Mga Ideya sa Pagpalambo sa Pagkat-on diha sa Panimalay ug sa Simbahan

Samtang ikaw magtuon sa ebanghelyo sa Manluluwas diha sa panimalay ug sa simbahan, hunahunaa ang mosunod nga mga pangutana:

• Unsaon nimo sa pagdapit ang Espiritu sa imong pagtuon?

• Unsaon nimo sa pagpunting ngadto sa Manluluwas diha sa imong pagtuon?

• Unsaon nimo sa pagpahimulos sa matag adlaw nga mga gutlo sa pagkat-on?

• Unsaon nimo sa pag-awhag ang pamilya ug mga sakop sa klase sa pagtuon sa mga kasulatan sa ilang kaugalingon ug sa pagpakigbahin unsay ilang nakat-onan?

Aniay pipila ka yano nga mga paagi sa pagpauswag sa imong pagtuon sa pulong sa Dios.

Pag-ampo alang sa kadasig

Ang mga kasulatan mao ang mga pulong sa Dios, busa pangayo Kaniya og tabang nga makasabot niini.

Pangitaa ang mga kamatuoran mahitungod ni Jesukristo

Ang tanang butang nagpamatuod ni Kristo (tan-awa sa 2 Nephi 11:4; Moises 6:63), busa hunahunaa ang pagtimaan o sa pagmarka sa mga bersikulo nga nagpamatuod sa Manluluwas, pagpalig-on sa imong gugma alang Kaniya, ug sa pagtudlo unsaon sa pagsunod Kaniya. Usahay ang mga kamatuoran mahitungod sa Manluluwas ug sa Iyang ebanghelyo direkta nga gipahayag, ug usahay kini gipasumbingay pinaagi sa ehemplo o istorya. Pangutan-a ang imong kaugalingon, “Unsa nga mahangtorong mga kamatuoran ang gitudlo niini nga mga bersikulo? Unsa ang gitudlo niini nga mga kamatuoran kanako mahitungod sa Manluluwas?”

Paminaw sa Espiritu

Hatagi og pagtagad ang imong mga hunahuna ug mga pagbati, bisan og kini walay kalabotan sa unsay imong gibasa. Kini nga mga impresyon mahimo nga mao ang unsay gusto sa imong Langitnong Amahan nga imong makat-onan.

Irekord ang Imong mga impresyon

Adunay daghang mga paagi sa pagrekord sa mga impresyon nga moabot samtang ikaw nagtuon. Pananglitan, imong mahibaloan nga ang piho nga mga pulong ug hugpong sa mga pulong diha sa mga kasulatan nakapadani kanimo; mahimo nimong markahan kini ug isulat ang imong mga hunahuna isip usa ka pahinumdom diha sa imong mga kasulatan. Ikaw makahimo usab og journal sa mga panabot, mga pagbati, ug mga panumdoman nga imong madawat.

Ipakigbahin unsay imong nakat-onan ngadto sa uban

Ang paghisgot sa mga panabot gikan sa imong personal nga pagtuon usa ka maayong paagi sa pagtudlo sa uban, ug makatabang usab kini nga malig-on ang imong pagsabot sa unsay imong nabasa. Ipakigbahin unsay imong nakat-onan sa mga sakop sa pamilya ug mga higala (sa personal o sa digital nga paagi), ug dapita sila sa pagbuhat sa ingon.

Gamita ang mga kasulatan diha sa inyong kinabuhi

Hunahunaa kon sa unsa nga paagi ang mga istorya ug mga pagtulon-an nga imong gibasa magamit sa imong kinabuhi. Pananglitan, mahimo nimong pangutan-on ang imong kaugalingon, “Unsa nga mga kasinatian ang akong nasinati nga susama sa unsay akong gibasa?”

Pangutana samtang ikaw nagtuon

Samtang ikaw nagtuon sa mga kasulatan, mga pangutana mahimong mosulod sa hunahuna. Tingali kini nga mga pangutana may kalabotan sa unsay imong gibasa o sa imong kinabuhi sa kinatibuk-an. Palandonga kini nga mga pangutana ug pangita og mga tubag samtang ikaw nagpadayon sa pagtuon sa mga kasulatan.

Gamita ang mga tabang sa pagtuon sa kasulatan

Aron makaangkon og dugang nga mga panabot sa mga bersikulo nga imong gibasa, gamita ang mga footnote, Ang Giya ngadto sa mga Kasulatan, ug ubang mga tabang sa pagtuon.

Hunahunaa ang konteksto sa mga kasulatan

Ikaw makakaplag og makahuloganong mga panabot mahitungod sa usa ka tudling sa kasulatan samtang hunahunaon nimo ang konteksto niini, lakip ang mga kahimtang o ang dapit nga gigikanan niini. Pananglitan, ang pagkahibalo sa kaagi ug mga tinuohan sa katawhan nga gipakigsultihan sa Dios makatabang kanimo sa pagsabot og mas maayo sa tuyo sa Iyang mga pulong. Ikaw makakat-on mahitungod niini sa Mga Santos, Konteksto sa mga Pagpadayag [Revelations in Context], sa mga ulohan sa seksiyon sa Doktrina ug mga Pakigsaad, ug sa ubang mga kapanguhaan.

Tun-i ang mga pulong sa mga propeta ug apostoles sa ulahing mga adlaw

Basaha unsay gitudlo sa mga propeta ug apostoles sa ulahing adlaw mahitungod sa mga baroganan nga imong nakit-an sa mga kasulatan.

Sunda unsay imong nakat-onan

Ang pagtuon sa kasulatan kinahanglan dili lamang magdasig kanato apan maggiya usab kanato sa pag-usab sa paagi sa atong pagpuyo. Paminaw sa unsay giaghat sa Espiritu kanimo nga buhaton samtang ikaw magbasa, ug dayon pasalig sa pagbuhat niadtong mga pag-aghat.

Paggamit og musika

Gisugyot nga mga himno ug mga kanta sa mga bata makita sa tibuok nga Dali, Sunod Kanako. Gamita ang sagrado nga musika sa pagdapit sa Espiritu ug sa pagpalig-on sa inyong hugot nga pagtuo ug pagpamatuod sa mga kamatuoran sa ebanghelyo.

Pagmemorya og mga kasulatan

Pagpili og usa ka tudling sa kasulatan nga makahuloganon kanimo, sa imong pamilya, o sa imong klase, ug memoryaha kini pinaagi sa pagbalik-balik niini kada adlaw o sa pagdula og pagmemorya nga dula.

Pagpakigbahin og mga leksyon nga naggamit og mga butang

Pangita og mga butang nga may kalabotan sa mga kapitulo ug mga bersikulo nga imong gibasa. Ikonsiderar kon sa unsa nga paagi nga ang matag butang may kalabotan sa mga pagtulon-an diha sa mga kasulatan.

Pagdrowing, pangitaa, o litratohi

Pagbasa og pipila ka bersikulo, ug dayon pagdrowing og butang nga may kalabotan sa unsay imong gibasa. O ikaw mahimong mangita og litrato sa Pakete sa mga Hulagway sa Ebanghelyo [Gospel Art Book] o bisan asa sa Librarya sa Ebanghelyo [Gospel Library]. Mahimo usab nga imong litratohan nga naghulagway unsay imong nakat-onan.

I-drama ang istorya

Human mabasa ang usa ka istorya, dapita ang mga sakop sa klase sa pagdrama niini. Pagkahuman, hisgoti kon sa unsa nga paagi nga ang istorya adunay kalabotan sa mga butang nga imong nasinati.

Pagmauyonon diha sa panimalay

Kon ikaw adunay mga sakop sa pamilya nga dili gusto nga moapil sa pamilya nga pagtuon sa kasulatan, pangita og ubang mga paagi nga makakonektar kanila. Pananglitan, mahimo ka ba nga mopakigbahin og mahangtorong kamatuoran sa natural nga paagi diha sa inyong mga panagsultihanay o makigbahin og makahuloganong kasulatan sa paagi nga wala magwali o mapasigarbohon? Ang pagtuon sa kasulatan dili kinahanglan nga parehas ang paghimo sa matag pamilya. Ang ubang mga anak mas gustong magtuon sa mga kasulatan sa tinagsa. Pagmainampoon ug sunda ang mga pag-aghat sa Espiritu.

Mga miting sa konseho sa magtutudlo alang sa mga ginikanan. Kon ikaw gusto og dugang tabang sa imong mga paningkamot sa pagtudlo sa imong mga anak, susiha kon ang imong ward naghimo ba og mga miting sa konseho sa magtutudlo alang sa mga ginikanan (tan-awa sa Kinatibuk-ang Tamdanan nga Basahon, 17.5). Kini nga mga miting mao ang oportunidad alang sa mga ginikanan sa pagtinambagay ug pagkat-on mahitungod kon unsaon sa pagpalambo sa ilang pagtudlo. Sila makahisgot sa mga baroganan sa Pagtudlo Sumala sa Pamaagi sa Manluluwas, sa mga ideya niini nga mga pahina alang sa pagpalambo sa pamilya nga pagtuon sa kasulatan, ug ang pagkat-on ug mga sugyot sa pagtudlo nga makita sa tibuok Dali, sunod Kanako.