Paggamit sa Dali, Sunod Kanako—Alang sa Panimalay ug sa Simbahan

Alang Kang Kinsa Kini nga Kapanguhaan?

Kini nga kapanguhaan alang ni bisan kinsa nga gustong magtuon sa Doktrina ug mga Pakigsaad—sa indibidwal nga paagi, isip usa ka pamilya, ug diha sa mga klase sa Simbahan. Kon wala ka makatuon sa mga kasulatan sa regular nga paagi kaniadto, kini nga kapanguhaan makatabang kanimo sa pagsugod. Kon ikaw aduna nay maayo nga nabatasan na nga pagtuon sa ebanghelyo, kini nga kapanguhaan makatabang kanimo nga makabaton og mas makahuloganong mga kasinatian.

Mga Indibidwal ug Mga Pamilya Diha sa Panimalay

Ang labing nindot nga dapit sa pagkat-on sa ebanghelyo mao diha sa panimalay. Ang imong mga magtutudlo sa simbahan makasuporta kanimo, ug makakuha ka og pagdasig gikan sa ubang mga miyembro sa ward. Apan aron makasugakod sa espirituhanong paagi, matag usa nato nagkinahanglan og inadlaw-adlaw nga pagpabaskog gikan sa “maayo nga pulong sa Dios” (Moroni 6:4; tan-awa usab sa Russell M. Nelson, “Pasiuna nga Pakigpulong,” Liahona, Nob. 2018, 6–8).

Gamita kini nga kapanguhaan sa bisan unsang paagi nga makatabang kanimo. Ang mga latid naghatag og gibug-aton sa pipila ka mahangtoron nga mga kamatuoran nga makita diha sa Doktrina ug mga Pakigsaad. Nagsugyot usab kini og mga ideya ug mga kalihokan aron matabangan ka sa pagtuon sa mga kasulatan sa indibidwal nga paagi, uban sa mga sakop sa pamilya, o uban sa mga higala. Samtang magtuon ka, sunda ang giya sa Espiritu aron makakaplag og mahangtoron nga mga kamatuoran nga makahuloganon kanimo. Pangitaa ang mga mensahe sa Dios alang kanimo, ug sunda ang mga pag-aghat nga imong madawat.

Mga Magtutudlo ug mga Tigkat-on diha sa Simbahan

Kon ikaw nagtudlo og usa ka klase sa Primary, klase sa Sunday School sa kabatan-onan o sa mga hamtong, klase sa korum sa Aaronic nga Pagkapari, o sa Young Women, giawhag ka sa paggamit sa mga latid niini nga kapanguhaan samtang mangandam ka sa pagtudlo. Ang Dali, Sunod Kanako—Alang sa Panimalay ug sa Simbahan mao ang kurikulom alang sa imong klase sa Dominggo. Ang mga ideya sa pagkat-on niini nga kapanguhaan gidesinyo alang sa pagkat-on sa panimalay ug sa simbahan. Samtang mangandam ka sa pagtudlo, sugdi pinaagi sa pag-angkon og kaugalingon nimong mga kasinatian diha sa mga kasulatan. Ang imong labing importante nga pagpangandam mahitabo samtang magsiksik ka sa mga kasulatan ug magtinguha og personal nga inspirasyon sa Espiritu Santo. Mahimo usab nimong tun-an sa hunahuna ang mga panginahanglan sa mga tawo nga imong gitudloan. Pangitaa ang mahangtoron nga mga kamatuoran. Ang Dali, Sunod Kanako makatabang nimo sa pag-ila sa pipila niini nga mga kamatuoran ug sa pagkat-on kon sa unsang paagi nga ang mga kasulatan magamit sa imong kinabuhi.

Hinumdomi nga ang pagkat-on sa ebanghelyo, sa labing maayo nga paagi niini, nakasentro sa panimalay ug gisuportahan sa Simbahan. Sa laing pagkasulti, ang imong nag-unang responsibilidad mao ang pagsuporta sa mga tawo nga imong gitudloan diha sa ilang mga paningkamot nga makakat-on ug mosunod sa ebanghelyo diha sa panimalay. Ayaw kabalaka mahitungod sa pagbaton og hisgotanan nga ihatag alang kanila diha sa klase. Kondili, hatagi sila og mga oportunidad sa pagpakigbahin sa ilang mga kasinatian, mga hunahuna, ug mga pangutana mahitungod sa mga tudling sa kasulatan nga ilang nabasa sa panimalay. Dapita sila sa pagpakigbahin sa mahangtoron nga mga kamatuoran nga ilang nakit-an. Mas importante kini kaysa paghisgot og piho nga gidaghanon sa materyal.

Mga Klase sa Sunday School sa Kabatan-onan ug sa mga Hamtong

Usa sa nag-unang rason nganong managtigom kita diha sa mga klase sa Sunday School mao ang pagsuporta ug pag-awhag sa usag usa samtang maningkamot kita nga makaila ug makasunod ni Jesukristo. Usa ka yano nga paagi sa pagbuhat niini mao ang pagpangutana sama sa “Unsa ang gitudlo sa Espiritu Santo kanimo niining semanaha samtang nagtuon ka sa mga kasulatan uban sa Dali, Sunod Kanako?” Ang mga tubag niini nga pangutana mahimong mosangpot ngadto sa makahuloganon nga mga panaghisgotan nga mopalambo sa hugot nga pagtuo diha ni Jesukristo ug sa Iyang ebanghelyo.

Dayon mahimo kang modapit og panaghisgotan base sa mga sugyot sa pagtuon diha sa Dali, Sunod Kanako. Sama pananglit, ang ideya sa pagtuon tingali mosugyot sa pagsiksik sa Doktrina ug mga Pakigsaad 19:15–20, mangita kon giunsa sa Manluluwas sa paghulagway ang Iyang pag-antos. Mahimo nimong hangyoon ang mga sakop sa klase sa pagpakigbahin sa ilang gibati samtang nagbasa sila sa Iyang deskripsiyon ug hisgotan kon sa unsang paagi nga kini makaapekto sa paagi sa ilang panghunahuna mahitungod Kaniya. O mahimo ka nga mogahin og pipila ka panahon sa pagtuon niini nga mga bersikulo isip usa ka klase.

Mga Klase sa Korum sa Aaronic nga Pagkapari ug sa Young Women

Kon ang mga klase sa mga korum sa Aaronic nga Pagkapari ug sa Young Women magtagbo sa Dominggo, ang ilang katuyoan medyo lahi sa usa ka klase sa Sunday School. Agi og dugang sa pagtabang sa usag usa sa pagkat-on sa ebanghelyo ni Jesukristo, kini nga mga grupo managtigom usab aron magtinambagay mahitungod sa pagtuman sa buhat sa kaluwasan ug kahimayaan (tan-awa sa Kinatibuk-ang Tamdanan nga Basahon: Pagserbisyo diha sa Ang Simbahan ni Jesukristo sa mga Santos sa Ulahing mga Adlaw, 1.2), kon gimandoan sa ilang kapangulohan sa klase o korum.

Tungod niini nga rason, ang matag miting sa korum o klase kinahanglang sugdan sa usa ka sakop sa kapangulohan sa korum o klase nga mangulo og panaghisgotan mahitungod sa ilang mga paningkamot. Pananglitan, mahimo sila nga magtinambagay mahitungod sa ilang mga paningkamot sa pagsunod sa ebanghelyo, pagpangalagad ngadto sa mga tawo nga nanginahanglan, pagpakigbahin sa ebanghelyo, o pag-apil diha sa buhat sa templo ug family history.

Human niini nga panahon sa pagtinambagay sa usag usa, usa ka magtutudlo ang mangulo sa klase o korum sa magkaubang pagkat-on sa ebanghelyo. Ang hamtong nga mga lider o mga sakop sa klase o korum mahimong sangonan nga motudlo. Ang kapangulohan sa klase o korum, nga nakigtambag sa hamtong nga mga lider, maoy mohimo niini nga mga buluhaton.

Ang mga tawo nga gisangonan nga motudlo kinahanglang mangandam pinaagi sa paggamit sa mga sugyot sa pagkat-on diha sa sinemana nga latid sa Dali, Sunod Kanako. Diha sa matag latid, kini nga icon nagpasabot nga usa ka kalihokan nga may espesyal nga kalabotan sa kabatan-onan ug nahiuyon sa unsay ilang gitun-an diha sa seminary. Apan, bisan asa sa mga sugyot diha sa latid ang mahimong gamiton isip usa ka kalihokan sa pagkat-on alang sa kabatan-onan.

Alang sa usa ka sampol sa butang nga tukionon [agenda] alang sa mga miting sa korum ug klase, tan-awa sa apendiks D.

Primary

Ang imong pagpangandam sa pagtudlo sa Primary magsugod samtang ikaw magtuon sa mga kasulatan sa personal nga paagi ug uban sa imong pamilya. Samtang buhaton nimo kini, magmahimong bukas alang sa espirituhanon nga mga pagbati ug mga panabot gikan sa Espiritu Santo mahitungod sa mga bata diha sa imong klase sa Primary. Magmainampoon. Ang Espiritu makadasig kanimo og mga ideya aron matabangan sila nga makakat-on sa ebanghelyo ni Jesukristo.

Samtang mangandam ka sa pagtudlo, mahimong makaangkon ka og dugang nga inspirasyon pinaagi sa pagsuhid sa mga ideya sa pagtudlo niini nga kapanguhaan. Ang matag latid diha sa Dali, Sunod Kanako—Alang sa Panimalay ug sa Simbahan adunay usa ka seksiyon nga giulohan og “Mga Ideya sa Pagtudlo sa mga Bata.” Hunahunaa kini nga mga ideya isip mga sugyot nga mogiya kanimo ngadto sa mga ideya nga makaaghat og inspirasyon. Nakaila ka sa mga bata diha sa imong klase sa Primary—ug mas mailhan pa nimo sila samtang ikaw makig-interaksiyon kanila diha sa klase. Ang Dios nakaila usab kanila, ug Siya modasig kanimo sa labing maayo nga mga paagi sa pagtudlo ug pagpanalangin kanila.

Ang mga bata diha sa imong klase tingali nakahimo na sa pipila ka kalihokan diha sa Dali, Sunod Kanako uban sa ilang mga pamilya. OK ra kana. Ang pagbalik-balik maayo. Ikonsiderar ang pagdapit sa mga bata sa pagpakigbahin sa usag usa sa unsay ilang nakat-onan sa panimalay. Kinahanglan usab ka nga magplano og mga paagi alang sa mga bata aron moapil bisan kon wala sila nagkat-on sa panimalay. Ang mga bata mas epektibong makakat-on sa mga kamatuoran sa ebanghelyo kon kini nga mga kamatuoran ibalik-balik sa pagtudlo pinaagi sa lainlaing kalihokan. Kon imong makita nga ang usa ka kalihokan sa pagkat-on epektibo alang sa mga bata, ikonsiderar ang pagbalik-balik niini, ilabi na kon nagtudlo ka sa mas gagmay nga mga bata.

Sa mga bulan nga adunay lima ka Dominggo, ang mga magtutudlo sa Primary giawhag sa pagpuli sa gieskedyul nga latid sa Dali, Sunod Kanako sa ikalima nga Dominggo sa usa o dugang pa nga mga kalihokan sa pagkat-on diha sa “Apendiks B: Alang sa Primary—Pag-andam sa mga Bata nga Maanaa sa Dalan sa Pakigsaad sa Dios sa Tibuok Kinabuhi.”