Li xMinerva Teichert (1888–1976), Laj Alma nakub’sin ha’ sa’ li ha’ Mormon, 1949–1951, óleo en masonite, 35 7/8 × 48 pulgadas. Museo de Arte, Universidad de Brigham Young, 1969

2–8 diciembre: “Re te’kanaaq sa’ li tiikil b’e”

Moroni 1–6

Chirix xchoyb’al lix tz’iib’ahom lix yuwa’ chirixeb’ laj Nefita ut chirix xk’osb’al ru li esil reheb’ laj Jaredita, laj Moroni kixk’oxla naq ak raqenaq chik lix k’anjel (chi’ilmanq Moroni 1:1). K’a’ chik ru kiru raj chi yeemank chirixeb’ li wiib’ chi tenamit li ke’sachman chi tz’aqal? A’b’an laj Moroni kiril li kutan wanko wi’ (chi’ilmanq Mormon 8:35), ut kimusiq’aak “chixtz’iib’ankil junjunq chik li k’a’aq re ru, re naq maare taawanq xloq’al … sa’ junaq kutan chalel” (Moroni 1:4). A’an kixnaw naq chal re jun nimla q’etok paab’ank sa’ chixjunil li ruchich’och’, rochb’een a’an li sachok na’leb’ chirixeb’ li k’ojob’anb’il k’anjel re li tijonelil ut chirix li paab’ank. Maare xb’aan a’in naq a’an kixtz’iib’a li saqen ruhil na’leb’ chirix li loq’laj wa’ak, li kub’iha’, xk’eeb’al li maatan re li Santil Musiq’ej, ut li osob’tesink re ch’utlaak rik’in ech aj paab’anelil “re te’kanaaq sa’ li tiikil b’e, re … te’xkanab’ rib’ ka’ajwi’ chiru lix k’ulub’ejil li Kristo, a’an aj yoob’anel ut aj choyonel re lix paab’aaleb’” (Moroni 6:4). Eb’ li chaq’al ru na’leb’ jo’eb’ a’in nokohe’xk’e chixb’antioxinkil naq li Qaawa’ kixkol lix yu’am laj Moroni re naq kiru “chixtz’iib’ankil junjunq chik li k’a’aq re ru” (Moroni 1:4).

Li na’leb’ re tzolok sa’ li ochoch ut sa’ li iglees

Moroni 1

Naru nintaaqe li Jesukristo, us ta wan li k’a’ru naka’pak’alin.

Naq nakawil Moroni 1, k’a’ru nawulak chawu chirix lix tiikilal laj Moroni sa’ xpaab’ankil li Qaawa’ ut sa’ xb’aanunkil li b’oqb’il wi’? Chan ru naq junaq kristiaan naru “taatzʼeqtaananq xyaalal li Kristo”? (Moroni 1:2–3). K’oxla chan ru naru nakatwan chi tiik chiru li Jesukristo, us ta yalb’il aawix ut aaka’pak’alinb’il.

Moroni 2–6

Tento te’b’aanumanq li k’ojob’anb’il k’anjel re li tijonelil jo’ chanru taqlanb’il xb’aan li Qaawa’.

Laj Moroni yoo chaq chi eelelik re xkolb’al rix lix yu’am naq kixtz’iib’aheb’ li ch’ol a’in. K’a’ut naq kixsik’ ru tz’iib’ak chirixeb’ li kok’ k’anjel a’in, jo’ chirix chan ru neke’b’aanuman li kok’ k’anjel? K’oxla a’in naq yooqat chirilb’al Moroni 2–6. K’a’ut naq aajeleb’ ru li na’leb’ a’in choq’ re li Qaawa’? Wahe’ junjunq li patz’om li naru neke’xk’am aab’e sa’ li tzolok:

Li k’ojob’ank choq’ komon (Moroni 2; 6:4).K’a’ru nakatzol rik’in lix ch’olob’ahom li Kolonel sa’ Moroni 2:2 chirix li k’ojob’ank choq’ komon? Chan raj ru taach’olob’ lix yaalal li wank chi “k’anjelanb’il ut ch’ajob’resinb’il xb’aan lix wankil li Santil Musiq’ej”? (Moroni 6:4).

Li k’ojob’ank sa’ li tijonelil (Moroni 3).K’a’ru nakataw sa’ li ch’ol a’in li naru naxtenq’a jun kristiaan chixkawresinkil rib’ re taak’ojob’aaq sa’ li tijonelil? K’a’ru nakataw li tixtenq’a raj jun kristiaan chixkawresinkil rib’ re tixb’aanu jun li k’ojob’ank?

Li loq’laj wa’ak (Moroni 4–5; 6:6).K’a’ru naru taab’aanu re naq li loq’laj wa’ak a’anaq li musiq’ejil hoonal q’axal loq’ chiru li xamaan?

Li kub’iha’ (Moroni 6:1–3).K’a’ru yookat chixb’aanunkil re kanaak chi k’ulub’ej re xk’ulb’al li kub’iha’?

Li Jesus kixk’ut chan ru te’b’aanumanq li k’ojob’anb’il k’anjel

Rik’in li k’a’ru xatzol, chan ru taajal li nakatk’oxlak chirixeb’, nakattz’aqon sa’eb’, malaj nakawresiheb’ aawas aawiitz’in re xk’ulb’aleb’ li k’ojob’anb’il k’anjel a’in?

Chi’ilmanq ajwi’ Tzol’leb’ ut Sumwank 84:20.

Xk’utb’esinkil li yeeb’il sa’ li seraq’. Re naq taajultiko’q aawe li nakatzol, naru nakach’olob’ chiru anihaq chik. Qayehaq, yal xb’aanunkil a’in: Wan jun laa wamiiw ink’a’ naxnaw ma kawresinb’il re taakub’eeq xha’. Chan raj ru taawoksi Moroni 6 re xtenq’ankil?

Moroni 4–5

Xk’ulb’al li loq’laj wa’ak nikinixtenq’a chi jilok rik’in li Jesukristo.

Naru naq ak aawab’ihomeb’ li tij re li loq’laj wa’ak k’iila sut, a’b’an ma nakatk’oxlak chi kok’ aj xsa’ chirix lix yaalalileb’ li raatinul? Naru nakayal xtz’iib’ankileb’ li wiib’ chi tij re li loq’laj wa’ak chi ink’a’ taawileb’. Chirix a’an, juntaq’eeta li xatz’iib’a rik’in Moroni 4:3 ut 5:2. Ma nakak’e reetal jun na’leb’ chirixeb’ li tij a’in li maajun sut aak’ehom reetal?

Naq yooqat chi tzolok, naru nakab’icha jun b’ich re li loq’laj wa’ak, maare “Re xkʼoxlankil li Kʼajolbʼej” (Eb’ li B’ich, 115).

Moroni 6:4–9

Eb’ lix tzolom li Jesukristo neke’xch’oolani li raameb’ chirib’ileb’ rib’.

K’eeb’il re li junjunq ma tixtaaqe li Kristo, a’b’an li qech aj paab’anelil naru nokohe’xtenq’a chi kanaak “sa’ li tiikil b’e” (Moroni 6:4–5). K’a’ru ke’xb’aanu li komon re li Iglees sa’ xkutankil laj Moroni re xkawob’resinkil rib’ chirib’ileb’ rib’? Naq nakawil Moroni 6:4–9, k’oxlaheb’ li osob’tesink neke’chal rik’in li “k’ehe’k sa’ ajl sa’ xyanq li tenamit re lix iglees li Kristo” (Moroni 6:4).

Naru ajwi’ nakak’oxlaheb’ li komon neke’wulak sa’ laa teep malaj uq’ej. Ma wan ani li naraj ru laa rahom—maare jun li ak’ komon malaj li ani yoo chi sutq’iik? K’a’ru naru taab’aanu re naq li neke’xk’ul a’an sa’ li iglees chanchanaq li ch’olob’anb’il xb’aan laj Moroni? (re xtawb’al li na’leb’, che’ilmanq li video rub’el “Cómo fortalecer a los nuevos miembros” sa’ li Biblioteca del Evangelio). Naru nakataw laa na’leb’ sa’ li tasal I re li raatin li Awa’b’ej Dallin H. Oaks, “Na’ajman ru jun li Iglees” (Jolomil ch’utub’aj-ib’ re octubre 2021).

Naq yooqat chixk’oxlankil lix yaalalil li aatin “chʼoolaniik xbʼaan lix chaabʼil aatin li Dios” (Moroni 6:4), naru nakak’oxla li ch’oolaniik naraj ru jun iyaj malaj jun k’uula’al—ut k’a’ru nak’ulman wi ink’a’ neke’xk’ul. Il Moroni 6:4–9 re xtawb’aleb’ li na’leb’ chirix “xch’oolaninkileb’” laa was aawiitz’in sa’ musiq’ej. Chan ru naq laa wech aj tzolom ak xate’xch’oolani?

Ink’a’ saqen ru chiru chixjunileb’ k’a’ut naq aajel ru li “kʼeheʼk saʼ ajl saʼ xyanq li tenamit re lix iglees li Kristo” ut li “chʼutlaak chi kokʼ aj xsaʼ” sa’ eb’ lix ch’utam li Iglees. Chan raj ru taach’olob’ k’a’ut naq sa aach’ool naq komonat sa’ lix Iglees li Jesukristo? (che’ilmanq lix komoneb’ chik li tasal sa’ li raatin li Awa’b’ej Oaks, “Na’ajman ru jun li Iglees”).

Re xtawb’al xkomon chik li na’leb’, chi’ilmanq li hu Liahona ut li hu Para la Fortaleza de la Juventud re li po a’in.

Li na’leb’ re xtzolb’aleb’ li kok’al

Moroni 2–6

Li Santil Musiq’ej a’an jun loq’laj maatan.

• Nayeeman resil li Santil Musiq’ej naab’al sut sa’ Moroni 2–6. Naru nakapatz’ reheb’ laa kok’al naq te’xtaw chixjunileb’ li raqal li neke’xye resil a’an, naq te’rileb’, ut naq te’xtz’iib’a li te’xtzol chirix li Santil Musiq’ej. Naru ajwi’ nekewotz cherib’il eerib’ eenumsihom naq xereek’a lix wankil li Musiq’ej.

Moroni 4–5

Nink’ul li loq’laj wa’ak re xk’utb’al naq junelik tinjultika li Jesukristo.

• Rilb’aleb’ li tij re li loq’laj wa’ak rik’ineb’ laa kok’al naru nekexxtenq’a chixtz’ilb’al rix chan ru xnimob’resinkil xloq’al li nekek’ul naq nekextz’aqon sa’ li loq’laj wa’ak. Naru neke’xk’oxla naq jun ramiiweb’ taawulaq sa’ li ch’utam re loq’laj wa’ak xb’een sut. Chan raj ru taqach’olob’ chiru li qamiiw k’a’ru li loq’laj wa’ak ut k’a’ut naq loq’? Waklesi xch’ooleb’ laa kok’al chiroksinkil li na’leb’ wan sa’ Moroni 4 malaj 5 naq te’xch’olob’ a’an. Eb’ li kok’al toj ka’ch’ineb’ naru neke’roksi li perel re kok’ k’anjel re li xamaan a’in malaj li Hu reheb’ li Jalam-uuch re li Evangelio, 108.

• Naru nekeb’icha jun li b’ich li tixtenq’aheb’ laa kok’al chixk’oxlankil li Jesus, maare “Tuqtuuko, chʼanchʼooko,” B’ichleb’aal choq’ reheb’ li Kok’al, 11). Naru ajwi’ nekekawresi eerib’ chi wank rik’in oxloq’ chiru xhoonalil li loq’laj wa’ak.

Moroni 6:1–3

Naru ninkawresi wib’ re taakub’eeq inha’.

• Ani naru taakubʼeeq xhaʼ? Tenq’aheb’ laa kok’al chixtawb’al xsumenkil li patz’om a’in sa’ Moroni 6:1–3. K’a’ru naraj naxye naq “yot’b’il qach’ool ut tuulan li qamusiq’”? (Moroni 6:2). Chan ru naq a’in nokoxtenq’a chixkawresinkil qib’ choq’ re li kub’iha’? Naru nakaye reheb’ laa kok’al chan ru naq kakawresi aawib’ choq’ re laa kub’iha’.

Moroni 6:4–6, 9

Nokoxik sa’ li iglees re xk’ulb’al li loq’laj wa’ak ut xtenq’ankil qib’ chiqib’il qib’.

• Ma neke’xnaw laa kok’al k’a’ut naq nawulak chawu xik sa’ li iglees? Rilb’al Moroni 6:4–6, 9 naru nekexxtenq’a chi aatinak chirix li k’a’aq re ru naqab’aanu sa’ li iglees. Naru neke’xyiib’ rib’ sa’ jalam-uuch naq yookeb’ chixb’aanunkil li k’a’aq re ru a’an (li tijok, li k’utuk, li b’ichank, ut xk’ulb’al li loq’laj wa’ak).

• Chirix rilb’al Moroni 6:4 sa’ komonil, naru nekerileb’ xjalam-uuch malaj reetalil li chaab’il tzakemq, ut teejuntaq’eeta xch’oolaninkil li qatib’el rik’in li “chʼoolaniik xbʼaan lix chaabʼil aatin li Dios.” Naru ajwi’ nekeril li video “Niños compartiendo el Evangelio” (Biblioteca del Evangelio).

Re xtawb’al xkomon chik li na’leb’, chi’ilmanq li hu Amigos re li po a’in.

Laj Moroni sa’ li ochoch pek, xb’aan laj Jorge Cocco