Era Biubiu mai Pepeli na Jeretaiti,, mai vei Albin Veselka

11–17 ni Noveba: “Dresuka Laivi na iLati ni Tawavakabauta Oya”

Ica 1–5

E dina ni sa cecere cake mai na noda sala na sala ni Kalou, ka dodonu me da talairawarawa ki na Nona lewa, sa vakauqeti keda talega o Koya me da vakasama ka cakacakataki keda. Oqori e dua na lesoni erau a vulica o Jereti kei na tuakana. Me kena ivakaraitaki, e vaka me taumada ena vakasama nei Jereti na vakasama ni ilakolako ki na dua na vanua vou, “sa digitaki mai vei ira na vanua kecega e vuravura” ka sa “yalololoma kina” na Turaga, ka yalataka me na vakayacora na kerekere, ka kaya kina, “Kau na vakalougatataki iko vakaoqo ni ko sa dau masuti au vagumatua” (raica na Ica 1:38–43). Ena gauna e raica kina o tuakai Jereti na butobuto ni loma ni waqa ena kauti ira ki na vanua yalataki, a sureti koya na Turaga me vakatura e dua na kena iwali, ka taroga e dua na taro eda dau tarogi Koyakina: A cava ko vinakata meu kitaka?” (Ica 2:23). Eda rawa ni wasea vata kei Koya na noda vakanananu kei na vakasama, ka na vakarorogo ka solia Nona veivakadeitaki se kevaka e sega ena vakasalataki keda. Ena so na gauna na ka ga e tawasei keda tiko mai na veivakalougatataki eda vakasaqara sai koya na “ilati ni tawavakabauta,” Ia kevaka e rawa ni da “dresulaka na ilati oqori” (Ica 4:15), eda na kidacalataka na veika sa tuvakarau na Turaga me cakava vei keda.

Raica talega na “Rairai na Turaga vei Taci Jereti ” (vidio), Valenivola ni Kosipeli.

Vakasama eso ni Vuli e Vale ka vakakina ena Lotu

Ica 1:33–43

Niu masu vua na Turaga, ena yalololoma vei au ko Koya.

NaIca 1:33–43 e tukuni kina e tolu na masu i tuakai Jereti. Na cava o vulica mai na nona sauma na Turaga na masu yadua oqo? Vakasamataka mada e dua na gauna o ni vakila kina na yalololoma ni Turaga ena nomuni tagi Vua ena masu. Sa rawa mo na vola na veika oqo ka qai wasea vata kei na dua e gadreva tu me rogoca na nomu ivakadinadina.

Raica talega na “Na Masu Lo,” Serenilotu, naba 82

Ica 2; 3:1–6; 4:7–15

Au rawa ni ciqoma na ivakatakila me baleta na noqu bula.

E kaya o Peresitedi Russell M. Nelson: “Au kerei kemuni mo ni vakalevutaka na nomuni kaukauwa vakayalo mo ni ciqoma na ivakatakila. … Digitaka mo cakava na cakacaka vakayalo e gadrevi mo marautaka kina na isolisoli ni Yalo Tabu ka rogoca vakawasoma ka vakamatata na domo ni Yalo” (“iVakatakila me Baleta na Lotu, iVakatakila me Baleta na Noda Bula,” Liaona, Me 2018, 96).

Ni o vulica na Ica 2; 3:1–6; 4:7–15, na cava o vulica me baleta na “cakacaka vakayalo” a tukuna o Peresitedi Nelson? E rawa ni o vakatakilakilataka e na dua na roka na taro se na kauwai nei tuakai Jereti kei na veika a cakava kina, kei na dua tale na roka vakatakilakilataka na ivakarau a vukei koya kina na Turaga me kila na Lomana.

Oqo e so na taro mo tekivu kina:

• Na cava e vakurabuitaki iko me baleta na sala a sauma kina na Turaga na taro nei tuakai Jereti ena Ica 2:18–25?

• O na vakayagataka vakacava na Ica 3:1–5 mo vukea kina e dua e sa vulica tiko na ivakarau ni masu?

• Na cava ena rawa ni vakataotaki iko mo ciqoma na ivakatakila mai vua na Turaga? (raica na Ica 4:8–10). E rawa vakacava ni o ciqoma vakalevu cake na ivakatakila mai Vua? (raica na Ica 4:7, 11–15).

• Na cava o nanuma e kena ibalebale mo “dresuka laivi na ilati ni tawavakabauta” ena nomu bula” (Ica 4:15).

Na cava tale o vulica mai vua na tuakai Jereti me baleta na ivakatakila yadua?

E vakavulica o Elder Dale G. Renlund me baleta na “A Suituni iVakatakila Yadua” (Liaona, Nove. 2022, 16–19). Vakasamataka mo droinitaka e dua na iyaloyalo ka vola na va na tiki ni suitu ena yasana yadua. Ena vukei iko vakacava na ituvatuva vakacakacaka oqo mo “vakalevutaka na nomu rawa ni ciqoma na ivakatakila”?

Raica talega na Ulutaga Vakosipeli, “iVakatakila Yadua,” Valenivola Vakosipeli.

Ica 2:14–25; 3:1–20

Ena nona veivunauci, sa sureti keda kina na Turaga meda veivutuni ka lako mai Vua.

Me vakataka na parofita e cecere vakataka na tuakai Jereti sa vunauci vakakina mai vua na Turaga. Na cava o vulica mai na Ica 2:14–15 me baleta na veivakasavasavataki ni Turaga? E rawa talega mo veivosakitaka na sala a vunauci taci Jereti kina na Turaga kei na ka a cakava o koya a rawa ni vukea me vakarautaki koya ena ka a sotava ena Ica 3:1–20.

Ica 2:16–25

Ena vakarautaki au na Turaga meu takosova noqu “wasaliwa titobu.”

Ena so na gauna, na takosova na “wasaliwa titobu” sai koya duadua ga na sala me vakataucokotaki kina na loma ni Kalou ena vukuda. O sa raica beka na veika e tautauvata ena nomu bula ena Ica 2:16–25? Sa vakarautaki iko vakacava na Turaga me baleta na nomu ibolebole? Na cava beka e kerea tiko mo cakava ena gauna oqo mo vakarautaki kina ki na veika e gadreva o Koya mo cakava ena veisiga ni mataka?

Raica talega na L. Todd Budge, “Tudei ka Dei Taucoko na Veivakabauti,” Liaona,, Nove. 2019, 47–49.

Vakatovotovotaka na veika o sa vulica. Na vulici ni kosipeli e dodonu me vakauqeti keda me da veisautaka na noda bula. Ni wiliki oti na Ica 4:11–12, sa rawa mo vola eso na veivakayarayarataki ni nomu bula ka vakasamataka se ra vakauqeti iko mo caka vinaka. Na veisau cava eso o vakila e gadrevi mo cakava?

Ica 5

E tolu na dauivakadinadina e ratou vakadinadinataka na dina ni ivola i Momani.

Ni o wilika na parofisai nei Moronai ena Ica 5, vakasamataka vakatitobu na inaki ni Turaga ena kena vakarautaki e vuqa na ivakadinadina ni iVola i Momani. Na ivakadinadina cava era sa vakauqeti iko mo vakabauta ni sa vosa ni Kalou na iVola i Momani? E sa vakaraitaka vakacava vei iko na iVola i Momani “na kaukauwa ni Kalou kei na nona vosa”? (Ica 5:4).

Vakatutu baleta Nodra Tuberi na Gonelalai

Ica 1:33 – 43; 2:16 – 25; 3:1 – 6

Na Tamada Vakalomalagi sa dau rogoca ka sauma na noqu masu.

• Kevaka o kila e dua na vosa era sega ni kila na luvemu, solia vei ira eso na idusidusi rawarawa ena vosa oya (se vakatagitaka e dua na katokatoni ni dua tale na vosa). E rawa ni o vakayagataka oqo mo vakamacalataka kina na vuna a masu kina na tuakai Jereti me vukei ena Ica 1:33–37. Vakabibitaka na veika e vakila na Turaga me baleta na masu oqo kei na nona sauma mai (raica talega na “Wase 50: Era biuti Pepeli na Jeretaiti,” iTalanoa ni iVola i Momani, 143–44).

• Sureti ira na gone me vaka ni ra tara e dua na waqasogo, vaka e vakamacalataki ena Ica 2:16 – 17. Sa rawa ni o qai wilika kei ira na luvemu na leqa era a sotava na Jeretaiti ena nodra waqa (raica na Ica 2:19) kei na sala duidui eso a sauma kina na Turaga na masu nei tuakai Jereti (raica na Ica 2:19–25; 3:1–6). Na iyaloyalo kei na tabana ni itaviqaravi ena mua ni ituvatuva oqo ena rawa ni vukei iko kei ira na luvemu me ra talanoataka na italanoa. Na cava eda vulica mai na mataqali taro eso a taroga o tukai Jereti me baleta na masu? Wasea na ka sotavi ka o a masulaka na veivuke ka a vukei iko kina na Tamada Vakalomalagi.

Ica 3:6–16

Au a buli meu ucuya na Kalou.

• O ira na gone o vakavulica e na sotava e vuqa na itukutuku lasu me baleta na Kalou, o ira vakaira, kei na ituvaki ni yagodra. Sa rawa mo kerei ira me ra vukei iko mo kunea na dina me baleta na veiulutaga oqo ena Ica 3:6–16. Me vakamatatataki na dina e vakavulici ena Ica 3:13, 15, e rawa ni o raica vata e dua na iyaloyalo ni iVakabula ka sureti ira na luvemu me ra dusia na veitiki ni Yagona. Me ra qai dusia na tiki ni yagodra vata ga. Lagata vata e dua na sere me baleta nai ulutaga oqo, me vaka na “Ko Ni Solia Mai vei Au Nomuni Vale” (iVolanisere ni Gonelalai, 73). E rawa ni dou veivosakitaka kei ira na luvemudou na vuna o vakavinavinakataka kina na yagomudou.

Eda buli meda ucuya na Kalou.

Ica 5

E lewe tolu eratou na vakadinadinataka na iVola i Momani.

• A parofisaitaka o Moronai ni Tolu na iVakadinadina eratou na tauyavutaka na dina ni iVola i Momani. Mo vakavulica na ivakadinadina cava, e rawa ni o kerei ira na luvemu me ra vakamacalataka e dua na ka era sa raica se sotava ka ra sega ni sotava na tani. Ni o qai wilika vata na Ica 5 , e rawa ni o veivosakitaka na vuna e vakayagataka kina na Kalou na ivakadinadina ena Nona cakacaka. E rawa talega ni o veiwaseitaka na sala o kila kina ni dina na iVola i Momani kei na sala e rawa ni o wasea kina na nomu ivakadinadina vei ira na tani.

Me baleta na vakasama tale eso, raica na ilavelave ni vula oqo ena mekasini ni iTokani .

O Sa Raica Vakavuqa Beka?, mai vei Marcus Alan Vincent