I Will Bring You Up Again out of the Depths [E ’āfa’i fa’ahou mai au ia ’oe i ni’a mai raro mai i te mau vāhi hōhonu o te moana ra], nā Jonathan Arthur Clarke

18–24 nō Novema : « ’Ia fa’a’orehia te ’ino »

Etera 6–11

E rave rahi hānere matahiti i muri mai i te ha’amoura’ahia te ’āti Iareda, ’ua ’itehia mai i te ’āti Nephi te ano o tō rātou māramarama tahito. I rotopū i teie mau ano tē vai ra te hō’ē pāpa’a parau ’aro’aro—te mau ’api « ’auro mau » tei « ’ī i te mau parau ’ō’otihia », ’e « ’ua hina’aro mau ho’i rātou » ’ia tai’o i te reira (Mosia 8:9 ; 28:12). I teie mahana, tē vai nei tā tātou hō’ē parau ha’apotora’a nō teie pāpa’a parau, ’e tei pi’ihia te buka a Etera. I te tai’ora’a te ’āti Nephi i te reira, « ’ua ’ī rātou i te ’oto » i te ha’api’i mai i te hi’ara’a ’oto rahi o te ’āti Iareda. « ’Ua hōro’a mai te reira i te ’ite rahi ia rātou, ’e nā roto ho’i i te reira ’ua pōpou rātou » (Mosia 28:12, 18). ’Oe ato’a, e nehenehe ’oe e ’ite i te mau taime ’oto i roto i teie buka. E ’oa’oa ato’a rā ’oe i roto i teie hōro’a nō te ’ite. Mai tā Moroni i pāpa’i, « tei roto i te Atua te pa’ari ’ia fa’a’itehia teie mau mea ia ’outou […] ’ia fa’a’orehia te ’ino, ’e ’ia tae mai te tau e ’ere roa ai Sātane i te mana i ni’a i te ’ā’au o te mau tamari’i a te ta’ata nei » (Etera 8:26).

Mana’o nō te ’apo i te ha’api’ira’a i te ’utuāfare ’e i te fare purera’a

Etera 6:1–12

E arata’i te Fatu iā’u i roto i tō’u tere i te tāhuti nei.

E ’ite mai paha ’oe i te tahi mau mana’o pae vārua mai te mea e fa’aau ’oe te tere o te ’āti Iareda nā ni’a i te moana i tō ’oe tere i te tāhuti nei. ’Ei hi’ora’a, e aha tā te Fatu i fa’ata’a nō tē tūrama i tō ’oe ’ē’a mai te mau ’ōfa’i i roto i te mau pahī ’āti Iareda ? E aha te fa’aaura’a nō te mau pahī, ’aore rā te mata’i e « puhipuhi noa e tae atu i te fenua i fafauhia » ? (Etera 6:8). E aha tā ’oe i ’apo mai nā roto mai i te mau ’ohipa a te ’āti Iareda nā mua a’e, i roto ’e i muri a’e i te tere ? Nāhea te Fatu i te arata’ira’a ia ’oe i te fenua i fafauhia ?

« E hīmene ’ārue i te Fatu ra ». ’Ua fa’a’ite te ’āti Iareda i tō rātou māuruuru ’e tō rātou here i te Atua nā roto i te hīmene ’e te ’āruera’a (hi’o Etera 6:9). E nehenehe ’oe e mā’imi ’aore rā e fa’atupu i te mau rāve’a nō te fa’a’ohipa i te pehe ’e te ’itera’a pāpū mau o te ’ā’au nō te ’āruera’a i te Atua i te fare ’e i te fare purera’a. ’Ei hi’ora’a, e mea tano paha ’ia hīmene i te hō’ē hīmene ’āruera’a mai te hīmene « ’Ārue i te Fatu ma te ’ā’au hīmene » (Te mau Hīmene, N°34), ’ia tuatāpapa ana’e ’oe i te Etera 6:1–12.

Baby on Board [E ’aiū tō roto], nā Kendal Ray Johnson

Etera 6:5–18, 30 ; 9:28–35 ; 10:1–2

« Haere ma te ha’eha’a i mua i te Fatu ».

Noa atu ā e au ra ’ua nā ni’a a’e te te’ote’o ’e te ’ohipa ’ino i roto i te ’ā’amu o te ’āti Iareda, tē vai ato’a ra te mau hi’ora’a nō te ha’eha’a i roto i teie mau pene—i roto iho ā rā te Etera 6:5–18, 30 ; 9:28–35 ; ’e te 10:1–2. ’A feruri i teie mau uira’a i muri nei ’o te nehenehe e tauturu ia ’oe ’ia ’apo mai nā roto mai i teie mau hi’ora’a : Nō te aha teie mau ’āti Iareda i fa’aha’eha’ahia ai i roto i teie mau tupura’a ’ohipa ? Nāhea rātou i te fa’a’itera’a i tō rātou ha’eha’a ? Nāhea tō te Fatu ha’amaita’ira’a ia rātou nō te reira ? ’A feruri i te ’ohipa tā ’oe e nehenehe e rave nō te « haere ma te ha’eha’a i mua i te Fatu » (Etera 6:17) ’eiaha ’ia fa’ahepohia ’ia fa’aha’eha’a (hi’o Mosia 4:11–12 ; Alama 32:14–18).

Hi’o ato’a Dale G. Renlund, « Rave i te parauti’a, ’e ’ia hina’aro ho’i i te aroha, ’e te haere ma te ha’eha’a i te aro o tō Atua », Liahona, Novema 2020, 109–12.

Etera 7–11

E nehenehe au e riro mai ’ei ti’a fa’atere mai te Mesia te huru.

E 28 u’i tā te mau pene 7–11 o te Etera e tuatāpapa nei. Noa atu ā e mea iti te hu’ahu’ara’a e hōro’ahia i roto i te hō’ē vāhi na’ina’i, e ti’a oi’oi mai te hō’ē hōho’a nō ni’a i te mau fa’ahope’ara’a o te hō’ē fa’aterera’a parauti’a ’e te ’ino. E aha tā ’oe i ha’api’i mai nō ni’a i te fa’aterera’a nā roto mai i te mau hi’ora’a—’ino ’e maita’i—o te mau ari’i i tāpurahia i raro nei ?

• Oriha—Etera 6:30 ; 7:1

• Sule—Etera 7:23–27

• Iareda—Etera 8:1–7, 11–15

• Emera ’e Korianetuma—Etera 9:21–23

• Heta—Etera 9:26–30

• Seza—Etera 10:1–2

• Ripelakisa—Etera 10:5–8

• Morianetona—Etera 10:9–11

• Liba—Etera 10:19–28

• Etema—Etera 11:11–13

• Iesu Mesia—Mataio 18:1–4 ; 20:20–28 ; 23:11

’Ua hōro’a mai Elder Dieter F. Uchtdorf i te parau a’o e tauturu nō ni’a i te fa’aterera’a i roto i tāna a’ora’a « Tei rahi ra i roto ia ’outou na » (Liahona, Mē 2017, 78–81). ’A feruri i te tuatāpapa i teie parau poro’i—te mau ’ā’amu iho ā rā tāna e fa’ati’a ra—ma te ’imi i te mau parau tumu ’aore rā i te mau hōho’a nō te fa’aterera’a mai tā te Mesia te huru. E aha te taime ’a ’ite ai ’oe i teie mau parau tumu ’aore rā mau hōho’a tei fa’a’itehia i roto i te mau ta’ata e arata’i nei ?

Ma te feruri i te mea tā ’oe i ’apo mai, ’a feruri i te mau taime ’a fa’atere ai ’oe ’aore rā ’a fa’auru ai ia vetahi ’ē i roto i tō ’oe ’utuāfare, i tō ’oe huira’atira, i roto i tō ’oe pi’ira’a i roto i te ’Ēkālesia ’e tē vai atu ra. Nāhea ’oe i te fa’arahira’a i te mau ’aravihi nō te fa’atere mai tā te Mesia te huru, noa atu ā ’aita tō ’oe e pi’ira’a fa’atere ta’a ’ē mau ?

Hi’o ato’a « Te mau parau tumu nō te fa’aterera’a i roto i te ’Ēkālesia », Buka arata’i rahi : Te tāvinira’a i roto i te ’Ēkālesia a Iesu Mesia i te Feiā Mo’a i te mau Mahana Hope’a nei, 4.2 (ChurchofJesusChrist.org).

Etera 8:7–26

’Aita te Fatu e rave i te ’ohipa i roto i te pōiri.

’Ia ’ōpua ana’e te mau ta’ata e huna i tā rātou mau ’ohipa ’ino, tei roto rātou i te pupu ’ohipa huna. Hau atu i te pupu ’ohipa huna i fa’ata’ahia i roto te Etera 8:7–18, e nehenehe te tahi atu mau hi’ora’a e ’itehia i roto te Helamana 1:9–12 ; 2:2–11 ; 6:16–30 ; Mose 5:29–33. ’A feruri i te fa’aau i teie mau ’īrava i te 2 Nephi 26:22–24, i reira tō Nephi fa’ata’ara’a, nāhea te Fatu i te fa’atupura’a i tāna ’ohipa. I tō ’oe mana’o, nō te aha Moroni i fa’auehia ai ’ia pāpa’i i te mea tāna i rave nō ni’a i te mau pupu ’ohipa huna ?

E aha tā ’oe i ’apo mai i roto te buka a Etera ’o tē nehenehe e tauturu ia ’oe ’ia noa’a te mau ha’amaita’ira’a i fa’ata’ahia i roto te Etera 8:26 ?

Mana’o nō te ha’api’i i te tamari’i

Etera 6:1–12

E nehenehe au e ti’aturi i te Metua i te ao ra nō te tāmāhanahana iā’u ’ia mata’u ana’e au.

• E mau mahana fifi tō te mau ta’ata ato’a—tae noa atu te mau tamari’i na’ina’i. Penei a’e e nehenehe ’oe e tauturu i tā ’oe mau tamari’i ’ia ’ite mai te mau ta’o ’e te mau pereota i roto te Etera 6:1–12, ’o tē fa’a’ite nei nāhea te ’āti Iareda i te ti’aturira’a i te Atua i te mau mahana fifi mau ’e te ri’ari’a mau. ’A feruri i te fa’a’ite i te tahi ’e te tahi i te tahi mau ’ohipa i tupu, ’a tauturu ai te Atua ia ’oe i roto i te mau taime fifi o tō ’oe orara’a.

Etera 6:9, 12, 30 ; 7:27 ; 10:2

E hōpoi mai te ha’amana’ora’a i te mea tā te Fatu i rave i te māuruuru ’e te hau.

• I muri a’e i te taera’a atu ma te hau i te fenua i parauhia ra, ’ua māuruuru roa te ’āti Iareda ’e « ’ua ’oto ihora rātou ma te roimata ’oa’oa » (Etera 6:12). E nehenehe ’oe e fa’auru i tā ’oe mau tamari’i ’ia māuruuru nō te mau ha’amaita’ira’a a te Atua, ma te tauturura’a ia rātou ’ia ’ite mai i te mau pereota i roto te Etera 6:9, 12 ’o tē fa’a’ite nei, nāhea te ’āti Iareda i te fa’a’itera’a i tō rātou māuruuru i te Atua. E ’oa’oa paha rātou i te hīmene, mai tā te ’āti Iareda i hīmene, hō’ē hīmene ’o tē fa’a’ite ra i te māuruuru, mai te « Mon Père céleste m’aime » (Chants pour les enfants, 16). ’A ani i tā ’oe mau tamari’i ’ia fa’a’ite mai ia ’oe i te tahi mau mea tā rātou e māuruuru nei.

• Penei a’e e nehenehe tā ’oe mau tamari’i e tai’o te Etera 6:30 ; 7:27 ; ’e 10:2 ’e ’ia ’imi mai e aha tā teie mau ari’i parauti’a i ha’amana’o. Nāhea te reira i te fa’atupura’a i te huru ’a arata’i ai rātou i tō rātou mau ta’ata ? E nehenehe ’oe ’e tā ’oe mau tamari’i e ’āparau i te mau rāve’a nō te fa’aha’amana’o i te mea tā te Atua i rave nō ’oe. ’Ei hi’ora’a, penei a’e e nehenehe rātou e pāpa’i i te reira ’aore rā e pāpa’i hōho’a. E nehenehe ’oe e parau ia rātou, ’ia ha’amatau rātou i te pāpa’i tāmau i te mau ha’amaita’ira’a tā rātou e ’ite ra nō ’ō mai i te Atua ra (hi’o « O Remember, Remember [’A ha’amana’o na, ’a ha’amana’o] » [video], Vaira’a buka ’evanelia).

Etera 7:24–27

E ha’amaita’ihia vau ’ia pe’e ana’e au i te peropheta a te Atua.

• Penei a’e e ’oa’oa ’oe ’e tā ’oe mau tamari’i i te ha’uti ta’ata ora i te tahi mau mea tā te peropheta i ha’api’i ia tātou ’ia rave. E nehenehe ato’a ’oe e huri i te reira ’ei hō’ē ha’uti i reira ’oe e ’imi ai e aha te fa’ahōho’ara’a o te mau ’ohipa. E nehenehe te reira e fa’aineine i tā ’oe mau tamari’i ’ia ’āparau nō te aha e mea faufa’a ’ia pe’e i te peropheta a te Atua. I muri iho, e nehenehe ’oe e tai’o te Etera 7:24–27 nō te ’ite mai, e aha tei tupu ’a ha’apa’o ai te mau ta’ata i te parau a te peropheta a te Atua. Nāhea tātou i te ha’amaita’ira’ahia i te pe’era’a i te peropheta i teie mahana ?

Etera 9:28–35 ; 11:5–8

E aroha mai te Fatu ’ia tātarahapa ana’e au.

• Te ’imira’a i te mau hōho’a ’o te hō’ē ïa ’aravihi maita’i nō te tuatāpapara’a i te pāpa’ira’a mo’a. Tē vai nei i roto i te buka a Etera te hō’ē hōho’a tāmau tei ha’apāpū i te parau nō te aroha o te Fatu. Nō te tauturu i tā ’oe mau tamari’i ’ia ’imi i teie hōho’a, ’a ani ia rātou ’ia tai’o te Etera 9:28–35 ’e Etera 11:5–8, ma te ’imi i te mau tū’atira’a i rotopū i nā ’ā’amu e piti. E aha tā tātou e ’apo mai i roto i teie nā ’ā’amu ? Penei a’e e nehenehe rātou e ’imi i te mau hōho’a i roto te Buka hōho’a ’evanelia nō te tahi atu mau ta’ata i roto i te mau pāpa’ira’a mo’a, tei tātarahapa ’e tei fa’a’orehia tā rātou hara.

Nō te tahi atu ā mana’o, ’a hi’o te ve’a Hoa nō teie ’āva’e.

Jaredite Barges [Te mau pahī o te ’āti Iareda], nā Gary Ernest Smith