Pagpalapit sa Manluluwas
Sa pagtinguha nga kilalahon kag palanggaon ang Manluluwas, ginaseparar naton ang aton mga kaugalingon sa kalibutan paagi sa mga kasugtanan upod sa Dios, nga tuhay, di-kinaandan, kag pinasahi, nga wala ginapain ang aton mga kaugalingon sa iban nga lain ang ginapatihan.
Pinalangga kong mga kauturan, sini nga gab-i magahambal ako sa mapainubuson kag debotado nga mga sumulunod ni Jesucristo. Tungod makita ko ang kaayo sang inyo mga kabuhi kag inyo pagtuo sa aton Manluluwas diri sa sining pungsod kag sa mga nasyon sa bilog nga kalibutan, mas palangga ko pa gid kamo.
Sa hingapusan sang Iya pag-alagad, ang mga disipulo ni Jesus nagpangabay sa Iya nga sugiran sila sang “tanda sang [Iya Ika-duha nga Pagkari], kag sang katapusan sang panuigon.”1
Ginsugiran sila ni Jesus sang mga kondisyon nga matabo antes sang Iya pagbalik kag nagtapos paagi sa pagpahayag “Kon makita ninyo tanan ining butang, mahibaloan [ninyo] nga [ang tion] malapit na.”2
Sang ulihi nga pangkabilogan nga komperensya, namati gid ako sing maayo sa mga pulong ni Pangulong Henry B. Eyring: “Ang tagsa sa aton,” siling niya, “kon diin man kita, nakahibalo nga nagakabuhi kita sa labi pa gid kadelikado nga panahon. … Ang bisan sin-o nga may mata para makita ang mga patimaan sang panahon kag may dulunggan para mabatian ang mga pulong sang mga propeta nakahibalo nga matuod ini.”3
Ang Manluluwas nagdayaw sa Iya maisog nga mga disipulo: “Bulahan ang inyo mga mata, kay makakita sila: kag ang inyo mga idulungug, kay nagapamati sila.”4 Kabay nga ining pagpakamaayo mangin aton samtang nagapamati kita sing maayo sa mga pulong sang Ginuo paagi sa Iya mga propeta kag sa iban pa sa sining komperensya.
Trigo kag mga Hilamon
Ang Ginuo nagpaathag nga sa sining katapusan nga tion antes sang Iya pagbalik, ang “trigo,” sila nga Iya ginalaragway bilang “mga anak sang ginharian,”5 magatubo sing dungan sa “hilamon,” ukon inang mga wala nagapalangga sa Dios kag wala nagatuman sang Iya mga kasugoan. Sila “magaupod tubo,”6 sing dungan.
Amo ini ang aton mangin kalibutan tubtob nga magbalik ang aton Manluluwas, nga madamo sing maayo kag madamo sing malain sa tagsa ka bahin.7
Mahimo nga sa panalagsa indi ninyo mabatyagan nga kaangay sa isa ka mabakod, hamtong nga nahot sang trigo. Magmangin pasensyoso sa imo kaugalingon! Ang Ginuo nagsiling nga ang trigo magalakip sang linghod pa nga mga dahon nga nagasugod na sa pagtubo.8 Kita tanan Iya mga Santos sa Ulihing mga Adlaw, kag bisan indi pa man kita lubos nga luyag naton mangin, seryoso kita sa aton handum nga mangin Iya matuod nga mga disipulo.
Pabakuron ang Aton Pagtuo kay Jesucristo
Narealisar naton nga samtang ang kalainan nagadugang sa kalibutan, ang aton espirituhanon nga kaluwasan, kag ang espirituhanon nga kaluwasan sinang aton ginapalangga, magakinahanglan nga mas lubos naton nga tatapon, palig-unon, kag pabakuron ang mga gamot sang aton pagtuo kay Jesucristo. Ang Apostoles nga si Pablo naglaygay sa aton nga manggamot,9 napasad, kag malig-on10 sa aton pagpalangga sa Manluluwas kag sa aton determinasyon nga sundon Sia. Karon nga adlaw kag ang maabot nga mga inadlaw magakinahanglan sing bug-os nga panikasog, nga nagabantay batok sa mga pagtublag kag pagpatumbaya.11
Bisan pa sa nagadugang nga kalibutanon nga mga impluwensya sa palibot naton, indi kita dapat mahadlok. Indi gid pagbayaan sang Ginuo ang Iya katawhan sang kasugtanan. May yara sang ginadugang nga gahum sang espirituhanon nga mga dulot kag diosnon nga direksion para sa mga matarong.12 Apang, ining dugang nga bugay sang espirituhanon nga gahum wala ginahatag sa aton tungod lamang nga bahin kita sining henerasyon. Nagakatabo ini kon pabakuron naton ang aton pagtuo sa Ginuong Jesucristo kag tumanon ang Iya mga kasugoan, samtang makilala naton Sia kag ginapalangga naton Sia. “Ini amo ang kabuhi nga walay katapusan,” pangamuyo ni Jesus, “nga pagkilalahon ka nila nga ikaw lamang ang matuod nga Dios, kag ang imo ginpadala nga si Jesucristo.”13
Pareho sang nahibaloan naton, ang pag-angkon sang pagtuo kay Jesucristo kag ang pagkamatuod nga disipulo indi lamang kaisa nga pagdesisyon—indi lamang kaisa nga hitabo. Isa ini ka sagrado, nagapadayon nga proseso nga nagatubo kag nagasangkad sa mga panahon sang aton kabuhi, nga nagapadayon tubtob nga magluhod kita sa Iya tiilan.
Samtang ang trigo nagatubo sa tunga sang mga hilamon sa kalibutan, paano naton seryosohon kag pabakuron ang aton pangako sa Manluluwas sa maabot nga mga inadlaw?
Ari ang tatlo ka hunahuna:
Isubsob ang Aton mga Kaugalingon sa Kabuhi ni Jesus
Una, mahimo kita magtutok sing mas lubos sa kabuhi ni Jesus, Iya mga pinanudlo, Iya pagkahalangdon, Iya gahum, kag Iya nagabayad-sala nga sakripisyo. Ang Ginuo naglaygay, “Magtulok sa akon sa tagsa ka panghunahuna.”14 Si Apostoles Juan nagapahanumdum sa aton, “Ginpalangga naton sia, bangud una Sia nga nagpalangga sa aton.”15 Kon maeksperiyensyahan pa gid naton ang Iya pagpalangga, mas ginapalangga pa gid naton Sia kag, natural lamang, nga mas ginasunod ang Iya ehemplo sang pagpalangga kag pagtatap sinang mga yara sa aton palibot. Sa tagsa ka matarong nga buhat nga aton ginahimo, makita naton Sia sing mas maathag.16 Ginasimba naton Sia, kag nagatinguha kita sa aton ginagmay nga paagi nga sundon Sia.17
Maghimo sang mga kasugtanan upod sa Ginuo
Dason, samtang makilala pa gid naton kag mas ginapalangga ang Manluluwas, mas luyag pa gid naton nga magpangako sa Iya sang aton katutum kag pagsalig. Nagahimo kita sang mga kasugtanan upod sa Iya. Nagasugod kita sa aton mga promisa sa bunyag, kag ginakompirma naton ining mga promisa kag iban pa sa aton paghinulsol adlaw-adlaw, pagpangayo sang kapatawaran, kag lubos nga pagpaabot sang pagbaton sang sakramento kada semana. Nagapangako kita nga “dalayon nga magdumdum sa iya kag magtuman sang iya mga kasugoan.”18
Kon handa na kita, ginabaton naton ang mga ordinansa kag mga kasugtanan sang templo. Sa pagbatyag sang impluwensya sang walay katapusan sa aton sagrado, malinong nga mga tinion sa balay sang Ginuo, malipayon kita nga nagahimo sang mga kasugtanan upod sa Dios kag determinado nga tipigan ang mga ini.
Ang paghimo kag pagtipig sang mga kasugtanan nagatugot sang pagpalangga sang Manluluwas nga magtudok sa aton tagipusuon. Sa sini nga bulan sang Liahona, si Pangulong Russell M. Nelson nagsiling: “Ang [aton] [mga] kasugtanan magadala sa aton nga mangin suod pa gid sa Iya. … Indi pagtalikdan sang Dios ang Iya kaangtanan sa sinang nagpalig-on sang amo nga kaangtanan sa Iya.”19 Kag sang si Panguong Nelson manami nga nagsiling kaina sang aga, “Sa pagdedikar sang tagsa ka bag-o nga templo, dugang nga diosnon nga gahum ang nagaabot sa kalibutan para pabakuron kita kag kontrahon ang mas nagagrabe nga pagtinguha sang kaaway.”20
Makita bala naton kon ngaa ang Ginuo magsugo sa Iya propeta nga ipapalapit ang balaan nga mga templo sa aton kag tugotan kita nga magkadto sa Iya balay sing masunson?
Sa pagsulod naton sa templo, ginahilway kita sing makadali gikan sa kalibutanon nga mga impluwensya nga makapahalawhaw sa aton samtang ginahibalo naton ang aton katuyoan sa kabuhi kag ang wala katapusan nga mga dulot nga ginatanyag sa aton paagi sa aton Manluluwas nga si Jesucristo.
Bantayan ang Dulot sang Balaan nga Espiritu
Sa katapusan, ang akon ikatatlo nga hunahuna: sa sining sagrado nga pagtinguha, aton ginapakamahal, ginaamligan, ginapangapinan, kag ginabantayan ang dulot sang Balaan nga Espiritu. Si Pangulong M. Russell Ballard kaina kag si Elder Kevin W. Pearson wala lang gid madugay pareho nga naghambal sang manalagnaon nga pagpangandam nga akon suliton liwat: “Indi posible nga makalampuwas kita sing espirituhanon kon wala ang nagagiya, nagatudlo, nagapasulhay kag dalayon nga impluwensya sang Balaan nga Espiritu.”21 Isa ini ka dulot nga indi mabayran. Ginahimo naton ang tanan-tanan agud amligan ang aton adlaw-adlaw nga mga eksperiyensya gani ang impluwensya sang Balaan nga Espiritu nagapabilin sa aton. Kita ang kasanag sa kalibutan, kag kon kinahanglanon, handa kita magpili nga mangin tuhay sa iban. Si Pangulong Dallin H. Oaks sining ulihi lang namangkot sa mga batan-on nga hamtong: “Mangisog bala [kamo] nga ‘mangin tuhay?’ … [Ilabi na] nga importante … amo ang mga pagpili nga inyo ginahimo sa inyo personal nga kabuhi.… Nagasulong bala kamo batok sa oposisyon sang kalibutan?”22
Pilia nga Mangin Lain sangsa Kalibutan
Sang nagligad lang nga post sa social media, ginpangabay ko ang kaupod ko nga mga disipulo nga magpaambit sang mga pagpili nga ila ginhimo nga nagkinahanglan sa ila nga mangin tuhay sa kalibutan. Nakabaton ako sing ginatos nga sabat.23 Ari ang pila lamang sini:
Amanda: Isa ako ka nars nga nagaobra sa lokal nga presohan. Ginatinguhaan ko nga atipanon ang mga preso pareho sang pag-atipan ni Cristo.
Rachel: Isa ako ka manug-amba sa opera, kag ginapaabot nga masuksuk sang bisan ano lang nga kostyum nga ihatag sa akon, desente man ini ukon indi. [Tungod endowed ako,] ginhambalan ko [ang mga producer] nga ang kostyum kinahanglan mangin [desente]. Wala sila nalipay … pero napilitan sila nga magpangliwat. Indi ko gid pag-ibaylo ang katawhay nga maagom halin sa pagtindog bilang saksi ni Cristo sa tanan nga tion.
Chriss: Isa ako ka alkoholiko (nga nagapaayo), takos para sa templo, miyembro sang Simbahan. Wala ako nagahipos parte sa akon mga eksperiyensya sa adiksyon kag pag-angkon sang testimonya parte sa Pagbayad-sala [ni Jesucristo].
Lauren: Nagasulat ako sadto sing isa ka drama upod sang akon mga klasmeyt sa high school. Gusto nila nga ako nga mahiposon, mahuluyaon nga tawo gulpi lang nga magbastos kag mamuyayaw. Ginapilit gid nila ako, pero nagpangindi ako kag wala gid ako nagpadala sa ila.
Adam: Madamo ang wala nagapati sa akon kon magsiling ako nga ginatuman ko ang layi sang kaputli kag nagapili nga maglikaw sa pornograpiya. Indi nila maintiendihan ang bentaha sang kalipay kag kalinong sa hunahuna nga ginahatag sini sa akon.
Ella: Ang akon amay isa ka miyembro sang katilingban sang LGBTQ. Ginatinguhaan ko gid pirme nga magkonsiderar sa balatyagon sang iban nga tawo samtang nagatindog ako bilang saksi ni Cristo kag ginapangapinan ang akon ginapatihan.
Andrade: Nagdesisyon ako nga magpadayon sa pagsimba sang nagdesisyon ang akon pamilya nga indi na sila magsimba pa.
Kag sa katapusan, halin sa kay Sherry: Magatambong kami sadto sa isa ka hitabo sa mansyon sang gobernador. Nagsugod sila sa pagpanagtag sang alak agud mag-“toast.” Nag-insister ako nga tubig lang ang akon, bisan pa nagsiling ang katapo sini nga insulto ina. Nag-toast kami sa gobernador, kag ginbayaw ko sing mataas ang akon baso sang tubig! Wala nainsulto ang gobernador.
Huo, nagakabuhi kamo sa kalibutan, pero tuhay kaayo ang inyo mga talaksan gikan sa kalibutan agud mabuligan kamo nga malikawan ang mantsa sang kalibutan.”24
Si Anastasia, isa ka hubin nga iloy sa Ukraine, yara sadto sa ospital nga bag-o lang nagbata sang lapsag nga lalaki samtang ang mga pagbomba nagsugod sa Kyiv sining nagligad nga Pebrero. Isa ka nars ang nagbukas sang pwertahan sang kwarto sang ospital kag nagsiling sing dali-dali, “Dal-a ang imo lapsag, putsa sia sa habol, kag magkadto sa tilipunan—subong!”
Sang ulihi, si Anastasia nagkomento:
“Wala ko gid nahunahuna nga ang akon una nga mga adlaw bilang iloy mangin tuman ka budlay, … pero nagatutok ako sa … mga bugay kag mga milagro nga akon nakita. …
“Sa karon, … daw imposible nga patawaron pa inang mga nagtuga sing tuman nga kagubaan kag kahalitan … , apang bilang disipulo ni Cristo, nagatuo ako nga mahimo ko ang [magpatawad]. …
“Wala ako kahibalo sang matabo sa ulihi … pero kahibalo ako nga ang pagtipig sang mga kasugtanan magatugot sa Espiritu nga mangin kaupod naton sing dalayon, … nga nagatugot sa aton nga makabatyag sing kalipay kag paglaum, … bisan sa mabudlay nga mga tinion.”25
Ang Promisa sang Kabuhi nga Walay Katapusan kag Selestial nga Himaya
Mga kauturan, ginbugayan ako nga bugana nga makabaton sang gugma sang aton pinalangga nga Manluluwas, nga si Jesucristo. Nakahibalo ako nga buhi Sia kag nagagiya sa Iya balaan nga buluhaton. Indi ko lubos mapahayag sa mga tinaga ang akon pagpalangga para sa Iya.
Kita tanan “mga anak sang kasugtanan” nga nagalab-ot sa bilog nga kalibutan sa mga nasyon kag mga kultura sang tagsa ka kontinente, nga yara sa minilyon, samtang ginahulat naton ang mahimayaon nga pagbalik sang aton Ginuo kag Manluluwas. Nga nagasilak bilang kasanag sa sinang yara sa palibot naton, ginadihon naton ang aton mga kaluyag, mga panghunahuna, mga pagpili, kag mga buhat. Samtang nagatinguha kita sa bug-os naton nga tagipusuon nga kilalahon kag palanggaon ang Manluluwas, ginaseparar naton ang aton mga kaugalingon sa kalibutan paagi sa mga kasugtanan upod sa Dios, nga tuhay, di-kinaandan, kag pinasahi, tungod ginapasidunggan naton Sia kag Iya mga pinanudlo nga wala ginapain ang aton mga kaugalingon sa iban nga lain ang ginapatihan.
Manami nga pagpanglakaton ang mangin trigo sa mga hilamon, kon kaisa puno sing kasakit pero masami nga ginapakalma sang pagbakod kag pagpabilin sa pagpalig-on sang aton pagtuo. Kon tugotan ninyo ang inyo pagpalangga sa Manluluwas kag Iya pagpalangga sa inyo nga magtudok sa inyo tagipusuon, ginapromisa ko sa inyo ang dugang nga pagsalig, paghidaet kag kalipay sa pag-atubang sang mga hangkat sa inyo kabuhi. Kag ang Manluluwas nagapromisa sa aton: “Tiponon ko ang akon katawhan, suno sa paanggid sang trigo kag mga hilamon, agud mangin luwas ang trigo sa mga balay-talagoan agud maangkon ang kabuhi nga walay katapusan, kag makoronahan sang selestiyal nga himaya.”26 Sa ngalan ni Jesucristo, amen.