Ang Panalangin sa Pagpahiuli alang Kanimo

Ni Elder Dale G. Renlund

Sa Korum sa Napulog Duha ka mga Apostoles

Tungod sa gipahiuli nga ebanghelyo, mahimo ka nga makaila kon kinsa gayud ikaw ug unsay gipaabut sa Dios nga imong buhaton.

Sa musikal nga Fiddler on the Roof [Tigbiyolin diha sa Atop], ang bida, si Tevye, mihulagway og usa ka benepisyo sa mga tradisyon sa iyang komunidad, nga nag-ingon, “Ug tungod sa among mga tradisyon, ang matag usa kanamo nakaila kon kinsa siya, ug unsay gipaabut sa Dios nga iyang buhaton.”¹ Dili kinahanglang mag-agad ka sa tradisyon alang niini nga kahibalo. Tungod sa Pagpahiuli, makahibalo ka kon si kinsa ka ug unsay gipaabut sa Dios nga imong buhaton. Kon dili ka pa sigurado, ikaw adunay katungod ug obligasyon sa pag-angkon niana nga kahibalo.

200 ka tuig na sukad ang 14 anyos nga si Joseph Smith nakadawat sa unang langitnong panan-awon nga nagsugod sa Pagpahiuli. Si Joseph misulod niadto nga kakahoyan duol sa iyang panimalay sa amihanang bahin sa New York, USA, tungod kay nabalaka siya sa kahimtang sa iyang kalag ug gustong masayud hain nga simbahan ang apilan. Gusto siyang masayud kon si kinsa siya ug unsay gipaabut sa Dios kaniya. Nadawat niya ang mga tubag nga iyang gitinguha, apan daghan kaayo siya og nakat-unan nianang adlawa ug sa misunod nga 24 ka tuig. Tungod sa gipahiuli nga kamatuoran, dili lang ka mahibalo nganong gilalang ka sa Dios, apan makakat-on ka usab sa imong katapusang padulngan. Sama ni Joseph Smith, mahimo ka nga masayud sa imong kaugalingon mismo.

Kinsa Ka?

Ikaw hinigugma nga anak sa Dios, nailhan Niya ug gimahal Niya. Nakat-unan kini ni Joseph sa dihang ang Dios nga Amahan ug si Jesukristo mipakita kaniya niadtong 1820. Mirekord si Joseph, “Usa kanila misulti ngari kanako, nagtawag kanako sa akong ngalan ug miingon, nagtudlo ngadto sa lain—Kini mao ang Akong Hinigugmang Anak. Paminaw Kaniya!” (Joseph Smith—Kasaysayan 1:17).

Ang Dios nakaila kang Joseph. Mao usab kini kanimo. Ang Dios nakaila kanimo. Dugay na Siyang nakaila kanimo ug nagmahal Siya kanimo sa samang gidugayon sa Iyang pagkaila kanimo. Nasayud Siya sa imong balaang potensyal nga mouswag ug mahimaya uban Kaniya. Nagpasabut kini nga ikaw adunay potensyal nga mahimong sama Kaniya.²

“Ang Pamilya: Usa ka Pamahayag ngadto sa Kalibutan” mideklarar niining importante, gipahiuli nga kamatuoran: “Ang tanan nga mga tawo—lalaki ug babaye—gilalang diha sa hitsura sa Dios. Ang matag usa hinigugmang espiritu nga anak nga lalaki o babaye sa langitnong mga ginikanan, ug, sa ingon, ang matag usa adunay mga kinaiya sa pagkadios ug kalagmitan nga mahimong usa ka dios.”³ Kini nga kamatuoran tingali klaro kaayo alang sa dugay na nga mga miyembro sa Simbahan. Dili kaayo kini klaro alang sa daghang inila nga batid sa teyolohiyang Kristiyano kinsa mideklarar nga ang imong nag-unang katuyoan sa pagsimba, pagmanggad, ug pagtahod sa Dios ug nga ang bugtong motibo sa Dios sa paghimo kanimo mao nga aron ikaw modayeg, momanggad, ug moserbisyo Kaniya.

Pinaagi ni Joseph Smith, gipadayag sa Dios nga ang Iyang buhat ug ang Iyang himaya mao ang paghimaya kanimo, sa pagpahinabo sa imong pagka-imortal ug kinabuhing dayon.⁴ Samtang ang paghimaya kanimo mohimaya Kaniya, ang tumong ug katuyoan sa Dios mao ang pagmugna og palibut nga nagtugot kanimo sa pag-uswag. Ang katapusang resulta sa imong kauswagan posible nga malungtarong kalipay. Si Haring Benjamin mitudlo sa iyang katawhan: “Maghunahuna sa bulahan ug sa malipayon nga kahimtang niadto nga naghupot sa mga sugo sa Dios. Kay tan-awa, sila bulahan sa tanan nga mga butang, sa temporal ug sa espirituhanon; ug kon sila magpabilin nga matinud-anon hangtud sa katapusan sila pagadawaton ngadto sa langit, nga pinaagi niana sila mahimo nga mopuyo uban sa Dios diha sa usa ka kahimtang nga walay katapusan ang kalipay” (Mosiah 2:41).

Ang Dios naghunahuna sa labing maayo alang kanimo. Mabination ug mahigugmaon Siya. Nasayud Siya nga aron ikaw mouswag, kinahanglan ka nga moanhi sa yuta, makadawat og lawas, ug makakat-on sa sakto gikan sa sayop pinaagi sa imong kaugalingong kasinatian. Dili Siya gusto nga magpabilin ka nga usa ka bata o batan-on hangtud sa hangtud, ni dili Siya gusto nga mousab kanimo ngadto sa usa ka binuhat nga magsunod-sunod lang bisan wala makasabut o makat-on. Dili, gusto Niya nga mopili ka nga mosunod Kaniya ug mahingkod pinaagi sa imong mga kasinatian aron molambo ug mahimong manununod sa tanan nga anaa Kaniya.⁵ Mao kini ang imong balaanong padulngan [destinasyon].

Kini nga mga kamatuoran maoy sukaranan sa gipahiuli nga doktrina nga nasugdan nianang yano nga pag-ampo nga gipamulong ni Joseph Smith.

Unsa Ang Gipaabut sa Dios Kanimo?

Ang Dios adunay duha ka mahinungdanong butang nga gipaabut kanimo. Una, nagpaabut Siya kanimo nga makat-on ug mosunod sa Iyang plano. Ikaduha, nagpaabut Siya kanimo nga motabang sa uban nga makat-on ug mosunod sa Iyang plano.

Gitudloan ka sa plano sa Dios sa kaluwasan didto sa kinabuhi nga wala pa dinhi sa yuta ug midawat niini. Tingali dili kini sayon nga desisyon. Ang ikatulong bahin sa mga anak sa Langitnong Amahan misalikway sa plano. Apan nagtinguha ka nga moanhi sa yuta, makadawat og lawas, ug mogamit sa imong kabubut-on sa pagpili nga mosunod sa plano. Nasayud ang Dios, ug nasayud ka usab, nga kon ania dinhi sa yuta makahimo ka og mga sayop ug makasala. Kini nga mga sala permanenteng makapugong nimo sa pagpuyo diha sa presensya sa Dios gawas kon matubos ka gikan sa imong mga sala. Ang plano sa Dios nag-andam ni Jesukristo nga mahimo nimong Manunubos. Si Jesukristo mitubos sa imong mga sala ug mga sayop aron ang plano sa Dios sa kaluwasan moepekto diha kanimo.⁶ Mihimo Siya sa kinatas-ang sakripisyo aron makahimo Siya “sa pagpangayo gikan sa Amahan sa iyang mga kahigayunan sa kalooy” alang kanimo (Moroni 7:27).

Gisangkap usab sa plano sa Dios nga makabaton ka sa gasa sa kabubut-on aron masayud ka sa “maayo gikan sa dautan” (2 Nephi 2:5). Ikaw usa ka “tinugyanan” sa imong kaugalingon (tan-awa sa Doktrina ug mga Pakigsaad 58:28), nga makamao sa paghimo og mga desisyon alang sa imong kaugalingon. Apan kon mohimo ka og dili maayong mga desisyon o mga sayop, ang Dios nagpaabut kanimo nga mogamit sa imong kabubut-on aron maghinulsol. Ang paghinulsol gihimong posible pinaagi sa Pag-ula ni Jesukristo ug gikinahanglan aron mahimo ka nga limpyo sa atubangan sa Dios.⁷

Maghinulsol ka samtang modangup ka sa Dios ug magpakita og pagtuo diha ni Jesukristo. Kon maghinulsol ka, ang Pag-ula ni Jesukristo makapalingkawas kanimo gikan sa silot nga imo untang madawat. Mapakita nimo nga nakapaghinulsol ka pinaagi sa pagkahimong masulundon sa mga balaod ug mga ordinansa sa ebanghelyo. Ug, kon maghinulsol ka, mahimo ka nga putli, limpyo, ug balaan.

Sama sa gideklarar sa Dios ngadto ni Adan, “Kini mao ang laraw sa kaluwasan ngadto sa tanan nga mga tawo, pinaagi sa dugo sa akong Bugtong Anak” (Moises 6:62). Tungod sa atong pagtuo kang Kristo ug sa plano sa Langitnong Amahan, kita “motagamtam sa mga pulong sa kinabuhi nga dayon niini nga kalibutan, ug kinabuhi nga dayon sa kalibutan nga moabut, gani sa imortal nga himaya” (Moises 6:59).

Ang ikaduhang mahinungdanong butang nga gipaabut sa Dios kanimo mao ang pagtabang sa uban nga makakat-on sa Iyang plano ug motabang kanila sa pagsunod niini. Sa higayon nga imong masabtan nga ang Dios ug ang Iyang Anak, si Jesukristo, nagmahal kanimo, natural ka nga magtinguha sa pagpaambit niini nga kamatuoran ngadto sa uban. Ang pagpaambit sa ebanghelyo ni Jesukristo gitawag usab nga “pagpundok sa Israel.” Si Presidente Russell M. Nelson mimatuod:

“Akong minahal nga talagsaong kabatan-onan, gipadala kamo sa yuta niining tukma nga panahon, ang labing importanting panahon sa kasaysayan sa kalibutan, aron motabang sa pagpundok sa Israel. Walay laing panghitabo dinhi sa kalibutan karon nga mas importante kay sa niana. Walay lain nga dunay mas dakong sangputanan. Walay lain gayud.

“Kini nga pagpundok kinahanglang importante kaayo kaninyo. Kini mao ang misyon diin gipadala kamo dinhi sa yuta.”⁸

Ang pagtuman niini nga obligasyon sa pakigsaad makahatag kanimo og hingpit nga kalipay⁹ ug makatampo sa imong personal nga kaluwasan.¹⁰

Tungod kay ang ebanghelyo ni Jesukristo gipahiuli dinhi sa yuta, mahimo ka nga masayud kon si kinsa ka ug unsay gilauman sa Dios kanimo. Atong saulogon ang Pagpahiuli nga gisugdan didto sa kakahoyan duol sa umahan sa mga Smith sa amihanang bahin sa New York, 200 ka tuig na ang milabay tungod sa importanting impluwensya niini diha sa imong kinabuhi. Ang kinasingkasing nga pag-ampo ni Joseph miresulta sa daghan kaayong pagpadayag nga nagpadayon hangtud niining adlawa pinaagi sa Iyang mga Apostoles ug mga propeta. Si Jesukristo nagdumala sa Iyang Simbahan ug sa Iyang buhat dinhi sa yuta aron imong makab-ut ang imong balaanong potensyal nga mopuyo pag-usab uban sa imong Langitnong Amahan.