Gusto Niya nga Magmalipayon Ko
Imahe gikan sa Getty Images
Sa dihang gidali ko pagdala sa emergency room tungod sa pagkadaut sa akong duha ka baga, abi nako og katapusan na kadto sa akong kinabuhi. Dili pa ko andam sa emosyonal o espiritwal aron mamatay, apan kaundangon na ang akong lawas. Lisud sa akong pamilya nga makita ako niana nga kahimtang, apan nagpabilin silang malig-on, ug napanalanginan ko nga naluwas.
Wala matapos didto ang akong mga panglimbasug. Sukad niadto, kinahanglan akong magpakabuhi nga usa ra ang magamit nga baga ug nagbaliko ang buko-buko. Ang matag adlaw sakit ug lisud. Kausa naghunahuna ko nga mas maayo pa nako nga mamatay kay sa magpadayon sa pag-antus. Mibati ko og kaluya, dili lang sa pisikal, apan sa mental ug espiritwal usab. Nawad-an ko sa paglaum ug pagsalig. Gisalikway nako ang mga tawo sa akong kinabuhi kinsa midasig kanako. Apan ang akong pamilya wala gayud mawad-i og paglaum kanako. Gipangga ug giatiman ko nila, ug ang akong mga higala padayon nga misuporta kanako. Bisan pa man, gibati gihapon nako nga ang akong kaugmaon dili na sama kanindot sa akong gihunahuna.
Usa ka gabii mibati ko og hilabihan nga kaguol. Nakahukom ko nga kinahanglan nakong basahon ang akong patriyarkal nga panalangin. Milugmaw ang mga luha sa akong mga mata sa dihang gibasa nako ang nag-unang pipila ka linya, “Ang atong Amahan sa Langit nagpangga kanimo ug nagmahal kanimo. Gusto Niya nga magmalipayon ka niini nga kinabuhi.”
Nianang higayuna, nakaamgo ko nga ang Langitnong Amahan aduna gayuy giandam nga maayo kaayong kaugmaon alang kanako ug talagsaong mga panalangin nga akong mapaabut basta mosunod lang ko sa dalan nga gusto Niya nga akong subayon.
Ang atong Amahan sa Langit nasayud nga kitang tanan manlimbasug, busa Iyang gipadala ang Iyang Anak, si Jesukristo, aron mag-antus alang kanato ug mohupay kanato. Ingon niana kadako ang Ilang gugma alang kanato. Tingali manlimbasug gihapon ko kada adlaw sa akong kinabuhi dinhi sa yuta, apan nasayud ko nga ang Ilang gugma kanunay nga anaa alang kanako ug ang Ilang mga saad matuman tanan kon molahutay ko ug mosunod Kanila.