Ang Ginoo Adunay Lahi nga mga Plano alang Kanato
Imahe gikan sa Getty Images
Kanunay ko nga mobiya sa balay sa alas 8:00 sa buntag ug mobalik sa tungang gabii human motrabaho sa tibuok adlaw ug moeskwela sa gabii. Sa gamayng panahon nga magkauban kami sa akong bana, nga si Daniel, maglalis mi. Ngil-ad kaayo ang sitwasyon. Hapit na gayud kami magbulag.
Usa ka Dominggo sa gabii human sa usa ka argumento, miingon si Daniel, “Tingali kinahanglang mas magpaduol kita sa Dios.” Pagkasunod adlaw, samtang si Daniel nagbantay sa among anak nga lalaki diha sa balay, ang mga misyonaryo nanuktok sa among pultahan.
Sa dihang ang mga misyonaryo misugod sa pagbisita kanamo, misupak ko sa tanan nilang gitudlo. Apan human sa pipila ka diskusyon, nagsugod nga aduna kami gibati. Wala kami masayud kon unsa kadto, apan gihulagway namo kini nga “daw magic,” usa ka pagbati sa kalinaw ug panag-uyon. Nagpabilin kini bisan nakalakaw na ang mga misyonaryo. Nakaamgo kami nga gikinahanglan namo kana nga pagbati diha sa among panimalay nga mas kanunay.
Nadasig sa mensahe sa mga misyonaryo mahitungod sa kaimportante sa pamilya, si Daniel ug ako mipalambo sa among relasyon. Naglaum ko nga ang pag-eskwela mosangput sa mas maayo nga posisyon sa akong trabaho. Apan nakahukom kami nga tutokan ang among pamilya, mogahin og dugang panahon nga mag-uban, ug dugangan ang among anak. Miundang ko sa pag-eskwela, mihunong sa akong trabaho, ug mitrabaho isip sekretarya ni Daniel sa iyang pest control nga negosyo.
Wala kaabut og tulo ka bulan human sa unang pagbisita sa mga misyonaryo, nabunyagan ug nakumpirmahan kami. Nausab pag-ayo ang among kinabuhi. Misugod kami sa pagsunod sa balaod sa ikapulo. Misugod kami sa pag-ampo sa panimalay ug sa trabahoan uban sa mga empleyado ni Daniel. Misugod kami sa pagserbisyo sa Simbahan. Midako ang negosyo ni Daniel, ug kinahanglan siyang mokuha og dugang nga mga trabahante.
Usa ka tuig human sa among bunyag, miadto mi sa templo aron masilyo. Pipila ka adlaw human sa among pagkasilyo, akong nasayran nga mabdos ko.
Ang mga Dominggo lisud kanamo. Sayo nga mobiya si Daniel alang sa mga miting sa high council. Kinahanglan nakong andamon ang among tulo ka anak alang sa simbahan nga ako ra. Apan nakahimo kami sa paggahin og dakong panahon nga mag-uban sa tibuok semana. Busa bisan kon usahay magkabulag kami sa Dominggo samtang moserbisyo kami sa Ginoo, nasayud kami nga bulahan kami.
Nakaangkon kami og pagpamatuod nga kon among buhaton ang among bahin, ang Ginoo makatabang kanamo, ug ang mga panalangin moabut. Nakadawat kami og mas daghan pa kaayo kay sa among gilauman gikan sa among kaugalingong mga plano. Ang Ginoo adunay mas maayong mga butang nga gihunahuna alang kanamo.