Nagpuyo Ka Ba og Diyes Dolyares nga Kinabuhi?

Ni Bishop Gérald Caussé

Presiding Bishop

Nagtan-aw ka ba sa temporal nga bili sa mga butang o sa mahangturong bili sa mga butang?

Katuigan ang milabay, dihang presidente ko sa usa ka stake sa Paris, France, gisultihan ko nga si Presidente Gordon B. Hinckley (1910–2008) moabut sa Paris sa pipila ka adlaw ug ako ang mahimo niyang drayber. Ako siyang kuhaon sa airport ug dad-on siya sa iyang hotel aron makapahulay siya. Pagkasunod adlaw dad-on nako siya aron mohimo og pipila ka pagbisita. Usa ka pagbisita nga gusto niyang himoon mao ang pag-adto sa usa ka menteryo sa kasundalohan sa U.S., diin ang iyang igsoong lalaki, kinsa namatay sa influenza panahon sa unang Gubat sa Kalibutan, didto gilubong.

Apan sa dihang gikuha nako si Presidente Hinckley, dili kaayo siya kapoy tan-awon. Gipataas niya ang iyang sungkod ug miingon, “Presidente Caussé! Motrabaho na ta!”

Gusto niyang moadto sa menteryo diha-diha dayon. Walay swerte, nagkasabut kami sa direktor nga moadto kami sa sunod pa nga adlaw, busa sa among pag-abut, sirado kini ug walay tawo didto.

Pagkasunod adlaw, nagkapuliki kami sa buluhaton nga kami wala nay higayon sa pag-adto og balik sa menteryo. Nianang gabhiona, si Presidente Hinckley mitunol kanako og $10 (U.S.) nga kwartang papel ug miingon, “Pasensya kaayo nga wala na ko makahimo sa pag-adto sa menteryo. Magpasalamat gyud ko kon makapalit ka og mga bulak ug ibutang kini sa lubnganan sa akong igsoon.”

Mipalit ko og mga bulak, apan wala nako gamita kadto nga kwarta. Sa misunod nga Dominggo sa hapon, miadto ko uban sa akong pamilya ug mibutang sa mga bulak diha sa lubnganan. Mikuha kami og litrato sa among pamilya diha atubangan sa lubnganan uban sa tanang bulak ug gipadala kini ngadto ni Presidente Hinckley.

Anaa gihapon kanako kadtong $10 nga kwartang papel. Anaa kini sa akong kasulatan. Kon mangutana ko, “Unsa man ang bili niining kwartang papel?” kadaghanan sa mga tawo moingon, “Diyes dolyares.” Apan alang kanako, bililhon pa kini kay niana. Kining kwartang papel nagbili og diyes dolyares, apan alang kanako, bililhon kaayo kini karon. Panumduman kini sa usa ka higayon nga kauban nako ang usa ka propeta sa Dios.

Hatagi ang Imong Kinabuhi og Mahangturong Katuyoan ug Kahulugan

Sa atong kinabuhi, adunay daghang butang nga adunay limitado kaayo, temporal nga bili. Adunay daghang tawo kinsa nagpuyo sa unsay akong tawgon og “diyes dolyares” nga kinabuhi. Kini ang matang sa mga tawo nga tingali moingon, “Kaon, inom, ug paglipay, kay ugma kita mamatay” (2 Nephi 28:7).

Apan ang bili sa matag minuto sa kinabuhi dinhi sa yuta adunay dakong epekto nga molapas pa niini nga kinabuhi ngadto sa kahangturan. Ang katugbang sa kinaiya nga “kaon, inom, ug paglipay” mao ang “pagtigum kamog mga bahandi alang kaninyo didto sa langit” (Mateo 6:20).

Ania ang pipila lang ka ehemplo sa pagbutang og mahangturong bili sa mga butang:

Ang templo. Alang sa kadaghanan sa mga tawo, nindot lamang kini nga gambalay [building]. Nindot kini, apan alang kanato, kini ang balay sa Ginoo, diin makahimo kita sa pagdawat og mga ordinansa ug makahimo og mga pakigsaad nga nagtugot sa atong kinabuhi uban sa atong pamilya nga mahimong mahangturon.
Ang Basahon ni Mormon. Kadaghanan sa mga tawo moingon nga usa lang kini ka libro nga adunay nindot nga istorya. Apan alang kanato, kini ang pulong sa Dios.
Ikapulo. Kadaghanan sa mga tawo moingon, “Kwarta kana nga inyong ihatag sa inyong simbahan.” Alang kanato, dili lamang kini kwarta. Usa kini ka pagpahayag og pagtuo ug pagkamasulundon sa mga sugo sa Ginoo. Ug nagrepresentar kini sa mga panalangin nga atong madawat kon kita magmatinud-anon.
Ang Pulong sa Kaalam. Daghang mga tawo moingon nga kini mahitungod sa pisikal nga kahimsog. Tinuod kana, apan labaw pa gayud niana. Nasayud kita nga kon mosunod kita sa Pulong sa Kaalam, ang Espiritu sa Ginoo magauban kanato.
Pisikal nga kasuod sa kaminyoon. Kadaghanan sa mga tawo maghunahuna nga pisikal lamang kini nga kalipay. Apan tali sa lalaki ug babaye kinsa naminyo, ug ilabi na niadtong nasilyo sa templo, labaw pa kini niana. Mahitungod kini sa pagbaton og pamilya ug pagpahayag og gugma ug panaghiusa sulod sa kaminyoon.
Edukasyon ug trabaho. Kadaghanan sa mga tawo moingon nga mao kana ang paagi nga makabaton kita og komportable nga kinabuhi ug matubag ang mga panginahanglan sa atong pamilya. Apan nagtuo kita nga mahitungod usab kini sa pag-ugmad og kinaugalingong paningkamot, nga usa ka espirituhanong baruganan. Makahimo kita sa paggamit sa atong kabubut-on aron mahimong independente ug makatabang sa uban.

Pangita og Panag-uyon tali sa Temporal ug Espirituhanon

Ang temporal ug espirituhanong bahin sa atong kinabuhi konektado kaayo, ug kinahanglang dili nato kini sulayan sa pagbulag. Ang materyal nga mga aspeto kinahanglang moserbisyo sa mahangturong mga tumong.

Ang Ginoo miingon, “Ang tanan nga mga butang ngari kanako mga espirituhanon” (Doktrina ug mga Pakigsaad 29:34). Miingon usab Siya nga “ang tawo espiritu. Ang mga elemento walay katapusan, ug ang espiritu ug ang elemento, dili gayud mabulag, makadawat sa kahingpitan sa himaya; ug kon magkabulag, ang tawo dili makadawat sa usa ka kahingpitan sa himaya” (Doktrina ug mga Pakigsaad 93:33–34). Ang atong espiritu nga wala ang lawas dili mahimong hingpit, ug mao kana ang rason nga adunay pagkabanhaw. Ang kahimayaan anaa sa mauyonong relasyon ug panaghiusa tali sa temporal ug espirituhanon.

Paghimo og mga Desisyon uban sa Espiritu

Ang mga desisyon mahitungod sa daw temporal o materyal nga mga butang kinahanglang himoon uban sa Espiritu sa Ginoo. Ang Ginoo adunay mahangturong panglantaw. Nasayud siya sa tanan gikan sa sinugdanan hangtud sa katapusan. Hingpit Siyang nagmahal kanato—mas maayo pa kay sa atong pagmahal sa atong kaugalingon. Ang pagtinguha sa Iyang kabubut-on, kay sa atong kaugalingon, makahimo sa atong kinabuhi nga mas malipayon ug mas maayo. Mahimo kitang masayud sa Iyang kabubut-on pinaagi sa Iyang Espiritu, nga moabut pinaagi sa pag-ampo, pagbasa ug pagpamalandong sa mga kasulatan, ug pagpakitambag sa atong mga pamilya.

Busa, unsaon nato sa pagkahibalo sa Iyang Espiritu? Ang Ginoo miingon:

“Ug kana nga dili makahatag og kaayohan dili gikan sa Dios, ug iya sa kangitngit. Kana nga gikan sa Dios mao ang kahayag; ug siya nga nakadawat sa kahayag, ug magpadayon diha sa Dios, makadawat og labaw pa nga kahayag; ug kana nga kahayag mag-anam og labaw kahayag ug labaw sa kahayag hangtud sa hingpit nga adlaw.” (Doktrina ug mga Pakigsaad 50:23–24).

Sa laing pagkasulti, ang makahatag nato og kaayohan, ang makapalig-on kanato, ang makadala nato og hingpit nga kalipay, ang makamugna og kahayag sa atong kinabuhi dinasig gikan sa Dios. Usahay bisan ang atong kaugalingong mga hunahuna dinasig sa Dios.

Nakahimo ko og mga desisyon base sa espirituhanon nga mga impresyon samtang ang akong pangisip nagsulti sa pagbuhat og laing butang. Kanunay kanang napamatud-an nga mas maayo kay sa unsay gidiktar sa akong pangisip.

Sama pananglit, human ang akong asawa ug ako nakahukom nga magminyo, nagkauyon kami nga butangan og mahangturong panglantaw ang among kaminyoon—nga mahimong aktibo sa Simbahan kanunay, maminyo sa templo, ug uban pa. Kadto nga mga pagpili hilabihan nga nakapanalangin kanamo ug mitabang sa among kaminyoon nga mahimong lig-on kaayo ug malungtaron.

Sa usa ka punto sa akong kinabuhi, aduna akoy trabaho nga taas og sweldo nga may dakong responsibilidad ug dungog. Usa ka adlaw ang akong asawa miingon, “Okupado kaayo ka sa imong trabaho. Kinahanglang mag-ampo ka ug maghunahuna kon angay ba ka nga mangita og bag-ong trabaho nga makahimo kanimo nga mas makaserbisyo sa Ginoo.” Nag-ampo kami ug nakadawat og kumpirmasyon pinaagi sa Espiritu nga kinahanglang mangita ko og laing trabaho. Pero medyo nagpanagana gihapon ko og gamay. Sa dihang nag-ampo ko mahitungod niini, akong giingnan ang Ginoo sa ngalan sa bugtong kompaniya nga gihunahuna nakong trabahoan kon moundang ko sa akong trabaho.

Paglabay sa tulo ka semana, akong gikontak ang usa ka ahensya sa pangrekrut ug nainterbyu ko. Sa katapusan, ang tawo miingon nga usa sa iyang mga kliyente bag-ohay lang mihangyo og bag-ong direktor. Mao kadto ang kompaniya nga akong gisulti sa akong pag-ampo. Gamay kini nga kompaniya nga adunay bakante lamang matag 10 ka tuig o sobra pa. Usa kadto ka milagro.

Mipasiaw ko sa akong asawa, “Aduna koy maayong balita ug dili maayong balita. Ang maayong balita mao nga gidawat ko niana nga kompaniya. Ang dili maayong balita mao nga morag adunay giandam ang Ginoo alang kanako.”

Mipirma ko niana nga kompaniya pagka-Biyernes. Pagka-Sabado gitawag ko isip presidente sa stake.

Ang akong asawa ug ako mibutang og mas dakong bili sa mga pag-aghat sa Espiritu ug sa pagserbisyo sa Dios kay sa materyal nga mga panalangin o sa among intelektwal nga katagbawan o sosyal nga pasidungog. Among gitinguha ang kabubut-on sa Ginoo ug nakadawat og espirituhanong kumpirmasyon nga mamaayo ra ang tanan. Usa kadto sa labing talagsaong mga kasinatian sa akong kinabuhi.

Tan-awa ang Tinuod nga Bili

Wala gayud ako magmahay sa pagkonsiderar nga mas importante ang espirituhanon kay sa bisan unsa pang konsiderasyon. Usahay bation kini nga daw usa ka sakripisyo, apan akong nakat-unan nga sa kadugayan, kini lamang gayud ang importante. Ayaw pagpuyo og “diyes dolyares” nga kinabuhi. Ang pagpahiangay sa atong kinabuhi sa katuyoan sa atong pagpakabuhi maoy kombinasyon sa kalipay ug kamaya, dili lamang niining kinabuhia apan sa sunod nga kinabuhi.

Litrato sa mga kopya sa Basahon ni Mormon pinaagi ni Celia Jeffery