Himoa Nga Ang Pagbuhat Sang Maayo Mangin Aton Normal

Ni Elder Rafael E. Pino

Sang Sitenta

Kon malig-on kag mabakod kita sa paghimo sang maayo, ang aton mga kustombre magabulig sa aton nga magpabilin sa dalan sang kasugtanan.

Nagapasalamat gid ako para sa akon mga asayment sa Simbahan nga tungod sini nakapuyo ako sa lain-lain nga mga pungsod. Nasalapoan namon sa tagsa sining mga pungsod ang dako nga pagkalain-lain kag ang pinasahi nga mga tawo nga may lain-lain nga mga kustombre kag mga tradisyon.

Tanan kita may mga kustombre kag mga tradisyon nga personal, halin sa aton pamilya, ukon sa komunidad nga ginapuy-an naton, kag luyag naton nga huptan inang mga nagahisanto sa mga prinsipyo sang ebanghelyo. Ang pagpauswag sang mga kustombre kag mga tradisyon importante sa aton mga panikasog nga magpadayon sa dalan sang kasugtanan, kag inang mga sablag, dapat naton nga isikway.

Ang kustombre amo ang buhat ukon pirme kag kinaandan na nga panan-aw sang tawo, kultura, ukon tradisyon. Sa masami, ang mga butang nga aton ginahunahuna kag ginahimo sing kinaandan ginakabig na naton nga normal.

Tugoti ninyo ako nga ilaragway ini: Si Patricia, ang akon pinalangga nga asawa, nanamian mag-inom sang tubig sang butong kag dayon magkaon sang unod sini. Sa amon una nga pagbisita sa Puebla, Mexico, nagkadto kami sa isa ka lugar kon diin nakabakal kami sang butong. Pagkatapos inom sang tubig sini, nagpangabay ang akon asawa sa ila nga pihakon ang butong kag dal-on sa iya ang unod para kaunon. Pag-abot sini, mapulapula ini. Ginwisikan nila ini sang katumbal! Matam-is nga butong nga may katumbal! Daw katingalahan gid ina para sa amon. Pero sang ulihi narealisar namon nga kami sang akon asawa ang mga manol, nga wala nagkaon sang butong nga may katumbal. Apang, sa Mexico, indi ini tumalagsahon; normal gid ini kaayo.

Sa isa pa ka okasyon nagakaon kami sa Brazil upod ang pila ka mga abyan, kag ginserbehan nila kami sang abokado. Sang nagahana na kami nga wisikan ini sang asin, ang amon mga abyan nagsiling sa amon, “Ginaano nyo ina? Nabutangan na namon sang kalamay ang abokado!” Abokado nga may kalamay! Daw katingalahan gid ina para sa amon. Pero dayon narealisar namon nga kami sang akon asawa ang mga manol, nga wala nagkaon sang abokado nga may kalamay. Sa Brazil, ang abokado nga ginabudburan sang kalamay normal.

Ang normal sa pila ka tawo mahimo nga katingalahan para sa iban, depende sa ila mga kustombre kag mga tradisyon .

Ano nga mga kustombre kag mga tradisyon ang normal sa aton kabuhi?

Si Pangulong Russell M. Nelson nagsiling: “Sa karon nga panahon pirme naton mabatian ang parte sa ‘new normal.’ Kon luyag gid ninyo ipangabuhi ang new normal, ginaagda ko kamo nga lisuon pa gid ninyo ang inyo tagipusuon, kaisipan, kag kalag sa aton Amay nga Langitnon kag Iya Anak nga si Jesucristo. Himoa ina nga inyo new normal” (“A New Normal,” Liahona, Nob. 2020, 118).

Ini nga pangagda para sa tanan. Indi importante kon bala imol kita ukon manggaranon, edukado ukon wala sing tinun-an, tigulang ukon hubin, masakiton ukon maayo ang lawas. Ginaagda niya kita nga himuon nga normal nga mga butang sa aton kabuhi inang mga nagabulig sa aton nga magpadayon sa dalan sang kasugtanan.

Wala sing pungsod nga may kabug-osan sang kon ano ang maayo ukon dalayawon. Gani, sa gintudlo ni Pablo kag sang Propeta nga si Joseph Smith:

“Kon may bisan ano nga butang nga matarong, matahum, ukon dungganon ukon dalayawon, ginapangita namon ining mga butang” (Mga Artikulo sang Pagtuo 1:13).

“Kon may takus dayawon, [hunahunaa] ining mga butang” (Mga Taga-Filipos 4:8).

Talupangda nga isa ini ka laygay, indi lamang isa ka komentaryo.

Luyag ko nga kita tanan magbinagbinag sing makadali sang aton mga kustombre kag ang paagi nga ginaimpluwensya sini ang aton mga pamilya.

Lakip sa dalayawon nga mga pamatasan nga dapat mangin normal para sa mga miyembro sang Simbahan amo ining apat:

1. Personal kag pang-pamilya nga pagtuon sang balaan nga mga kasulatan. Agud mahaylo kay Ginuong Jesucristo, ang tagsa ka tawo responsable sa pagtuon sang ebanghelyo. Ang mga ginikanan responsable sa pagtudlo sang ebanghelyo sa ila kabataan (tan-awa sa Doktrina kag mga Kasugtanan 68:25; 93:40).

2. Personal kag pang-pamilya nga pagpangamuyo. Ang Manluluwas nagasugo sa aton nga magpangamuyo pirme (tan-awa sa Doktrina kag mga Kasugtanan 19:38). Ang pangamuyo nagatugot sa aton nga makig-angot sing personal sa aton Amay nga Langitnon sa ngalan sang Iya Anak nga si Jesucristo.

3. Pagtambong sa sakramento nga miting kada semana (tan-awa sa 3 Nefi 18:1–12; Moroni 6:5–6). Ginahimo naton ini agud dumdumon si Jesucristo samtang nagaambit kita sang sakramento. Sa sini nga ordinansa ang mga miyembro sang Simbahan nagabag-o liwat sang ila kasugtanan nga dalhon sa ila mga kaugalingon ang ngalan sang Manluluwas, sa pagdumdum pirme sa Iya, kag sang pagtuman sang Iya mga kasugoan (tan-awa sa Doktrina kag mga Kasugtanan 20:77, 79).

4. Ang pagpartisipar pirme sa buluhaton sa templo kag family history. Ining buluhaton ang paagi sa pag-isa kag paghugpong sang mga pamilya tubtob sa walay katapusan (tan-awa sa Doktrina kag mga Kasugtanan 128:15).

Ano ang aton nabatyagan kon mabatian naton ining apat ka butang? Bahin bala ini sila sang aton normal nga kabuhi?

Madamo sing iban pa nga tradisyon nga mahimo nga kabahin na sang pagkanormal nga aton ginbaton, gani nagatugot nga ang Dios mangibabaw sa aton kabuhi.

Paano naton mapat-od kon ano ang mangin normal nga mga butang sa aton kabuhi kag sa aton pamilya? Sa balaan nga mga kasulatan masalapoan naton ang dungganon nga ehemplo; sa Mosias 5:15 ginasiling sini, “Luyag ko nga kamo mangin malig-on kag di-malingkang, nga dalayon sa bugana nga maayong buluhaton.”

Nanamian ako sining mga pulong tungod nakahibalo kita nga ang mga butang nga nangin normal sa aton kabuhi amo itong aton ginasulit-sulit himo. Kon malig-on kag mabakod kita sa paghimo sang maayo, ang aton mga kustombre magahisanto sa mga prinsipyo sang ebanghelyo kag magabulig ang mga ini sa aton nga magpabilin sa dalan sang kasugtanan.

Si Pangulong Nelson naglaygay man: “Batuna ang inyo new normal paagi sa paghinulsol adlaw-adlaw. Tinguhai nga mangin mas putli sa kaisipan, pulong, kag buhat. Mag-alagad sa iban. Maghupot sang walay katapusan nga panan-aw. Tumana ang inyo mga calling. Kag kon ano man ang inyo mga hangkat, mahal kong mga kauturan, magkabuhi kada adlaw sa bagay nga mangin mas handa kamo sa pag-atubang sa inyo Tagtuga” (“A New Normal,” 118).

Karon indi na katingalahan para sa akon asawa nga si Patricia ukon para sa akon nga magkaon sang butong nga may katumbal kag abokado nga may kalamay—sa tuod lang, namian kami sini. Apang, ang pang-kahitaasan isa ka butang nga mas labaw pa sangsa pagpanabor; isa ini ka topiko nga naangot sa walay katapusan.

Ginapangamuyo ko nga ang aton pagkanormal magtugot sa aton nga makaeksperiyensya sinang kahimtangan sang “di-matapos nga kalipayan” (Mosias 2:41) nga ginapromisa sa mga nagatuman sang mga kasugoan sang Dios kag nga, samtang ginahimo ini, mahimo kita maghambal, “Kag natabo ini nga nagpuyo kami suno sa paagi sang kalipayan” (2 Nefi 5:27).

Mga kauturan, nagapamatuod ako parte sa 15 ka lalaki nga ginasakdag naton bilang mga propeta, mga manugpanan-aw, kag mga manugpahayag sang rebelasyon, lakip na ang aton pinalangga nga propeta, si Pangulong Russell M. Nelson. Nagapamatuod ako nga Ang Simbahan ni Jesucristo sang mga Santos sa Ulihing mga Adlaw matuod. Nagapamatuod ako ilabi na kay Jesucristo, ang aton Manluluwas kag Manunubos, sa ngalan ni Jesucristo, amen.