Sacred Grove [Sagrado nga Kakahoyan], ni Greg Olsen

Enero 13–19: “Ako Nakakita og usa ka Dako nga Gilis sa Kahayag”

Joseph Smith—Kasaysayan 1:1–26

Tingali makaingon ka nga ang Doktrina ug mga Pakigsaad usa ka libro sa mga tubag sa pag-ampo: kadaghanan sa sagrado nga mga pagpadayag dinhi niini nga libro miabot agi og tubag sa mga pangutana. Ang pangutana nga maoy sinugdanan niini nga tanan—ang usa ka pangutana nga nagpasiugda sa sunodsunod nga pagpadayag sa ulahing mga adlaw—gipangutana sa usa ka 14 anyos nga batang lalaki. Ang “gubat sa mga pulong ug kagubot sa mga opinyon” (Joseph Smith—Kasaysayan 1:10) nakahatag ni Joseph Smith og kalibog mahitungod sa relihiyon ug sa iyang relasyon sa Dios. Tingali nakasinati ka niana. Atong nakita ang daghang nagkasumpaki nga mga ideya ug makadani nga mga tingog sa atong panahon karon. Kon kita gusto nga mohan-ay niini nga mga mensahe ug mangita sa kamatuoran, kita makahimo sa unsay gihimo ni Joseph. Kita makahimo sa pagpangutana, pagtuon sa mga kasulatan, pagpamalandong, ug sa kataposan sa pagpangutana sa Dios. Agi og tubag ngadto sa pag-ampo ni Joseph, usa ka gilis sa kahayag ang mikunsad gikan sa langit. Ang Dios nga Amahan ug si Jesukristo mipakita ug mitubag sa iyang mga pangutana. Ang pagpamatuod ni Joseph bahin nianang milagrosong kasinatian maisugong namahayag nga si bisan kinsa “nga [kulang] sa kaalam mahimo nga mangayo sa Dios, ug makaangkon” (Joseph Smith—Kasaysayan 1:26). Kitang tanan mahimong makadawat, kon dili man usa ka langitnong panan-awon, bisan man lang usa ka klarong panan-awon, nga gidan-agan sa langitnong kahayag.

Mga Ideya alang sa Pagkat-on diha sa Panimalay ug sa Simbahan

Joseph Smith—Kasaysayan 1:5–26

Si Joseph Smith mao ang Propeta sa Pagpahiuli.

Ang katuyoan sa kasaysayan ni Joseph Smith mao ang pagpahimutang kanato “nga makahibalo sa tinuod nga mga hitabo” tungod kay ang kamatuoran mahitungod kang Joseph kanunayng gituis (Joseph Smith—Kasaysayan 1:1). Samtang nagbasa ka sa Joseph Smith—Kasaysayan 1:1–26, unsa ang nakapalig-on sa imong pagpamatuod kabahin sa iyang balaan nga tawag?

Tan-awa usab sa Mga Santos, 1:3–21.

Joseph Smith—Kasaysayan 1:5–25

Sa unsang paagi nga ako makadawat og mga tubag sa akong mga pag-ampo?

Nakasulay ka ba nga “nagkulang og kaalam” o mibati nga naglibog mahitungod sa usa ka desisyon nga gikinahanglan nimong himoon? (Joseph Smith—Kasaysayan 1:13). Ang kasinatian ni Joseph Smith niadtong 1820 mahimong magsilbi nga usa ka maayong sundanan alang sa imong kaugalingong personal nga pagpadayag. Pananglitan, samtang magsiksik ka sa Joseph Smith—Kasaysayan 1:5–25, pangitaa ang mga kasinatian nga nasinati nimo. Unsa ang imong nakat-onan mahitungod:

• Kon giunsa ni Joseph pag-andam alang sa usa ka sagradong kasinatian pinaagi sa pag-ampo? (tan-awa sa mga bersikulo 8, 11, 14–15).

• Sa tahas sa pagtuon sa kasulatan sa pagtinguha og pagpadayag? (tan-awa sa mga bersikulo 11–12).

• Kon unsa ang buhaton kon mag-atubang ka og oposisyon? (tan-awa sa mga bersikulo 15–16, 21–26).

• Sa pagdawat ug paglihok sa mga tubag nga imong madawat? (tan-awa sa mga bersikulo 18–25).

Modapit sa pagpakigbahin. Ang pagsiksik sa mga kasulatan nagdapit og mga pagdasig gikan sa Espiritu Santo. Ang pagpakigbahin niini nga mga pagdasig makadapit sa Espiritu Santo nga mohatag og pagsaksi ngadto sa uban, ingon man usab ngadto sa indibidwal kinsa mipakigbahin.

Unsa ang dugang nga mga ideya nga imong mabatonan gikan sa artikulo ni Presidente Henry B. Eyring nga “Ang Unang Panan-awon: Usa ka Sundanan sa Personal nga Pagpadayag”? (Liahona, Peb. 2020, 12–17).

Mahimo usab ka nga mangita og laing mga ehemplo diha sa mga kasulatan bahin sa mga tawo nga nakig-istorya sa Dios. Ang mga imahe diha sa Pakete sa mga Hulagway sa Ebanghelyo o ubang Dali, Sunod Kanako nga mga libro makahatag nimo og mga ideya. Sulayi og tubag ang mga pangutana nga gilista sa miagi alang sa matag ehemplo nga imong makita. Unsa nga mga kasinatian ang imong nasinati nga nakadawat og mga tubag sa pag-ampo? Unsay imong buhaton aron makatabang sa uban nga makabaton usab og maayo nga mga kasinatian?

Tan-awa usab sa Russell M. Nelson, “Paminaw Kaniya,” Liahona, May 2020, 88–92; Topics and Questions [Mga Hilisgotan ug mga Pangutana], “Personal Revelation [Personal nga Pagpadayag],” Gospel Library.

Joseph Smith—Kasaysayan 1:15–20

Si Joseph Smith nakakita sa Dios nga Amahan ug sa Iyang Anak, si Jesukristo.

Si Joseph Smith misalig nga ang Dios motubag sa iyang pag-ampo, apan wala siya magdahom nga kana nga tubag makapausab sa iyang kinabuhi—ug sa kalibotan. Samtang magbasa ka mahitungod sa kasinatian ni Joseph, pamalandongi kon sa unsang paagi nga ang mga resulta sa Unang Panan-awon nakapausab sa imong kinabuhi.

Pananglitan, ang unang Panan-awon nagpadayag og pipila ka kamatuoran mahitungod sa Dios nga Amahan ug sa Iyang Anak, si Jesukristo, nga lahi kaysa unsay gituohan sa daghang tawo sa panahon ni Joseph. Samtang magbasa ka sa Joseph Smith—Kasaysayan 1:15–20, ikonsiderar ang pagsulat sa lainlaing mga paagi sa pagkompleto sa usa ka pamahayag sama niini: “Tungod kay nahitabo ang Unang Panan-awon, ako nasayod nga …”

Unsa ang imong gibati samtang namalandong ka sa kasinatian ni Joseph ug sa tanan nga miabot tungod niini?

Tan-awa usab sa “Ask of God: Joseph Smith’s First Vision [Mangutana sa Dios: Unang Panan-awon ni Joseph Smith]” (bidyo), Gospel Library; “Unang Pag-ampo ni Joseph Smith,” Mga Himno, nu. 21.

Mangutana sa Dios: Unang Panan-awon ni Joseph Smith

Mubo nga salida nga hinimo sa Museum sa Kasaysayan sa Simbahan nga nagpakita sa Unang Panan-awon ni Joseph Smith, lakip sa mga detalye nga gikuha gikan sa matag istorya ni Joseph Smith.

Detalye gikan sa If Any of You Lack Wisdom [Kon Aduna Man Kaninyoy Nakulangan og Kaalam], ni Walter Rane

Joseph Smith—Kasaysayan 1:15–20

Nganong adunay nagkalain-laing mga asoy ang Unang Panan-awon?

Atol sa iyang kinabuhi, si Joseph Smith misulat sa iyang kasinatian diha sa Sagradong Kakahoyan sa labing minos upat ka higayon, sa kasagaran naggamit og usa ka tigsulat. Agi og dugang, pipila sa nadungog nga mga asoy sinulat sa mga tawo kinsa nakadungog ni Joseph nga naghisgot mahitungod sa iyang panan-awon. Bisan og kining mga asoy managlahi sa pipila ka detalye, depende sa tagsulat, naminaw ug kahimtang, bisan pa man kini nagkatakdo gihapon. Ug ang matag asoy nakadugang og detalye nga nakatabang kanato nga mas masabtan ang kasinatian ni Joseph Smith, sama sa upat ka Ebanghelyo sa bag-ong Tugon nga nakatabang kanato nga mas masabtan ang pangalagad sa Manluluwas.

Tan-awa usab sa Topics and Questions [Mga Hilisgotan ug mga Pangutana], “First Vision Accounts [Mga Asoy sa Unang Panan-awon],” Gospel Library.

Joseph Smith—Kasaysayan 1:21–26

Mahimo ko nga magpabilin nga tinuod sa unsay akong nahibaloan, bisan kon ang uban mosalikway kanako.

Human sa iyang talagsaong Unang Panan-awon, si Joseph Smith natural lang gusto nga mopakigbahin sa iyang kasinatian ngadto sa uban. Ang oposiyon nga iyang giatubang nakapahinganha kaniya. Samtang nagbasa ka sa iyang asoy, unsa ang nakapadasig nimo nga magpabilin nga tinuod sa imong pagpamatuod? Unsa pa ang laing mga ehemplo—gikan sa mga kasulatan, usa ka katigulangan, o sa mga tawo nga imong nailhan—nga nakahatag kanimo og kaisog sa pagpabilin nga tinuod ngadto sa espirituhanon nga mga kasinatian nga imong naangkon?

Tan-awa usab sa Gary E. Stevenson, “Pag-alima ug Paghatag sa Inyong Pagpamatuod,” Liahona, Nob. 2022, 111–14.

Alang sa dugang nga mga ideya, tan-awa ang mga isyu karong bulana sa Liahona ug sa Alang sa Kalig-on sa mga Kabatan-onan nga mga magasin.

Mga Tawo, Mga Dapit, Mga Panghitabo

• Lucy Mack Smith

• Sagrado nga Kakahoyan

• Mga Istorya sa Unang Panan-awon ni Joseph Smith

• Kristiyanong mga Simbahan sa Panahon ni Joseph Smith

Iklik dinhi aron makakita pa og dugang

Mga Ideya sa Pagtudlo sa mga Bata

Joseph Smith—Kasaysayan 1:3–14

Giandam si Joseph Smith nga mahimong propeta sa Dios.

• Ang pagkat-on mahitungod sa pagkabatan-on ni Joseph Smith makatabang sa imong mga bata nga makasabot kaniya samtang nagkat-on sila gikan sa iyang mga kasinatian. Tingali mahimo silang maggunit og hulagway ni Joseph Smith ug mopakigbahin sa unsay ilang nahibaloan mahitungod niya. Kon gikinahanglan, mahimo ka nga modugang og pipila ka kamatuoran mahitungod niya gikan sa Joseph Smith—Kasaysayan 1:3–14 (tan-awa usab sa “Kapitulo 1: Joseph Smith ug ang Iyang Pamilya,” diha sa Mga Istorya sa Doktrina ug mga Pakigsaad, 6–8, o ang katugma nga bidyo diha sa Gospel Library). Unsay nasinati ni Joseph nga nag-andam kaniya nga mahimong propeta? Unsa kaha ang giandam sa Dios nga ipabuhat kanato?

  Chapter 1: Joseph Smith and His Family: 1805–1820

Detalye gikan sa Joseph Smith’s First Vision [Unang Panan-awon ni Joseph Smith], ni Greg Olsen

Joseph Smith—Kasaysayan 1:10–13

Ang Dios makatubag sa akong mga pangutana pinaagi sa mga kasulatan.

• Ikonsiderar ang pagpakita sa inyong mga anak og lainlaing mga libro, lakip na ang mga kasulatan. Tabangi sila sa paghunahuna og mga pangutana nga matubag niini nga libro. Dayon mahimo ninyong basahon og dungan ang Joseph Smith—Kasaysayan 1:10–11 aron mahibaloan kon unsa ang mga pangutana ni Joseph Smith ug unsa ang mga tubag nga iyang nakaplagan diha sa mga kasulatan.

• Ang imong mga anak tingali makakita og mga pulong diha sa bersikulo 12 nga naghulagway kon sa unsang paagi nga ang pagbasa sa Santiago 1:5 nakaapekto ni Joseph. Dayon mahimo kamo nga mopakigbahin og mga kasinatian sa usag usa diin ang tudling sa kasulatan adunay dakong impluwensya nganha kaninyo. Mahimo usab ninyong kantahon og dungan ang usa ka kanta mahitungod sa pagbasa sa mga kasulatan, sama sa “Pagsiksik, Pamalandong ug Pag-ampo” (Songbook sa mga Bata, 66). Unsa ang gitudlo sa kanta mahitungod kon ngano nga magbasa kita sa mga kasulatan?

Joseph Smith—Kasaysayan 1:10–17

Ang Langitnong Amahan maminaw ug motubag sa akong mga pag-ampo.

• Sa pagsugod og usa ka panaghisgotan kon unsaon nato pagpakig-istorya sa Langitnong Amahan, tingali ikaw ug ang imong mga bata mahimong mangutana sa usag usa og mga pangutana gamit ang nagkalainlaing pamaagi sa komunikasyon, sama sa mensahe pinaagi sa text, usa ka tawag sa telepono, o sinulat sa kamot nga sulat. Unsaon nimo pagpangutana sa Langitnong Amahan? Unsaon nato pagpakita Kaniya nga kita nahigugma ug nagtahod Kaniya diha sa atong mga pag-ampo? Basaha og dungan ang Joseph Smith—Kasaysayan 1:16–19 ug hisgoti kon giunsa pagtubag sa Langitnong Amahan ang pag-ampo ni Joseph Smith. Ikaw ug ang imong mga anak mahimo dayon nga mopakigbahin og mga kasinatian sa dihang ikaw nangayo og tabang sa Dios ug nakadawat og tubag.

Joseph Smith—Kasaysayan 1:17–19

Si Joseph Smith nakakita sa Langitnong Amahan ug sa Iyang Anak, si Jesukristo.

• Ang mga bata tingali malingaw nga magbarog nga nagtuyhad ang mga kamot nga nagpakaaron-ingnon nga mga kahoy diha sa Sagrado nga Kakahoyan samtang mag-istorya ka nila mahitungod sa Unang Panan-awon. Hangyoa ang mga bata nga mokiling nga morag gihuyop sa hangin samtang mag-istorya ka mahitungod ni Joseph nga nag-ampo. Dayon hangyoa sila sa pagbarog nga dili maglihok ug maghilom sa higayon nga mosulti ka nila nga ang Langitnong Amahan ug si Jesus nagpakita ni Joseph.

• Ang mas magulang nga mga bata tingali malingaw sa paggamit sa usa o daghan pa nga mga hulagway niini nga latid aron mosulti nimo kon unsay ilang nahibaloan mahitungod sa Unang Panan-awon. Awhaga sila sa pagtan-aw sa Joseph Smith—Kasaysayan 1:14–17 ug sa pagpakigbahin sa ilang mga hunahuna ug mga pagbati mahitungod sa kasinatian ni Joseph (tan-awa usab sa “Kapitulo 2: Unang Panan-awon ni Joseph Smith,” diha sa Mga Istorya sa Doktrina ug mga Pakigsaad, 9–12, o ang katugma nga bidyo diha sa Gospel Library).

  Chapter 2: Joseph Smith’s First Vision: 1820

Alang sa dugang nga mga ideya, tan-awa ang isyu karong bulana sa Higala nga magasin.

Truth Restored [Ang Kamatuoran Gipahiuli], ni Leon Parson