Pagsaulog sa Pagpahiuli

Mga ideya sa sayon nga mga kalihokan alang sa mga pamilya ug ubang mga grupo

Duha ka gatus ka tuig na ang milabay, usa ka 14 anyos nga batang lalaki miadto sa kakahoyan nga adunay mga pangutana. Ang mga tubag nga iyang nadawat mihatag og paagi alang sa Pagpahiuli sa Simbahan sa Ginoo. Agig pagsaulog, ang mosunod nga mga ideya mahimong ipahaum aron magamit sa mga pamilya, mga grupo sa kabatan-onan, mga ward, o mga branch.

Musikal nga Presentasyon nga adunay Pagsaysay

Pagpili og mga kanta ug mga kasulatan nga mahimo nimong i-organisar aron masaysay ang istorya sa Pagpahiuli. Mahimong gikan kini sa Joseph Smith—Kasaysayan, ubang mga kasulatan, ug mga himno mahitungod sa Pagpahiuli gikan sa hymnbook ug sa Songbook sa mga Bata. Pagdapit og mga tawo nga motabang sa pagbasa sa mga parte ug mopasundayag sa musika. Kon mahimo, ikonsiderar ang usa ka 14 anyos nga batang lalaki nga mobasa sa mga pulong ni Joseph Smith.

Pasundayag sa Arte [Art]

Pagdapit og mga tawo nga mohimo og mga buhat sa arte mahitungod sa Pagpahiuli. Mahimong maglakip kini og mga gidibuho nga larawan [painting], mga paghulagway, eskultura, mga litrato, ug uban pa. Hangyoa sila sa pagpili og usa ka panghitabo o tema gikan sa Pagpahiuli alang sa ilang arte. Pag-iskedyul og panahon ug dapit nga mapakita kining tanan ug dapita ang uban nga motambong ug motan-aw niini.

Kalihokan sa Sagrado nga Kakahoyan

Pangita og usa ka malinawong dapit nga layo sa mga makapalinga, sama sa gibuhat ni Joseph. Ikonsiderar ang kinaiyahan nga palibut kon adunay dapit nga duol sa inyong panimalay. Basaha ang istorya ni Joseph Smith sa iyang pag-adto sa Sagrado nga Kakahoyan aron mag-ampo. Dapita ang mga partisipante sa pagpaambit kon giunsa nila pagkadawat og pagpamatuod sa Pagpahiuli sa ebanghelyo o mga kasinatian dihang ang Langitnong Amahan mitubag sa ilang mga pag-ampo.

Espesyal nga Fireside

Paghangyo og tawo nga mag-andam og presentasyon mahitungod sa Pagpahiuli. Ang mamumulong mahimong lider sa Simbahan, batid nga magtutudlo, o tawo nga adunay maayo nga background sa kasaysayan sa Simbahan. Dapita ang mga higala o silingan sa pagkat-on mahitungod sa Pagpahiuli ug unsay kahulugan niini alang kanato karon.

Gahum sa Kasulatan

Pundoka ang tanan nga dala ang ilang personal nga kopya sa mga kasulatan. Si Joseph Smith nagtuon sa mga kasulatan, nagtuo nga makakaplag siya og mga tubag. Basaha og dungan ang Santiago 1:5. Miingon si Joseph nga kini nga mga pulong misulod “uban sa makusog nga gahum ngadto sa matag tipik sa [iyang] kasingkasing” (Joseph Smith—Kasaysayan 1:12). Dapita ang mga partisipante sa pagpaambit og mga bersikulo sa kasulatan nga adunay kusganong epekto diha kanila o nga mihatag og mga tubag sa ilang mga pangutana.

Parada

Pag-organisar og yano nga parada nga dunay lain-laing mga indibidwal o mga grupo nga nagrepresentar og lain-laing mga panghitabo, gipadayag nga mga kamatuoran, o mga panalangin sa Pagpahiuli. Kon itugot sa sirkumstansya, dapita ang matag indibidwal o grupo sa pagpaambit sa kamahinungdanon sa panghitabo, kamatuoran, o panalangin nga ilang girepresentar. Tingali mahimong aduna kamoy parada alang lamang sa mga bata.

Pag-asoy og Istorya

Masaysay ba nimo ang istorya sa Unang Panan-awon ni Joseph Smith? Guntinga ang 10 ka pamahayag sa ubos, lahugaya kini, ug dayon sulayi kini sa pagbutang sa husto nga pagkahan-ay. Himoa kini nga dula pinaagi sa paghimo og daghang kopya ug tan-awon kinsa ang mauna og human o labing minos og sayop. Susiha ang inyong mga tubag pinaagi sa pagbasa sa Joseph Smith—Kasaysayan 1:7–20. Dayon pagparis-paris ug isaysay ang istorya o ipaambit ang imong pagpamatuod mahitungod niini ngadto sa usa ka higala. (Husto nga pagkahan-ay: 3, 9, 8, 5, 7, 1, 10, 6, 2, 4.)

Si Joseph nag-ampo og kusog sa unang higayon sa iyang kinabuhi.
Si Jesukristo misulti kang Joseph nga dili magpasakop sa bisan unsa nga simbahan.
Ang mga sakop sa pamilya ni Joseph miapil sa usa sa Kristiyano nga mga simbahan.
Gisultihan ni Joseph ang iyang inahan nga nasayud siya nga ang mga simbahan nga giapilan sa mga sakop sa iyang pamilya dili tinuod.
Nakahukom si Joseph nga mag-ampo ug mangayo og kaalam gikan sa Dios.
Ang Langitnong Amahan ug si Jesukristo mipakita.
Si Joseph miadto sa kakahoyan.
Si Joseph mibasa sa Santiago 1:5 diha sa Biblia.
Si Joseph naghunahuna asa nga simbahan ang tinuod.
Si Satanas miataki kang Joseph aron dili kini makasulti.

Litrato sa batang lalaki nga nagbasa sa mga kasulatan pinaagi ni Stacey Johnson

Litrato sa amahan ug anak nga lalaki nga nagtan-aw sa tablet pinaagi ni Korene Knight