Lakaw ug Buhata

Ni Presidente Henry B. Eyring

Ikaduhang Magtatambag sa Unang Kapangulohan

Gipahiangay gikan sa “Salig sa Dios Dayon Lakaw ug Buhata,” Liahona, Nob. 2010, 70–73.

Sa nagdako pa ko, daghang tawo ang walay trabaho ug walay panimalay. Ang presidente sa Relief Society sa among gamay nga branch usa ka tigulangon nga babaye gikan sa Norway. Nasayud siya nga gusto sa Dios nga moatiman siya niadtong nanginahanglan. Busa nangayo siya sa iyang mga silingan og daan nga mga sinina. Iya kining gilabhan ug giplantsa. Dayon gisulod niya kini sa karton nga mga kahon sa iyang luyo nga balkon. Kon dunay magkinahanglan og mga sinina, ang iyang mga silingan moingon, “Lakaw ngadto sa balay sa unahan. Adunay babaye didto nga mohatag nimo sa unsay imong gikinahanglan.”

Kini nga sister nakakaplag sa unsay gusto sa Dios nga iyang buhaton, ug dayon iya kining gibuhat! Nakatabang siya sa gatusan ka mga anak sa Langitnong Amahan kinsa nanginahanglan.

Sa Basahon ni Mormon, si Nephi nagtudlo kanato sa pagsunod sa mga sugo sa Dios, bisan unsa pa man kini ka lisud tan-awon. Miingon siya, “Ako moadto ug mobuhat sa mga butang nga ang Ginoo nagsugo” (1 Nephi 3:7).

Imong mapakita ang imong pagsalig sa Dios kon maminaw ka Kaniya ug dayon moadto ug mobuhat sa bisan unsay Iyang gihangyo. ●

Paghulagway pinaagi ni Anthony Lewis