag kon nagahimo ang mga tawo sang maayo, indi nila madula ang ila padya.”2
Sa kapin 38 anyos bilang Apostoles kag sa masobra 30 anyos sa pag-obra bilang propesyonal, nakita ko ang madamo nga maalwan nga mga panikasog sang mga organisasyon kag mga mga tawo sa sahi nga ginalaragway sining rebelasyon bilang “maayo nga kawsa” kag “sa [pag]pahanabo sing madamo nga pagkamatarong.” May indi maisip nga mga halimbawa sang amo sina nga mga pag-alagad sa bilog nga kalibutan, nga ara sa gwa sang aton mga dulonan kag wala naton nahibal-an. Sa pagbinagbinag sini, ginapensar ko ang propeta nga haring Benjamin sa Libro ni Mormon, nga ang sermon nagalakip sining walay katapusan nga kamatuoran: “Kon yara kamo sa pag-alagad sang inyo mga isigkatinuga yara lamang kamo sa pag-alagad sang inyo Dios.”3
Madamo nga pag-alagad para sa tawhanon nga bulig kag ikaayo sang aton mga isigkatawo ang ginatudlo kag ginahikot sang Ang Simbahan ni Jesucristo sang mga Santos sa Ulihing mga Adlaw kag naton bilang iya sini mga miyembro. Halimbawa, nagapuasa kita kada una [nga Domingo] sang tagsa ka bulan kag nagaamot sa pinakanubo, sang katumbas sang wala nakaon nga kalan-on agud buligan ang mga nagakinahanglan sa aton mga kongregasyon. Ang Simbahan nagahatag man sang dalagku nga mga amot para sa tawhanon kag iban pa nga mga serbisyo sa bilog nga kalibutan.
Sa pihak sang tanan nga direkta nga ginahimo sang aton Simbahan, kalabanan sang serbisyo sa tawhanon nga bulig sa mga anak sang Dios sa bilog nga kalibutan ginapatuman sang mga tawo kag mga organisasyon nga wala sing pormal nga kaangtanan sa aton Simbahan. Pareho sang ginsiling sang isa ang aton mga Apostoles: “Ang Dios nagagamit sang masobra isa ka tawo para sa katumanan sang iya daku kag dalayawon nga buluhaton. … Tama ini kadako, tama kabudlay para sa isa lang ka tawo.4 Bilang mga miyembro sang ginpanumbalik nga Simbahan, kinahanglan naton nga mas talupangdon kag mas apresyahon ang serbisyo sang iban.
Ang Simbahan ni Jesucristo sang mga Santos sa Ulihing mga Adlaw komitido sa pag-alagad sa mga nagakinahanglan, kag komitido sa pagkooperar sa iban sa sinang buluhaton. Naghatag kita sang sini lang sing daku nga donasyon sa United Nations World Food Programme. Sa madamo nga dekada sang aton tawhahon nga buluhaton, duka ka mga organisasyon ang nagapangibabaw bilang mayor nga kabulig: ang mga proyekto upod sa mga ahensya sang Red Cross kag Red Crescent sa dinosena ka pungsod naghatag sa mga anak sang Dios sang kinahanglanon gid nga mga bulig sa tion sang mga kalamidad kag inaway. Sa amo man, may malawig kita nga rekord sang pagbuligay sa Catholic Relief Services. Ining mga organisasyon nagtudlo sa aton sing madamo parte sa primera-klase nga pagbulig.
May mabungahon man kita nga pagbuligay upod sa iban nga mga organisasyon, lakip na ang Muslim Aid, Water for People, kag IsraAID, sa pagsambit sang pila lang. Samtang ang tagsa ka organisasyon para sa tawhanon nga bulig may iya kaugalingon nga ginatutokan, may palareho kita nga katuyoan sa pagpaumpaw sang pag-antos sang mga anak sang Dios. Ini tanan kabahin sang buluhaton sang Dios para sa Iya mga anak.
Ang moderno nga rebelasyon nagatudlo nga ang aton Manluluwas, si Jesucristo “ang matuod nga kasanag nga nagapasanag sa tagsa ka tawo nga nagakari sa kalibutan.”5 Paagi sini, ang tanan nga anak sang Dios ginapasanagan sa pag-alagad sa Iya kag sa tagsa-tagsa sa pinakamaayo nga ila nahibal-an kag masarangan.
Ang Libro ni Mormon nagatudlo nga “ang tagsa ka butang nga nagapangagda kag nagapangganyat sa paghimo sang maayo, kag sa pagpalangga sa Dios, kag sa pag-alagad sa iya, may pagtuytoy sang Dios.”6
Sa pagpadayon:
“Kay yari karon, ang Espiritu ni Cristo ginahatag sa tagsa ka tawo, agud iya makilal-an ang maayo sa malain; gani, ginapakita ko sa inyo ang paagi sa paghukom; kay ang tagsa ka butang nga nagapangagda sa paghimo sang maayo, kag sa paglugpay sa pagpati kay Cristo, ginapadala paagi sa gahum kag hiyas ni Cristo. …
“Kag karon, mga kauturan ko, … inyo nahibal-an ang kapawa nga sa amo nga paagi kamo makahukom, nga ang amo nga kapawa kapawa ni Cristo.”7
Ari ang pila ka halimbawa sang mga anak sang Dios nga nagabulig sa iban nga mga anak sang Dios sa ila panguna nga mga panginahanglan sa pagkaon, pagbulong, kag pagtudlo:
Napulo ka tuig ang nagligad, ang mga Kandhari, mag-asawa nga Sikh sa United Arab Emirates, personal nga naglansar sang talalupangdon nga tikang sa pagpakaon sang mga gutom. Sa Guru Nanak Darbar nga Sikh nga templo, nagaserbe sila karon sang masobra 30,000 ka kalan-on nga puro utan kada talipuspusan sang semana sa bisan sin-o nga magsulod, bisan ano man ang relihiyon ukon rasa. Paathag ni Dr. Kandhari, “Nagapati kami nga tanan kita isa lang, mga anak kita tanan sang isa ka Dios, kag ari kita diri agud mag-alagad sa katawhan.”8
Ang paghatag sang medikal kag dental nga pagtatap sa mga nagakinahanglan isa pa gid ka halimbawa. Sa Chicago, nakilala ko ang isa ka Sirianhon-Amerikano nga doktor para sa malubha nga mga balatian (critical care doctor) nga si Dr. Zaher Sahloul. Isa sia sang mga tagtukod sang MedGlobal, nga nagaorganisa sang mga propesyonal sa patag sang medisina nga magboluntaryo sang ila tiempo, abilidad, ihibalo, kag liderato agud buligan ang iban sa mga krisis, pareho sang sa giyera sa Syria, sa diin sa Dr. Sahloul nagrisgo sang iya kabuhi sa pagbulong sang mga sibilyan. Ang MedGlobal kag kaanggid nga mga organisasyon (lakip na ang madamo nga mga propesyonal nga mga Santos sa Ulihing mga Adlaw) nagapakita nga ang Dios nagatandog sang matinuohon nga mga propesyonal nga dalhan ang mga imol sa bilog nga kalibutan sang kinahanglanon nga bulig.9
Madamo nga maalwan nga mga anak sang Dios ang nagapakigbahin sa mga pagtinguha sa pagtudlo, sa bilog man nga kalibutan. Isa ka maayo nga halimbawa, nga nahibal-an namon paagi sa aton mga buhat sang tawhanon nga bulig, amo ang ginahimo sang tawo nga kilala bilang Mr. Gabriel, nga nangin refugee sing makapila sa lainlain nga mga inaway. Nagsiling sia sang sini lang nga ginatos ka libo sang kabataan nga mga refugee sa East Africa ang nagakinahanglan sang bulig agud buhion ang ila paglaum kag mangin aktibo ang ila mga hunahuna. Nag-organisa sia sang iban pa gid nga mga manunudlo sa mga pumuluyo nga refugee sa ginatawag nila nga “mga eskwelahan nga kahoy,” sa diin ang kabataan ginatipon para sa mga leksyon sa handong sang kahoy. Wala sia naghulat sa iban nga mag-organisa ukon magdumala kundi personal nga nagpanguna sang mga pagtinguha nga naghatag sang mga oportunidad sa linibo ka kabataan sa elementarya nga makatuon sa tion sang mabudlay nga tinuig sang pagdalangdalang.
Siyempre, ining tatlo ka halimbawa wala nagakahulugan nga ang tanan nga nahambal ukon nahimo sang mga organisasyon ukon mga tawo nga nagasiling nga maayo ang mga ini ukon iya sang Dios matuod gid nga amo sina. Ining mga halimbawa nagapakita nga ang Dios nagainspirar sang madamo nga mga organisasyon kag mga tawo nga maghimo sang madamo nga kaayohan. Nagapakita man ini nga mas madamo dapat sa aton ang nagakilala sang kaayohan nga nahimo sang iban kag nagasakdag sini kon may tiempo kita ukon ikasarang sa paghimo sini.
Ari ang pila ka halimbawa sang pag-alagad nga ginasakdag sang Simbahan kag sang iban nga maayo nga mga tawo kag mga organisasyon paagi sa mga amot sang tiempo kag kwarta:
Masugod ako sa kahilwayan sa relihiyon. Sa pagsakdag sina, ginaserbe naton ang aton kaugalingon nga mga interes kag ang mga interes man sang iban nga relihiyon. Pareho sang gintudlo sang aton una nga Pangulo, si Joseph Smith: “Nagaangkon kami sang pribelihiyo sa pagsimba sa Dios nga Makagagahum suno sa mga dikta sang amon kaugalingon nga konsensya, kag nagatugot sa tanan nga mga tawo sang amo man nga pribelihiyo, nagatugot sa ila sa pagsimba kon paano, sa diin, ukon ano man sila.”10
Iban pa nga mga halimbawa sang tawhanon kag iban pa nga mga bulig sang ginpanumbalik nga Simbahan nga boluntaryo man nga ginasakdag sang aton mga miyembro amo ang aton bantog nga mga eskwelahan, mga kolehiyo, kag mga unibersidad kag ang indi pareho kabantog pero nabantala nga mga donasyon para sa kaumpawan sang mga nagaantos sang kagub-anan kag pagdalangdalang nga tuga sang mga kalamidad pareho sang mga bagyo kag linog.
Ang iban pa nga maluluy-on nga mga hilikuton nga ginasakdag sang aton mga miyembro paagi sa ila boluntaryo nga mga donasyon kag pagpanikasog tama ka damo para ilista, pero ang pagsambit sang pila lang sini nagapakita sang ila pagkasari-sari kag importansya: pagtapna sang rasismo kag iban pa nga diskriminasyon; pagtuon sa pagtapna kag pagbulong sang mga balatian; pagbulig sa mga may kasablagan; pagsuporta sa mga organisasyon sa musika; kag pagpaayo sang moral kag pisikal nga kapalibotan para sa tanan.
Ang tanan nga tawhanon nga bulig nga ginahimo sang Ang Simbahan ni Jesucristo sang mga Santos sa Ulihing mga Adlaw pagtinguha nga magsunod sang ehemplo sang matarong nga katawhan nga ginlaragway sa Libro ni Mormon: “Kag sa amo, sa ila mauswagon nga mga sirkumstansya, wala nila ginatabog ang bisan sin-o nga mga hublas, ukon inang mga ginagutom, ukon inang mga ginauhaw, ukon inang mga nagamasakit, … kag … nangin maalwan sila sa tanan, alangay nga tigulang kag lamharon, alangay nga ulipon kag hilway, alangay nga lalaki kag babayi, bisan sa gwa sang simbahan ukon sa sulod sang simbahan.”11
Nagapamatuod ako kay Jesucristo, nga ang kasanag kag Espiritu nagagiya sa tanan nga mga anak sang Dios sa pagbulig sang mga imol kag nalisdan sa bilog nga kalibutan. Sa ngalan ni Jesucristo, amen.