Mga Young Adult
Panglantaw Niadtong Lisud ug Makasagmuyo nga mga Panahon
Litrato gikan sa Getty Images
Kitang tanan nakasinati og lisud ug makasagmuyo nga mga panahon diin mibati kita nga daw walay nahitabo nga sakto. Niana nga mga panahon tingali nakapangutana kita sa atong kaugalingon, “Nganong ako? Nganong karon man? Unsaon man nako paglahutay niini?” Maayo gani, wala kita pasagdi nga mag-inusara. Makasalig kita sa mahigugmaong giya sa atong Langitnong Amahan.
Sa batan-on pa ko, kanunay akong moreklamo ug mosukna sa kalisdanan nga akong gisinati—hangtud nga dunay nahitabo nga nakaapekto sa akong kinabuhi sa hangtud: naaksidente ko diin, sa walay swerte, hingpit nga nawala ang mga tudlo sa akong wala nga kamot. Bisan og lisud kaayo ang paglahutay niadto, kadto nga pagsulay mitudlo kanako sa pagsalig sa Langitnong Amahan. Ug, bisan pa sa tanan, nakakat-on nga mahimong malaumon ug mapasalamaton ug sa dili gayud pag-undang. Mibati ko og dako kaayong kausaban, ug akong gibati kon sa unsang paagi ang Langitnong Amahan mohatag sa Iyang gugma kanato ug mogiya kanato latas sa tanang lisud nga mga butang nga atong maagian sa kinabuhi. Mabasa nimo ang akong istorya diha sa digital nga bersyon niini nga isyu.
Sa iyang artikulo sa pahina 44, si Julieta mipahinumdom usab kanato nga mahimo kitang magmalipayon bisan taliwala sa lisud nga mga pagsulay ug motan-aw sa umaabut uban ang pagtuo. Sa pang-digital lamang nga mga artikulo, si Lydia mipahinumdom kanato sa pagpangita sa katuyoan sa atong mga pagsulay. Ang mga pagsulay maoy nagtabang kanato nga mahimong sama sa atong Langitnong Amahan. Ug diha sa pahina 48, si Brixton mipamatuod nga samtang ang Manluluwas makaayo sa atong mga samad, lakip sa mga hagit sa kahimsog sa pangisip, usahay gikinahanglan—ug OK ra gyud kaayo—nga mangayo og tabang sa uban.
Nasayud ko sa tibuok nakong kasingkasing nga matag kalisud—panahon nga mobati kita og kaguol ug kasagmuyo sa atong kinabuhi—mahimong mosangpot ngadto sa sagrado nga katuyoan ug nga kana nga katuyoan mohashas kanato ug mousab kanato aron sa umaabut mamahimo kitang hingpit sama sa Langitnong Amahan sa katapusan.
Naghigugma,
Jennifer