Pagtukod sang Kabuhi nga Makabato sa Kaaway
Ginapangamuyo ko nga padayon naton nga tukuron ang aton mga kabuhi sunod sa mga plano kag teknikal nga takos sang diosnon nga disenyo nga ginhimo sang aton Amay nga Langitnon.
Sa mga tinuig halin sa sining matahum nga pulpito sang Conference Center, nabaton naton ang manami nga mga laygay, inspirasyon, instruksyon, kag rebelasyon. Kon kaisa, ang mga manughambal nagagamit sang paanggid base sa ila ihibalo kag eksperiyensya para ipakita sing maathag kag mabaskog ang isa ka prinsipyo sang ebanghelyo ni Jesucristo.
Sa sini nga paagi, halimbawa, natun-an naton ang parte sa mga eroplano kag paglupad nga ang gamay nga pagliw-as mahimo nga magdala sa aton sa lugar nga malayo kaayo sa orihinal naton nga kaladtuan.1 Sa sini man nga paagi nakatuon kita paagi sa pagpaanggid, sang trabaho sang aton pisikal nga kasingkasing sa mabaskog nga pagbag-o sang tagipusuon nga ginapangayo agud himuon ang imbitasyon sang Ginuo nga magsunod sa Iya.2
Sa sini nga tion, gusto ko nga mapainubuson nga magdugang sang paanggid nga inspirado sa patag sang akon propesyunal nga trabaho. Ginatumod ko ang kalibutan sang civil engineering. Halin sa pagsugod sang akon pagtuon sa unibersidad, ginhandum ko ang adlaw nga makompleto ko ang rekisitos para mangin kalipikado sa pagsulod sa klase nga magatudlo sa akon sa pagdisenyo sang mga bilding kag iban pa nga istraktura nga sadto ginakabig “kontra-linog.”
Nag-abot gid man ang adlaw sang una ko nga klase sa sini nga topiko. Ang una nga tinaga sang propesor amo ini: Sigurado gusto na ninyo sugdan ining kurso kag magtuon sa pagdisenyo sang mga istraktura nga kontra-linog,” nga nagpatango sa amon. Dayon siling sang propesor, “Pasensya na kay indi pwede ina, kay indi ko kamo matudloan kon paano magdisenyo sang bilding nga supak, nga ‘kontra-’ ukon nagapamatok sa, isa ka linog. Daw kaimposible sina, “tungod matabo gid ang linog, sa gusto man naton ukon indi.”
Dayon iya ginsugpon, “Ang matudlo ko sa inyo amo ang kon paano magdisenyo sang mga istraktura nga makabato-sa-linog, mga istraktura nga makabato sa pwersa sang linog, agud nga ang istraktura padayon nga magatindog nga wala sing mayor nga kahalitan kag padayon nga magamit para sa katuyoan nga gindisenyo ini.”
Ang enhinyero nagakalkula sang mga kasangkaron, mga kalidad, kag mga kinaiya sang mga pundasyon, mga haligi, mga balayan, mga konkreto nga tabliya, kag iban pa nga elemento sang istraktura nga ginadisenyo. Ang mga resulta sini ginabasehan sang plano kag teknikal nga mga takos nga kinahanglan istrikto gid nga sundon sang nagapatindog para matapos ang plano kag matuman ang katuyuan sang pagdisenyo kag pagpatindog sini.
Bisan masobra 40 anyos na ang nagligad sugod sadtong una nga klase parte sa seismic-resistant engineering, maathag ko pa nga madumduman ang tion nga mas nagdalom, mas nangin kompleto ang akon pag-intiendi sang importansya nga ining konsepto mangin ara sa mga istraktura nga akon himuon sa palaabuton ko nga propesyon. Indi lang ina, kundi mas importante pa gid—nga mangin permanente ini nga ara sa pagpabakod sang akon mismo kabuhi kag sang mga posible maimpluwensyahan ko sing positibo.
Daw ano nga bugay sa aton nga makasalig kita sa ihibalo parte sa plano sang kaluwasan nga ginhimo sang aton Amay nga Langitnon, nga ara ang ginpanumbalik nga ebanghelyo ni Jesucristo, kag makasandig kita sa inspirado nga direksyon sang buhi nga mga propeta! Ini tanan sadto nagabug-os sang gindisenyo nga diosnon nga “mga plano” kag ang “teknikal nga mga takos” nga nagatudlo sa aton sing maathag kon paano magpatindog sang malipayon nga mga kabuhi—kabuhi nga makabato sa sala, makabato sa tentasyon, makabato sa mga pag-atake ni Satanas, nga desperado nga nagatinguha nga punggan ang aton wala katapusan nga kadangatan nga makaupod ang aton Amay nga Langitnon kag upod sa aton pinalangga nga mga pamilya.
Ang Manluluwas Mismo, sa pagsugod sang Iya pag-alagad, “ginpabay-an para sulayon sang panulay.”3 Pero nagmadinalag-on si Jesus sa sinang dako nga pagtilaw. Paano nakabulig sa Iya ang may panimuot nga kontra-Satanas ukon kontra-pagsulay? Ano ang nagbulig kay Jesus nga magmadinalag-on sining pinakamabudlay nga tinion sang Iya espirituhanon nga preparasyon, nga nagtugot sa Iya nga makabato sa mga tentasyon sang kaaway.
Ano ang pila ka mga butang nga nagbulig sa Manluluwas nga mangin preparado para sa sinang importante nga tion?
Una, nagpuasa Sia sing 40 ka adlaw kag 40 ka gab-i, puasa nga sigurado gin-updan sang sige-sige nga pangamuyo. Gani, bisan maluya Sia sa pisikal, ang Iya espiritu tama kabakod. Bisan pa, maayo lang, wala ginapangayo sa aton nga magpuasa sang amo sina kalawig—kundi 24 oras lang kag kis-a sa isa ka bulan—ang pagpuasa nagadala sa aton sang espirituhanon nga kusog kag nagahanda sa aton nga makabato sa mga pagtilaw sining kabuhi.
Ikaduha nga punto, parte sa mga tentasyon nga gin-agyan sang Manluluwas, makita naton nga pirme Niya ginasabat si Satanas sang balaan nga kasulatan nga Iya ginsaulo, nga ginasambit ini, kag ginagamit ini sa husto nga tion.
Sang gintentar Sia ni Satanas nga himuon ang mga bato nga tinapay para mabulong ang Iya kagutom tungod sang Iya malawig nga puasa, siling sang Ginuo sa iya, “Nasulat nga, Indi lamang sa tinapay mabuhi ang tawo, kundi sa tagsa ka pulong nga nagagwa sa baba sang Dios.”4 Dayon, sang ara ang Ginuo sa pinakaibabaw sang templo, gintinguhaan Sia nga sulayon sang yawa nga ipakita ang Iya gahum, nga ginsabat sang Ginuo nga may awtoridad, “Nasulat naman, ‘Dili mo pagsulayon ang Ginuo nga imo Dios.”5 Kag sa ikatatlo nga pagtinguha ni Satanas, nagsabat ang Ginuo, “Nasulat na, Magsimba ka sa Ginuo nga imo Dios, kag sa iya lamang mag-alagad ka.”6
Ang pagluntad sang linog nagabilin sang marka bisan sa mga istraktura nga husto ang pagkadisenyo kag pagpatindog—ang mga konsikwensya pwede nga may mga paglitik, nagkaladagdag nga muebles ukon kisame, pagkabuka sang mga bintana. Pero ining edispisyo nga maayo nga pagkadisenyo kag pagkapasad magatuman sang iya katuyuan sang pag-amlig sang mga nagaestar diri, kag paagi sa pagkay-o, mauli ini sa orihinal sini nga kondisyon.
Sa amo man, ang mga lapdos sang kaaway makatuga man sang “mga litik,” ukon gagmay nga halit sa aton mga kabuhi, wala sapayan sang aton pagpaninguha nga itukod ang aton mga kabuhi suno sa perpekto nga diosnon nga disenyo. Ining mga “litik” makita sa mga balatyagon sang kasubo ukon paghinulsol sa paghimo sang sala ukon indi paghimo sing perpekto sang tanan, ukon sa pamatyagan nga indi kita pareho kaayo suno sa gusto naton.
Pero ang importante gid amo nga tungod nagsunod kita sa diosnon nga gindisenyo nga mga plano kag takos, nga amo ang ebanghelyo ni Jesucristo, nagatindog kita sa gihapon. Ang istraktura sang aton mga kabuhi wala marusdak tungod sang pagpaninguha sang kaaway ukon sang mabudlay nga mga sitwasyon nga aton ginaatubang, kundi nga handa kita nga magpadayon.
Ang kalipay nga ginpromisa sa balaan nga kasulatan bilang katuyuan sang aton kabuhi7 wala nagakahulugan nga wala kita sang mga kabudlayan ukon kasubo, nga indi kita “maglitik” bilang konsikwensya sang mga tentasyon, sang kabudlayan, ukon sang aktwal nga mga pagtilaw sang aton dutan-on nga kabuhi.
Ining kalipay may angot sa perspektibo ni Nefi parte sa kabuhi sang magsiling sia, “Nga nakakita sang madamo nga pag-antos sa pagligad sang akon mga adlaw, apang, lubos nga nahamut-an sang Ginuo sa tanan ko nga mga adlaw.”8 Tanan niya nga mga adlaw! Bisan pa sa mga adlaw nga nag-antos si Nefi bangud sang indi paghangop kag pagsikway sang iya mismo kauturan, bisan pa nga gingaid nila sia sa barko, bisan pa sang adlaw nga ang iya amay, nga si Lehi, napatay, bisan pa nga si Laman kag Lemuel nangin mortal nga mga kaaway sang iya katawhan. Bisan pa sa sinang mabudlay nga mga adlaw, nabatyagan ni Nefi nga nahamut-an sia sang Ginuo.
May kalinong kita sa ihibalo nga ang Ginuo indi magtugot nga sulayon kita sing masobra pa sangsa aton masarangan pakigbatuan. Si Alma nagaagda sa aton nga “magbantay kag magpangamuyo sing dalayon, nga indi [kita] masulay sing labaw pa sa sinang [aton] masarangan, kag sa sina nga paagi magiyahan sang Espiritu nga Balaan, nga mangin mapainubuson, malulo, mapailubon, mapainumuron, puno sang gugma kag bug-os nga pagkamainantuson.”9
Magamit man ini sa mga pagtilaw sang kabuhi. Ginapahanumdom ni Amon sa aton ang mga pulong sang Ginuo: “Lakat … kag batasa sing may pagpaumod ang inyo mga kapipit-an, kag ihatag ko sa inyo ang kadalag-an.”10
Ang Ginuo pirme nagahatag sa aton sang bulig kon nagaatubang kita sang kabudlayan, tentasyon, libog, mga kahuyang, kag bisan sang kamatayon. Siling Niya, “Kag karon, sa pagkamatuod ginasiling ko sa inyo, kag kon ano ang ginahambal ko sa isa ginahambal ko sa tanan, magkalipay kamo, magagmay nga kabataan; kay yara ako sa tunga ninyo, kag wala ko kamo ginpabay-an.”11 Indi gid Niya kita pagtalikdan!
Ginapangamuyo ko nga padayon naton nga tukuron ang aton mga kabuhi sunod sa mga plano kag teknikal nga takos sang diosnon nga disenyo nga ginhimo sang aton Amay kag gintuman paagi sa aton Manluluwas, nga si Jesucristo. Gani, tungod sang grasya nga nagalab-ot sa aton paagi sa Pagbayad-Sala sang aton Manluluwas, mangin madinalag-on kita sa pagpasad sang kabuhi nga makabato sa sala, makabato sa tentasyon, kag ginpabakod sa paglampuwas sang masubo, mabudlay nga tinion sang aton mga kabuhi. Kag dugang pa, mangin ara kita sa pwesto nga malab-ot naton ang tanan nga mga bugay nga ginpromisa paagi sa pagpalangga sang aton Amay kag aton Manluluwas. Sa ngalan ni Jesucristo, amen.