Ang Unang Panan-awon: Usa ka Sundanan sa Personal nga Pagpadayag

Ni Presidente Henry B. Eyring

Ikaduhang Magtatambag sa Unang Kapangulohan

Si Propeta Joseph Smith mitudlo gikan sa iyang kasinatian sa Sagradong Kakahoyan kon sa unsang paagi kita makadawat og personal nga pagpadayag isip kabahin sa atong inadlaw-adlaw nga kinabuhi.

Ang ika-200 nga anibersaryo sa unsay atong gitawag nga “Unang Panan-awon ni Joseph Smith” usa ka talagsaong oportunidad alang kanato nga mapalambo ang atong pagtuo sa iyang propetikanhong misyon ug makat-on gikan sa iyang ehemplo kon unsaon sa pagpalambo sa atong kaugalingong kapasidad sa pagdawat og personal nga pagpadayag gikan sa Dios.

Sa dihang ang 14 anyos nga si Joseph Smith migawas sa kakahoyan sa Palmyra, New York, USA, nasayud siya sa iyang kaugalingon nga ang Dios makigsulti sa Iyang mga anak dinhi sa mortalidad. Mituo siya sa mga pulong nga iyang nabasa sa iyang Biblia:

“Ug kon aduna man kaninyoy nakulangan og kaalam, papangayoa siya sa Dios nga nagapanghatag ngadto sa tanang mga tawo sa madagayaon gayud ug sa walay pagpamoyboy; ug kini igahatag kaniya.

“Hinoon kinahanglan nga mangayo siya uban sa pagtuo, sa walay pagduha-duha. Kay siya nga nagaduhaduha, sama sa balud sa dagat nga ginahandos ug ginakosokoso sa hangin” (Santiago 1:5–6).

Si Joseph Smith walay kahadlok nga milihok tungod niana nga saad, sama usab kanatong tanan. Si Presidente Russell M. Nelson misulti niini mahitungod sa atong oportunidad: “Kon ang langitnong kasinatian ni Joseph Smith sa Sagrado nga Kakahoyan nakatudlo kanato og bisan unsa, kana mao nga ang mga langit abli ug nga ang Dios makigsulti sa Iyang mga anak.”¹

Ang Dios motuman sa Iyang saad nga makigsulti sa Iyang mga anak dinhi sa mortalidad kon sila mangayo ug mahimong sarang sa pagdawat niana nga komunikasyon. Si Propeta Joseph Smith mitudlo gikan sa iyang kasinatian sa Unang Panan-awon, ug gikan sa dakong baha sa pagpadayag nga miabut kaniya pinaagi sa Pagpahiuli, kon sa unsang paagi kita makadawat og personal nga pagpadayag isip kabahin sa atong inadlaw-adlaw nga kinabuhi.

“Kon kita andam na nga moduol ngadto Kaniya,” mitudlo si Joseph, “Siya andam nga moduol ngari kanato.”²

Abli Ang Kalangitan

Ang atong hagit mao ang paglihok aron atong madawat ang mga mensahe sa kamatuoran nga andam nga ipadala sa Langitnong Amahan kanato isip pagpadayag ug sa pag-ila sa unsay napadala na Niya. Ang kasinatian ni Joseph Smith naghatag og ehemplo niana. Malagmit nga gibasa niya ang basahon ni Santiago ug ubang biblikanhong basahon sa pipila ka higayon, sama sa atong nabuhat. Apan usa ka adlaw, pinaagi sa impluwensya sa Espiritu Santo, iyang naila ang mensahe nga migiya kaniya ngadto sa Sagradong Kakahoyan. Ania ang iyang istorya mahitungod sa pagkadiskubre og mensahe gikan sa Dios nga dugay nang gipadala:

“Samtang ako nanlimbasug ubos sa hilabihan nga kalisud tungod sa mga panagbangga niini nga mga nagkalain-lain nga pundok sa mga relihiyon, ako usa ka adlaw nagbasa sa Epistola ni Santiago, kapitulo uno ug ikalima nga bersikulo, nga nag-ingon: Kon hain kaninyo ang nagkulang sa kaalam, papangayoa siya sa Dios, nga naghatag sa tanan nga katawhan sa walay pagdumili, ug walay pagkasuko; ug kini ihatag ngadto kaniya.

“Wala pay bisan unsa nga tudling sa kasulatan nga mituhop uban sa labaw nga gahum ngadto sa kasingkasing sa tawo kay sa nahimo niini nga panahon ngari kanako. Kini ingon og misulod uban sa makusog nga gahum ngadto sa matag tipik sa akong kasingkasing. Ako namalandong niini pagbalik-balik, sa kasayuran nga kon adunay tawo nga nagkinahanglan og kaalam gikan sa Dios, ako mao; kay kon unsaon pagbuhat ako wala masayud, ug hangtud nga ako makaangkon og dugang pa nga kaalam nga labaw pa kay sa kaniadto nga ako aduna, niana nga panahon ako dili gayud masayud; kay ang mga magtutudlo sa relihiyon ug sa nagkalain-lain nga mga pundok misabut sa sama nga mga pulong sa kasulatan sa lain-lain nga paagi ngadto sa pagwagtang sa tanan nga pagsalig diha sa paghusay sa pangutana pinaagi sa pagdangop ngadto sa Biblia” (Joseph Smith—Kasaysayan 1:11–12).

Ang kasinatian ni Joseph Smith maoy usa ka sundanan nga atong masunod sa pag-ila og personal nga mga mensahe gikan sa Dios. Nganong ang usa ka tudling sa kasulatan miabut uban sa dakong gahum ug misulod uban sa dakong pwersa ngadto sa matag tipik sa iyang kasingkasing? Ug nganong iya kining gibalik-balik sa pagpamalandong?

Tingali adunay daghang rason nga ang Dios kusganong namulong ngadto sa batan-ong si Joseph, apan ang nag-unang rason mao nga andam na ang iyang kasingkasing.

Ang Masulub-on nga Kasingkasing Usa ka Andam nga Kasingkasing

Si Joseph adunay masulub-on nga kasingkasing tungod sa labing minos duha ka rason. Gusto siya og kapasayloan sa iyang mga sala ug mga kahuyang, diin nasayud siya nga moabut lamang pinaagi ni Jesukristo. Ug desperado siya nga masayud hain sa nagkasumpaki nga mga simbahan ang sakto ug iyang apilan.

Si Joseph andam uban sa pagtuo nga si Jesus mao ang Kristo, ang iyang Manluluwas. Uban niana nga pagtuo ug uban sa mapainubsanong kasingkasing, andam na siya. Miingon siya mahitungod sa iyang mga pagbati nianang higayona, “Nangayo ako sa Ginoo og kalooy, kay walay lain nga akong kadangpan ug kapangayoan og kalooy.”³

Andam na siya, sama nga atong mahimo, sa pag-angkon sa saad ni Santiago. Ang mga pinadayag nga miabut nagtugot sa Ginoo sa pag-usab sa kinabuhi ni Joseph ug sa pagpanalangin sa mga kinabuhi sa tanang anak sa Langitnong Amahan, ug sa ilang mga pamilya, kinsa mianhi o moanhi pa sa mortalidad.

Usa ka langitnong panalangin alang kaninyo ug kanako mao nga makakat-on kita gikan sa ehemplo ni Joseph kon unsaon sa pagdawat og kahayag ug kahibalo gikan sa Dios. Pinaagi sa pagsunod sa ehemplo ni Joseph, makadala kita og malungtarong kalipay ngadto niadtong atong gimahal ug giserbisyuhan alang sa Ginoo. Ug dayon ang ilang ehemplo makapaambit sa panalangin sa personal nga pagpadayag subay sa usa ka pagkasumpay-sumpay kansang katapusan dili nato makita apan makita sa Langitnong Amahan.

Pag-andam sa Atong Kaugalingon alang sa Pagpadayag

Ang sundanan ni Joseph sa pagpangandam sa pagdawat og personal nga pagpadayag yano ug sayon nga sundon, apan dili gayud kini usa ka hugpong sa mga lakang, ang usa pagasundan sa lain. Ikaw usa ka talagsaong anak sa Dios, busa ikaw adunay lain-laing kapasidad sa pagkat-on ug lain-laing paagi sa pagkat-on sa kamatuoran. Apan gikan sa ehemplo ni Joseph, imong makita kon sa unsang paagi ang pipila ka mga pagpadayag sa kahayag ug kamatuoran mahinungdanon sa pagpangandam sa pagdawat og padayon nga personal nga pagpadayag. Ang Ginoo nasayud niana nga kamatuoran sa dihang Iyang gihatag ang mga pag-ampo sa sakramento sa matag usa kanato isip usa ka sundanan sa pagpangandam sa pagdawat og personal nga pagpadayag pinaagi sa Espiritu Santo.

Mahimong lahi kini alang kanimo, apan kon makadungog ko sa mga pulong nga “O Dios, ang Amahan sa Kahangturan” (Doktrina ug mga Pakigsaad 20:77, 79), usa ka mainitong pagbati sa gugma moabut kanako. Ang mga pulong sa mga pag-ampo sa sakramento mipahinumdom kanako sa unsay akong gibati sa akong pagkawas gikan sa usa ka bunyaganan sa Philadelphia, Pennsylvania, USA, sa dihang otso anyos pa ko. Nasayud ako nianang higayona nga si Jesus mao ang akong Manluluwas, ug akong gibati ang kalipay nga nahimong limpyo. Usahay makahinumdom ko og usa ka dibuho [painting] Niya nga anaa sa krus ug migawas sa Iyang lubnganan. Kasagaran ang moabut kanako mao ang usa ka pagbati sa pagpasalamat ug gugma alang Kaniya.

Kon makadungog ko sa mga pulong nga mosaksi ko sa akong kaandam nga “kanunay mohinumdom kaniya ug maghupot sa iyang mga sugo,” mobati ko og mapainubsanong panginahanglan sa paghinulsol ug pagpasaylo. Dayon, kon makadungog ko sa saad nga makabaton ko sa Iyang Espiritu uban kanako (tan-awa sa Doktrina ug mga Pakigsaad 20:77), mobati ko nga tinuod kana. Ug sa matag higayon, mobati ko og kahayag, kalinaw, ug pagsalig nga makadungog ko og gipadayag nga mga mensahe gikan sa Dios.

Ang katorse anyos nga si Joseph Smith walay mga pag-ampo sa sakramento sa dihang giandam siya alang sa personal nga mga pagpadayag nga miabut didto sa Sagradong Kakahoyan ug sa tibuok niyang kinabuhi. Apan misunod siya og sundanan nga masunod natong tanan aron mahimong sarang sa padayon nga personal nga pagpadayag:

Gitun-an niya ang mga pulong nga gipadayag na sa Dios diha sa mga kasulatan.
Gipamalandongan niya ang iyang nabasa ug gibati.
Pabalik-balik siyang mibasa sa mga kasulatan sa kanunay ug sa mainampingong paagi.
Gikan sa pagtuo nga iyang naangkon pinaagi sa pagtuon ug pagpamalandong, nakahukom siya nga mag-ampo.
Sa dihang miabut ang pagpadayag, nakadawat siya sa kamatuoran ug kahayag, misunod sa kamatuoran nga gihatag kaniya, ug nagtinguha og dugang nga kamatuoran.
Mibasa na usab siya sa mga kasulatan ug nakadawat og dugang nga pagpadayag gikan sa Dios, diin iyang gisulat.
Mipadayon siya sa pag-ampo ug pagsunod, sa ingon nakadawat pa og dugang nga kahayag ug mga instruksyon.

Gihulagway ni Presidente Nelson ang talagsaong oportunidad nga moabut samtang mosunod kita sa ehemplo ni Joseph Smith: “Sa sama nga paagi, unsa ang maabli diha kaninyo tungod sa inyong pagpangita? Unsa nga kaalam ang kulang kaninyo? Unsa ang inyong gibati nga maoy dinaliang panginahanglan nga mahibaloan o masabtan? Sunda ang ehemplo ni Propeta Joseph. Pangita og mingaw nga lugar diin kamo kanunay makaadto. Ipaubos ang inyong kaugalingon atubangan sa Dios. Ibubo ang inyong kasingkasing ngadto sa inyong Langitnong Amahan. Dangop Kaniya alang sa mga tubag ug alang sa kahupayan.”⁴

Si Satanas Mosupak sa Pagpadayag

Samtang mosunod ka sa ehemplo ni Joseph Smith, mainampingon nimong tun-an ang iyang ehemplo sa kaisug ug pagkamakanunayon. Tingali dili nimo masugatan ang pakigbatok nga iyang nasinati diha sa Sagradong Kakahoyan samtang mag-ampo ka, apan maalamon nga imo kining hinumduman. Gihulagway ni Joseph kana nga pakigbatok niini nga paagi:

“Human ako moabut sa dapit diin ako naglaraw sa pag-adto, human ako makapaniid sa akong palibut, ug nakita ang akong kaugalingon nga nag-inusara, ako miluhod ug misugod sa pagtugyan sa mga tinguha sa akong kasingkasing ngadto sa Dios. Ako wala pa gani makasugod, sa ingon, sa kalit lamang ako gipugngan sa usa ka gahum nga sa hingpit mibuntog kanako ug adunay kahibulongan nga gahum ibabaw kanako nga mao ang mipugong sa akong dila aron ako dili makasulti. Bagâ nga kangitngit ang mialirong kanako, ug kini gipakaingon ko sa makadiyut ingon og ako gitakda ngadto sa kalit nga kalaglagan.

“Apan, sa pagpanlimbasug sa akong tibuok nga mga gahum sa pagtawag sa Dios aron pagluwas kanako gikan sa gahum niini nga kaaway diin mibuntog kanako, ug niana nga higayon sa diha nga ako andam na sa pag-unlod ngadto sa pagkawalay paglaum ug pagtugyan sa akong kaugalingon ngadto sa kalaglagan—dili usa ka bunga sa hunahuna nga kadautan, apan ngadto sa gahum sa usa ka tinuod nga binuhat gikan sa dili makita nga kalibutan, kinsa nagbaton og ingon nga kahibulongan nga gahum nga ako sukad wala pa gayud makasinati diha ni bisan kinsa nga binuhat—ug dinhi niini nga higayon sa dako nga kahadlok, ako nakakita og usa ka dako nga gilis sa kahayag ibabaw gayud sa akong ulo, labaw sa kahayag sa adlaw, nga nag-anam og paubos hangtud kini midapat kanako” (Joseph Smith—Kasaysayan 1:15–16).

Kana nga makalilisang nga oposisyon, nga mipadayon sa tibuok kinabuhi ni Joseph, miabut tungod kay gusto ni Lucifer nga mapugngan ang pagpadayag nga mosangput ngadto sa Pagpahiuli sa ebanghelyo ni Jesukristo. Ang imong mga pag-ampo alang sa pagpadayag gikan sa Dios mag-atubang og mas minos nga oposisyon, apan kinahanglan ka nga mosunod sa ehemplo ni Joseph sa kaisug ug pagkamakanunayon.

Si Satanas malagmit nga mogamit og dili kaayo klaro nga mga paagi sa pagkontra sa imong mga paningkamot sa pagdawat ug paghupot og personal nga pagpadayag. Usa ka paagi mao ang iyang tuyo sa pagpadala kanimo og mga bakak, iyang pamaagi sa mini nga pagpadayag. Mosulay siya sa paghatag kanimo og mga mensahe nga gituyo aron motuo ka nga walay Dios, walay nabanhaw nga Jesukristo, walay buhing mga propeta o pagpadayag, nga nalingla si Joseph Smith, ug nga ang imong mga pagbati ug mga paghunghong sa Espiritu Santo maoy tumotumo sa “usa ka nagsalimoang nga hunahuna” (Alma 30:16).

Atakihon ka niya niana nga mga bakak, sama sa iyang pag-atake kang Joseph Smith, sa mismong higayon nga mag-ampo ka ug usab human ka makadawat og pagpadayag. Nakakaplag ako og duha ka paagi sa pag-eskapo niana nga mga pagpang-atake.

Una, ayaw gayud ilangay ang impresyon nga mag-ampo. Ayaw tuguti ang mga pagduha-duha nga makapawala sa imong kadasig. Miingon si Presidente Brigham Young (1801–77) nga ang tawo nga maghulat nga ganahan nga mag-ampo dili lagmit mag-ampo.⁵

Ikaduha, isulat dayon ang mga mensahe nga imong madawat gikan sa Dios. Akong nakaplagan nga ang espirituhanong impresyon nga klaro sulod sa usa ka minuto mahimong dili na klaro o mahanaw na paglabay sa pipila ka minuto. Bisan sa tungang gabii, nakakat-on ko sa pagbangon ug pagsulat sa mga impresyon. Kon dili man mawala ra kini.

Niini, si Joseph Smith mihatag og laing leksyon alang kanato. Gisulat niya ang kasinatian sa iyang Unang Panan-awon sa pipila ka higayon, ug gihulagway niya kini ngadto sa pipila ka tawo sulod sa katuigan. Sama sa ubang mga propeta, bisan si Propeta Joseph nakakat-on sa kaimportante, ug kalisud, sa pagrekord sa gipadayag nga kamatuoran pinaagi sa mga pulong.

Ang Pagpadayag Mopanalangin sa Atong Kaliwatan

Sama ni Joseph Smith, makapanalangin kita sa atong mga anak ug mga anak sa atong mga anak sa mga pulong sa pagpadayag nga atong madawat gikan sa Dios. Tungod kay mga indibidwal kita nga adunay talagsaon nga mga panginahanglan, tingali ang pipila lamang sa pagpadayag nga atong madawat alang sa atong kaugalingon ang magamit ngadto niadtong responsable kita ngadto sa Dios. Apan ang sinulat nga ebidensya nga ang Dios nakigsulti kanato mahimong panalangin ngadto kanila sama sa panalangin nga gihatag kanato ni Propeta Joseph Smith.

Ang Unang Panan-awon nagpakita kanato nga abli ang kalangitan. Ang Dios maminaw sa atong mga pag-ampo. Gipadayag Niya ang Iyang Kaugalingon ug ang Iyang Anak ngari kanato. Ang Espiritu Santo mamulong ngadto sa mga kasingkasing niadtong kinsa andam nga maminaw ug mobati sa ligdong, hinagawhaw nga tingog. Mahimo natong mapasa kadto nga mga leksyon ug kana nga mensahe ngadto sa atong mga gimahal ug magsunod kanato.

Salamat sa atong maloloy-on nga Amahan sa Langit, kinsa nagmahal kanato, maminaw sa atong mga pag-ampo, ug misulti mahitungod sa Manluluwas sa atong panahon, “Kini mao ang Akong Hinigugmang Anak. Paminaw Kaniya!” (Joseph Smith—Kasaysayan 1:17). Salamat ngadto ni Ginoong Jesukristo, kinsa mipahiuli sa Iyang Simbahan pinaagi ni Propeta Joseph Smith. Ug salamat sa Espiritu Santo, kinsa mahinamon nga mahimo natong kanunay nga kauban.

Mopamatuod ko nga “Oo” ang tubag sa pag-ampo sa bata:

Amahan namo, naa ba gyud ka?

Sa pag-ampo sa bata naminaw ka ba?⁶

Mag-ampo ko nga kita, sama sa gibuhat ni Propeta Joseph Smith ug gibuhat usab sa atong buhing propeta karon, modawat sa pagdapit gikan sa atong mahigugmaong Langitnong Amahan, gikan sa atong Manluluwas, ug gikan sa Espiritu Santo sa pagdawat sa kahayag ug kamatuoran sa personal nga pagpadayag matag adlaw sa atong kinabuhi.

Background gikan sa Getty Images