Disyembre 30–Enero 5: “Ang Gisaad nga Pagpahiuli Nagpadayon”

Ang Pagpahiuli sa Kahingpitan sa Ebanghelyo ni Jesukristo

Unsaon nimo sa pagsaulog ang ika-200 nga anibersaryo sa usa ka panghitabo nga nakapausab sa kalibotan? Mao kana ang pangutana nga gipamalandongan sa Unang Kapangulohan ug sa Korum sa Napulog Duha ka Apostoles samtang nagsingabot ang Abril 2020, nagtimaan sa 200 ka tuig sukad sa Unang Panan-awon ni Joseph Smith. “Naghunahuna mi kon magtukod ba og monumento,” nahinumdom si Presidente Russell M. Nelson. “Apan samtang among gikonsiderar ang talagsaon nga makasaysayanon ug internasyonal nga epekto sa Unang Panan-awon, nadasig kami sa paghimo og usa ka monumento dili sa granite o bato apan sa mga pulong … , dili ikulit diha sa “papan nga bato” apan hinoon ikulit diha sa “papan” sa atong mga kasingkasing [2 Mga Taga Corinto 3:3]” (“Paminaw Kaniya,” Liahona, Mayo 2020, 90).

Ang monumento sa mga pulong nga ilang gibuhat giulohan og “Ang Pagpahiuli sa Kahingpitan sa Ebanghelyo ni Jesukristo: Usa ka Pamahayag ngadto sa Kalibotan sa Ikaduhang Siglo nga Kasaulogan.” Usa kini ka monumento dili lamang sa Unang Panan-awon apan usab sa tanang gibuhat ni Jesukristo—ug sa gibuhat pa—sukad niana. Ang Pagpahiuli sa Iyang ebanghelyo nagsugod sa usa ka tawo nga miduol ngadto sa Dios ug naminaw Kaniya. Nagpadayon kini nianang samang paagi: usa ka kasingkasing, usa ka sagrado nga kasinatian sa usa ka panahon—lakip sa inyoha.

Mga Ideya alang sa Pagkat-on diha sa Panimalay ug sa Simbahan

“Ang Dios nagmahal sa Iyang mga anak sa matag nasod sa kalibotan.”

Sa imong opinyon, ngano nga ang pamahayag mahitungod sa Pagpahiuli magsugod sa pamahayag mahitungod sa gugma sa Dios? Samtang magtuon ikaw sa pamahayag, pangitaa ang mga pagpakita sa gugma sa Dios alang sa “Iyang mga anak sa matag nasod sa kalibotan.” Sa unsa nga paagi nga ang Pagpahiuli sa ebanghelyo nakatabang nimo nga mobati sa Iyang gugma?

Tan-awa usab sa Gerrit W. Gong, “Tanan nga mga Kanasuran, mga Kaliwatan, ug mga Pinulongan,” Liahona, Nob. 2020, 38–41.

Ang Pagpahiuli nagsugod sa usa ka tubag sa pangutana.

Mahimong ikasulti nga ang Manluluwas misugod sa Pagpahiuli sa Iyang ebanghelyo pinaagi sa pagtubag sa usa ka pangutana. Unsa nga mensahe nga sa imong pamati nga ang anaa sa Pagpahayag sa Pagpahiuli alang sa usa ka tawo nga adunay pangutana mahitungod sa Dios, sa ebanghelyo, o “sa kaluwasan sa iyang kalag”? Mahimo kang magtuon usab sa Joseph Smith—Kasaysayan 1:5–20 aron mahibaloan unsay imong makat-onan gikan ni Joseph Smith mahitungod sa pagpangita og mga tubag sa mga pangutana sa ebanghelyo.

Tan-awa usab sa Topics and Questions [Mga Hilisgotan ug mga Pangutana], “Seeking Answers [Pagtinguha og mga Tubag],” Gospel Library.

Detalye gikan sa Mga Tinguha sa Akong Kasingkasing, ni Walter Rane

Si Jesukristo mipahiuli sa Iyang Simbahan.

Unsa ang imong nahibaloan mahitungod sa “Bag-ong Tugon nga Simbahan ni Kristo,” nga gipahiuli sa Manluluwas pinaagi ni Joseph Smith? Hunahunaa ang pagtuon niini nga mga kasulatan ug sa paglista sa pipila ka importanteng butang sa Iyang Simbahan:

• Mateo 16:15–19

• Marcos 16:15–18

• Lucas 6:12–13

• Mga Buhat 4:34–35

• 1 Mga Taga-Corinto 15:29

• Mga Taga-Efeso 4:11–15

Sunod, mahimo nimong ipahaom ang mga kasulatan sa ibabaw nianang anaa sa ubos, nga naghulagway kon giunsa ni Jesukristo pagpahiuli kadtong importanteng mga butang sa Iyang Simbahan pinaagi ni Joseph Smith:

• Doktrina ug mga Pakigsaad 18:37–38; 107:23–24

• Doktrina ug mga Pakigsaad 51:3; 70:14

• Doktrina ug mga Pakigsaad 84:64–72

• Doktrina ug mga Pakigsaad 110:11–16

• Doktrina ug mga Pakigsaad 124:31, 36

• Ang mga Artikulo sa Hugot nga Pagtuo 1:6

Ngano nga ikaw mapasalamaton alang sa Pagpahiuli sa ebanghelyo ni Jesukristo?

Si Elder Jeffrey R. Holland ug ang iyang asawa sa makausa misulay sa paghunahuna kon unsa kaha ang ilang bation nga magpuyo sa wala pa ang Simbahan mapahiuli. “Unsay atong gipangandoy nga duna unta kita?” gipangutana nila ang ilang mga kaugalingon. Basaha ang ilang mga kasinatian sa “Usa ka Hingpit nga Kahayag sa Paglaom” (Liahona, Mayo 2020, 81). Sa unsa nga paagi nga ang Pagpahiuli nakatabang sa pagtuman sa imong espirituwal nga mga paglaom?

Tan-awa usab sa Topics and Questions [Mga Hilisgotan ug mga Pangutana], “Apostasy and the Restoration of the Gospel [Apostasiya ug ang Pagpahiuli sa Ebanghelyo],” Gospel Library.

“Ang gisaad nga Pagpahiuli nagpadayon.”

Nakahunahuna ba ikaw sa imong kaugalingon isip kabahin sa Pagpahiuli sa ebanghelyo? Ikonsiderar kini nga mga pulong gikan ni Presidente Dieter F. Uchtdorf: “Usahay maghunahuna kita sa Pagpahiuli sa ebanghelyo ingon nga kompleto, butang nga nahitabo na. … Apan sa tinuod lang, ang Pagpahiuli usa ka nagpadayon nga proseso; nagpuyo kita niini karon mismo” (“Wala Ba Kamo Nalambigit sa Buhat sa Pagpahiuli?,” Liahona, Mayo 2014, 59).

Samtang mag-andam ikaw sa pagtuon sa unsa nga paagi ang ebanghelyo gipahiuli niadtong mga 1800, mahimong magsugod ikaw sa pagpamalandong sa unsa nga paagi kini gipahiuli sa imong kinabuhi. Basaha ang Pamahayag sa Pagpahiuli uban sa mga pangutana nga sama niini sa hunahuna: Giunsa nako pagkahibalo nga kini tinuod? Sa unsang paagi ako makaapil sa Pagpahiuli karon?

“Abli ang kalangitan.”

Unsa ang kahulogan sa hugpong sa mga pulong nga “abli ang kalangitan” nganha kanimo? Unsa nga ebidensya ang imong nakita—diha sa Pamahayag sa Pagpahiuli, sa Simbahan karon, diha sa mga kasulatan, ug sa imong kinabuhi—nga tinuod nga abli ang kalangitan?

Mahimo usab nga imong iapil ang “Miabot nang Kabuntagon” (Mga Himno, nu. 1) isip kabahin sa imong pagtuon. Unsa ang imong makita niini nga himno nga nakapadugang sa pagsabot sa hugpong sa mga pulong nga “abli ang kalangitan”?

Tan-awa usab sa Quentin L. Cook, “Ang Panalangin sa Nagpadayon nga Pagpadayag ngadto sa mga Propeta ug sa Personal nga Pagpadayag aron sa Paggiya sa Atong Kinabuhi,” Liahona, Mayo 2020, 96–100.

Pagkat-on og dungan. Si Presidente Nelson midapit kanato nga “Tun-i [ang pamahayag sa Pagpahiuli] kini sa pribado nga paagi ug uban sa sakop sa [atong] pamilya ug mga higala” (“Paminaw Kaniya,” 92). Ikonsiderar unsaon nimo sa pag-apil ang uban sa imong pagtuon.

Alang sa dugang nga mga ideya, tan-awa ang mga isyu karong bulana sa Liahona ug sa Alang sa Kalig-on sa mga Kabatan-onan nga mga magasin.

Mga Ideya sa Pagtudlo sa mga Bata

“Kami ligdong nga mamahayag.”

• Samtang ikaw magbasa sa mga kabahin sa pamahayag sa Pagpahiuli uban sa imong mga anak (o motan-aw sa bidyo ni Presidente Nelson nga nagbasa niini), tabangi sila sa pagpangita sa mga kapahayag nga magsugod sa hugpong sa mga pulong sama sa “kami ligdong,” “kami mopahayag,” o “kami mopamatuod.” Unsa nga mga kamatuoran ang gipahayag sa atong mga propeta ug apostoles? Tingali ikaw ug ang imong mga anak mahimong mopakigbahin sa inyong kaugalingong mga pagpamatuod sa pipila niini nga samang mga kamatuoran.

  The Restoration of the Fulness of the Gospel of Jesus Christ

  President Russell M. Nelson, with the First Presidency and Quorum of the Twelve Apostles, makes a bicentennial proclamation on The Restoration of the Fulness of the Gospel of Jesus Christ.

“Si Joseph Smith … adunay mga pangutana.”

• Tingali makapaikag sa imong mga anak ang pagsuhid sa pipila ka pangutana ni Joseph Smith nga misangpot ngadto sa Pagpahiuli sa ebanghelyo sa Manluluwas. Tabangi sila sa pagpangita og pipila ka ehemplo sa Joseph Smith—Kasaysayan 1:10, 29, 68. Sa unsa nga paagi kita nabulahan karon tungod kay ang Dios mitubag sa mga pangutana ni Joseph Smith?

• Mahimo usab nga imong hatagan ang imong mga anak og kahigayonan sa paghisgot sa ilang mga pangutana. Unsay atong nakat-onan gikan ni Joseph Smith mahitungod kon unsaon sa pagpangita og mga tubag? (tan-awa sa Joseph Smith—Kasaysayan 1:8–17).

“Ang langitnong mga mensahero miabot aron sa pagtudlo ni Joseph.”

• Kinsa ang “langitnong mga mensahero [nga] miabot aron sa pagtudlo ni Joseph”? Ang imong mga anak tingali malingaw nga motan-aw sa ilang mga litrato diha sa Pakete sa mga Hulagway sa Ebanghelyo [Gospel Art Book] (tan-awa sa mga nu. 91, 93, 94, 95). Sa unsa nga paagi nga ang matag usa niini nga mga mensahero nagtabang sa “pagtukod pag-usab sa Simbahan ni Jesukristo”? Ang mga kasulatan nga gisugyot niini nga semana sa pahina sa kalihokan makatabang sa imong mga anak nga matubag kini nga pangutana.

Si Jesukristo mipahiuli sa Iyang Simbahan.

• Unsaon nimo pagtabang ang imong mga anak nga makasabot unsay gipasabot sa Simbahan sa Manluluwas ipahiuli? Tingali mahimo silang magbuhat og yanong tore gamit ang mga bloke ug mga baso ug “ipahiuli,” o buhaton kini pag-usab. O, kon ang imong mga anak kinahanglan nga moilis og butang tungod kay kini nawala o nadaot, mahimo nimong itandi kana nga kasinatian ngadto sa pagpahiuli sa Manluluwas sa Iyang Simbahan. Tabangi sila sa pagpangita og piho nga mga butang nga gihisgotan sa pamahayag sa Pagpahiuli nga gipahiuli sa Manluluwas.

“Abli ang kalangitan.”

• Sa paghulagway unsa ang gipasabot sa hugpong sa mga pulong “abli ang kalangitan”, tingali mahimo kang mopakigbahin og mensahe ngadto sa imong mga anak, una luyo sa sirado nga pultahan ug dayon sa usa ka abli nga pultahan. Papuli-puliha usab sila sa pagpakigbahin og mensahe. Unsa nga mga mensahe nga si Jesukristo aduna alang kanato? Unsa nga mga kasinatian ang nakatabang kanato nga makahibalo nga abli ang kalangitan ngari kanato?

Alang sa dugang nga mga ideya, tan-awa ang isyu karong bulana sa Higala nga magasin.