Unsaon nako pagkaganahan sa simbahan kon duna koy problema sa mga tawo didto?

Makakontrolar Ka sa Imong Kaugalingon Lamang

Dili nako makontrolar kadtong naglibut kanako, bisan ang ubang mga miyembro, apan makakontrolar ko sa akong kaugalingon ug unsay buhaton sa mga sitwasyon. Nakaamgo ko nga ang pag-adto sa simbahan maoy tali kanako ug sa Dios, dili tali kanako ug ni bisan kinsa. Gipahinumduman nako ang akong kaugalingon nga dili makiangayon ngadto sa Dios o sa akong kaugalingon nga mohunong sa pagsunod sa ebanghelyo.

Erica Y., edad 18, Hawaii, USA

Tahura ang Tanan

Kitang tanan adunay lain-laing mga background ug nagdako sa lain-laing paagi. Wala kita masayud kon unsay gisinati sa uban.

Logan B., edad 15, Oregon, USA

Pakigsulti sa Imong mga Lider

Dili ka kinahanglang moadto sa simbahan tungod sa usa ka tawo. Kinahanglang moadto ka tungod sa imong pagtuo diha kang Kristo. Morekomendar usab ko nga makig-istorya sa imong bishop.

Asher D., edad 15, Washington, USA

Paghigugma sama sa Gibuhat ni Jesus

Miingon si Jesukristo, “Maghigugmaay kamo ang usa sa usa maingon nga ako nahigugma kaninyo. … Ang tanang tawo makaila nga kamo mga tinun-an ko pinaagi niini” (Juan 13:34–35). Nakatabang kini nako nga makasabut nga kinahanglan akong mohigugma sa uban bisan kinsa pa sila, sama nga ang Manluluwas naghigugma kanako, bisan pa sa tanan nakong mga kakulangan ug kasaypanan.

Ema F., edad 15, Chaco, Argentina

Pagkaplag og Kalipay diha sa mga Miyembro sa Imong Ward

Bisan tuod og nanlimbasug ko sa mga pagbati sa kasakit o kalagot nga may kalabutan sa mga miyembro sa Simbahan, mas naamguhan nako kon unsa ka daghan ang mga tawo sa simbahan nga nagpakabana kanako. Nakatabang kini kanako nga maganahan sa simbahan tungod sa kalipay nga nahatag kanako sa mga miyembro sa akong ward. Kanunay nga adunay mga tawo sa simbahan nga nagmahal kanimo.

Sophia D., edad 16, Bristol, England