Li xMinerva Teichert (1888–1976), Laj Moroni: Lix ch’otojik aj Nefita, 1949–1951, óleo en masonite, 34 3/4 × 47 pulgadas. Museo de Arte, Universidad de Brigham Young, 1969

9–15 diciembre: “Li Kristo chiwaklesinq aawe”

Moroni 7–9

Rub’elaj naq laj Moroni kixchoy li tz’iib’anb’il esil naqanaw ru anajwan jo’ lix Hu laj Mormon rik’in xraqikil li raatin, a’an kixwotz oxib’ lix tz’iib’ahom laj Mormon, lix yuwa’: jun aatin tz’iib’anb’il choq’ reheb’ “li neke’taaqenk re li Kristo saʼ tuqtuukilal” (Moroni 7:3) ut wiib’ li hu kixtaqla laj Mormon re laj Moroni. Maare laj Moroni kiroksiheb’ li oxib’ esil a’in sa’ lix Hu laj Mormon xb’aan naq kiril chi rub’elaj naq juntaq’eetaq li ch’a’ajkilal sa’ li qakutan rik’in li wan sa’ xkutankil a’an. Naq ke’tz’iib’aak li aatin a’an, li tenamit aj Nefita ak yoo chixtz’eqtaanankil li Kolonel. Naab’al reheb’ ak “xsach chiruhebʼ li rahok chiribʼilebʼ ribʼ” ut ke’sahila xch’ool rik’in “chixjunil, kaʼajwiʼ rikʼin li chaabʼil inkʼaʼ” (Moroni 9:5, 19). A’ut laj Mormon toj kiwan xyo’onihom, li naxk’ut chiqu naq li yo’onink ink’a’ naraj naxye naq ink’a’ naqak’e reetaleb’ li ch’a’ajkilal re li ruchich’och’. Li yo’onink naraj b’an naxye naq wan qapaab’aal chirix li qaChoxahil Yuwa’ ut li Jesukristo, li ninqeb’ wi’chik lix wankileb’ a’an chiruheb’ li ch’a’ajkilal a’an. Naraj b’an naxye “xchapb’al qib’ chiru chixjunil li kʼaʼru us” (Moroni 7:19). Naraj b’an naxye xkanab’ankil chi wank sa’ li qak’a’uxl lix tojb’al rix li maak xb’aan li Jesukristo, “ut xyo’oninkil lix loq’al ut li junelik yu’am” (Moroni 9:25).

Li na’leb’ re tzolok sa’ li ochoch ut sa’ li iglees

Moroni 7:12–20

Lix Saqen li Kristo nikinixtenq’a chixtz’ilb’al rix b’ar wan li us ut li ink’a’ us.

Wankeb’ naab’al li neke’xpatz’, “Chan ru tinnaw ma nachal wik’in malaj rik’in li Dios li na’leb’ nink’ul?” malaj “Rik’in naq numtajenaq li b’alaq’il na’leb’ anajwan, chan ru tinnaw k’a’ru li us ut k’a’ru li ink’a’ us?” Li raatin laj Mormon sa’ Moroni 7 naxk’e junjunqeb’ li na’leb’ naru taqoksi re xsumenkileb’ li patz’om a’in. Sik’eb’ tz’aqal sa’eb’ li raqal 12–20. Naru nakawoskiheb’ li na’leb’ a’in re xtz’ilb’al rixeb’ li na’leb’ nakak’ul ut laa numsihom chiru li xamaan a’in.

Chi’ilmanq ajwi’ K’utul Raqal reheb’ li Loq’laj Hu, “Saqen, Lix saqen li Kristo,” Biblioteca del Evangelio; “Modelos de luz: Distinguir la luz” (video) Biblioteca del Evangelio.

Moroni 7:20–48

Sa’ xk’ab’a’ li Jesukristo, naru “tinchap wib’ chiru chixjunil li k’a’ru us.”

Laj Mormon kiroksi jun patz’om li jwal aajel ru sa’ li qakutankil: “Chan ru naru naqachap qibʼ chiru chixjunil li kʼaʼru us?” (Moroni 7:20). Chirix a’an kik’utuk chirix li paab’aal chirix li Jesukristo, li yo’onink, ut li tz’aqal rahok. Naq nakawileb’ li raqal 20–48, k’e reetal chan ru naq eb’ li na’leb’ a’an nakate’xtenq’a chixtawb’al ut “chixchapb’al aawib’ chiru” li chaab’ilal li nachal rik’in li Jesukristo. K’a’ut naq aajeleb’ ru li na’leb’ a’in choq’ re jun xtzolom li Jesukristo?

Chi’ilmanq ajwi’ li video chirix lix k’utum laj Mormon chirix li paab’ank, li yo’onink, ut li tz’aqal rahok, li wan sa’ li Biblioteca del Evangelio.

Moroni 7:44–48

“Li tz’aqal rahok a’an li saq ruhil rahok narahok wi’ li Kristo.”

Laj Mormon kixye naq li qapaab’aal ut li qayo’onihom rik’in li Jesukristo nokoxb’eresi rik’in li tz’aqal rahok. A’b’an k’a’ru li tz’aqal rahok? Naru nakatz’iib’a Li tz’aqal rahok a’an … toja’ naq taawil Moroni 7:44–48 re xk’eeb’al reetal li aatin li naru tixtz’aqob’resi ru li ch’ol aatin a’an. Naq ak xab’aanu, k’oxla risinkil li aatin Tz’aqal rahok ut sa’ xna’aj xk’eeb’al li k’ab’a’ej Jesukristo. K’a’ru naxk’ut a’in chawu chirix li Kolonel? Chan ru naq li Jesukristo kixk’ut lix saq ruhil rahom? K’oxla chan ru naq kixk’ut sa’eb’ li loq’laj hu ut sa’ laa yu’am laa’at.

Li Awa’b’ej Dallin H. Oaks kixye: “Lix yaalalil naq li tz’aqal rahok maajo’q’e na’oso’, ut lix yaalalil naq li rahok nim wi’chik xwankil chiru yalaq chaab’il b’aanuhom, us ta q’axal nim … a’an xb’aan naq li tz’aqal rahok, “li saq ruhil rahok narahok wi’ li Kristo” [Moroni 7:47], maawa’ jun b’aanuhom, a’an b’an jun wanjik malaj chan ru naq nokowan. … Li tz’aqal rahok, a’an jun wanjik na’ok wi’ jun kristiaan” (“El desafío de lo que debemos llegar a ser,” Liahona, enero 2001, 42). Rik’in li na’leb’ a’an sa’ laa k’auxl, naru nakawil raatin li Elder Massimo De Feo, “Li tz’aqal rahok: Li tz’aqal reetalil chixjunileb’ lix tz’aqal tzolom li Jesukristo” (Jolomil ch’utub’aj-ib’ re abril 2018). Chan ru naq li tz’aqal rahok naxjal aawanjik jo’ tzolom? Chan ru nakatru “chi jilok rikʼin li rahok”? (raqal 46).

Chi’ilmanq ajwi’ 1 Korintios 13:1–13; Eter 12:33–34; “Li rahok cherib’il eerib’,” Eb’ li B’ich, 201; “Caridad: Un ejemplo de los creyentes” (video), Biblioteca del Evangelio; Temas del Evangelio, “Caridad,” Biblioteca del Evangelio.

Oksiheb’ li k’anjeleb’aal sa’ li k’utuk. Xk’oxlankil jun chunleb’aal oxib’ li roq naru nakatxtenq’a chixtawb’al ru chan ru neke’k’anjelak sa’ komonil li paab’ank, li yo’onink, ut li tz’aqal rahok (chi’ilmanq Dieter F. Uchtdorf, “El poder infinito de la esperanza,” Liahona, noviembre 2008, 21–24).

Moroni 9:3–5

Li josq’il nak’amok sa’ li rahil ch’oolej.

Jalan b’ayaq rik’in li raatin laj Mormon re rahok sa’ Moroni 7:44–48, sa’ li xkab’ esil kixtz’iib’a laj Mormon re laj Moroni wankeb’ li tijom chirix jun na’leb’ jwal ch’a’aj choq’ reheb’ naab’aleb’ sa’ li kutan a’in—li josq’il. Jo’ naxye sa’ Moroni 9:3–5, k’a’ru ke’xk’ul laj Nefita xb’aan lix josq’ileb’? K’a’ruheb’ li tijom naru naqil sa’eb’ li raqal 3–5, 18–20, 23?

Chi’ilmanq ajwi’ Gordon B. Hinckley, “Tardos para airarse,” Liahona, noviembre 2007, 62–66.

Moroni 9:25–26

Naru nintaw inyo’onihom rik’in li Kristo, maak’a’ naxye k’a’ru nink’ul.

Chirix xyeeb’al resil li maa’usilal kiril, laj Mormon kixye re li ralal naq miraho’ xch’ool. K’a’ru naxk’e xkawilal aach’ool sa’ li raatin laj Mormon chirix li yo’onink? K’a’ru xyaalalil choq’ aawe naq li Kristo “tatxwaklesi”? K’a’ruheb’ xchaab’ilal li Kristo ut k’a’ruheb’ li na’leb’ re lix evangelio li “neke’wan sa’ laa k’a’uxl” ut neke’xk’e aayo’onihom? (Moroni 9:25).

Chi’ilmanq ajwi’ Russell M. Nelson, “Li sahil ch’oolejil ut kole’k sa’ musiq’ejil,” Jolomil ch’utub’aj-ib’ re octubre 2016.

Re xtawb’al xkomon chik li na’leb’, chi’ilmanq li hu Liahona ut li hu Para la Fortaleza de la Juventud re li po a’in.

Li na’leb’ re xtzolb’aleb’ li kok’al

Moroni 7:33

Wi wan inpaab’aal chirix li Jesukristo, naru ninb’aanu yalaq k’a’ru naraj a’an naq tinb’aanu.

• Naru nekerileb’ li jalam-uuch li neke’xk’ut jun kristiaan sa’ li loq’laj hu naq yoo chixb’aanunkil jun k’anjel aajel ru (chi’ilmanq, jo’ eetalil, Hu reheb’ li Jalam-uuch re li Evangelio, 19, 70, 78, 81). Chan ru naq xpaab’ankil li Kristo kixk’ut xwankil sa’eb’ li numsihom a’in? Chirix a’an naru nekeril Moroni 7:33, re naq teetaw k’a’ru naru naqab’aanu naq wan qapaab’aal chirix li Jesukristo. Naru ajwi’ nekewotz cherib’il eerib’ lee numsihom naq li Dios xexrosob’tesi rik’in wankil re xb’aanunkil li rajom.

Moroni 7:41

Xpaab’ankil li Jesukristo naru naxk’e inyo’onihom.

• Naq yooqat chixyaab’asinkil Moroni 7:41 chiruheb’ li kok’al, naru neke’xtaqsiheb’ li ruq’ naq te’rab’i jun na’leb’ kixye laj Mormon li tento taawanq wi’ qayo’onihom. Aatinan rik’ineb’ chirix li yo’onink li nakaweek’a laa’at sa’ xk’ab’a’ li Jesukristo.

• Naru ajwi’ nekek’oxla jun kristiaan li yoo chi nume’k sa’ junaq ch’a’ajkilal. Laa kok’al naru neke’xyiib’ junaq jalam-uuch choq’ re li kristiaan a’an li naru naxjultika re naq tento taawanq xyo’onihom rik’in li Jesukristo.

Moroni 7:40–41; 9:25–26

Naru taawanq inyo’onihom rik’in li Jesukristo, a’ ajwi’ chiruheb’ li ch’a’ajkil yale’k-ix.

• Re xtzolb’aleb’ laa kok’al chirix li yo’onink rik’in li Jesukristo, nujob’resi jun li lemil sek’ rik’in ha’ ut kuteb’ wiib’ k’a’aq re ru chi sa’—jun li taakanaaq sa’ xb’een li ha’ ut jun chik li taakanaaq chaq taq’a. Naq nekeril Moroni 7:40–41 ut 9:25–26, laa kok’al naru te’xk’e reetal k’a’ru naxb’aanu li yo’onink choq’ qe. Naru neke’xjuntaq’eeta li k’a’aq re ru nanumxik rik’in jun kristiaan wan xyo’onihom rik’in li Kristo. Chan ru naq a’an “nokoxwaklesi” naq nokonume’ sa’eb’ li ch’a’ajkil yale’k-ix? Tenq’aheb’ laa kok’al chixk’oxlankil chan ru naru neke’xk’uula li Kolonel ut eb’ lix k’utum neke’waklesin ch’oolej “sa’ lix k’a’uxleb’ chi junelik.”

Moroni 7:45–48

“Li tz’aqal rahok a’an li saq ruhil rahok narahok wi’ li Kristo.”

• Jun b’ich chirix li rahok, maare “Li rahok cherib’il eerib’” (B’ichleb’aal choq’ reheb’ li Kok’al, 74), naru nekexxtenq’a chixtz’ilb’al rix k’a’ru li tz’aqal rahok. Naru nakawil malaj nakaye chi k’osb’il ru Moroni 7:47 ut nakapatz’ reheb’ laa kok’al naq te’xyiib’eb’ xjalam-uucheb’ a’an naq yookeb’ chixk’utb’al xrahomeb’ choq’ re jun kristiaan. Ye reheb’ naq naru neke’xk’e lix jalam-uuch b’ar wi’ te’ril ut te’xjultika xraab’aleb’ li ras riitz’ineb’ jo’ naxb’aanu li Jesus.

• Chan ru naru nakawaklesi xch’ooleb’ laa kok’al chixsik’b’al ut chixnimob’resinkil li saq ruhil rahok narahok wi’ li Kristo sa’ xyu’ameb’? Naru nakatenq’aheb’ chixk’oxlankil chan ru naq li Jesus kixk’ut li tz’aqal rahok (chi’ilmanq, jo’ eetalil, Lukas 23:34; Jwan 8:1–11; Eter 12:33–34). Chan ru naru naqab’aanu li kixb’aanu a’an?

Re xtawb’al xkomon chik li na’leb’, chi’ilmanq li hu Amigos re li po a’in.

Xjalam-uuch li Kristo laj Kolonel, xb’aan laj Heinrich Hofmann