Ako Nakakita og usa ka Panan-awon

Ni Propeta Joseph Smith (1805–44)

Una nga Presidente sa Simbahan

Gikan sa Joseph Smith—Kasaysayan 1:13–17, 25.

Sa tingpamulak sa 1820, ang 14 anyos nga si Joseph Smith naghunahuna hain nga simbahan ang iyang apilan. Midangup siya sa mga kasulatan alang sa mga tubag. Sa Santiago 1:5 iyang nabasa nga kon kita nakulangan og kaalam mangayo kita sa Dios.

Sa kadugayan ako miabut sa paghukom nga ako kinahanglan nga magpabilin sa kangitngit ug sa kalibug, o ako kinahanglan mobuhat ingon sa gisugo ni Santiago, nga mao, ang pagpangutana sa Dios. …

Busa, pinasubay niini … ako miadto sa kakahoyan aron sa paghimo sa pagsulay. Buntag kadto sa usa ka matahum, maayo nga panahon, sayo sa tingpamulak sa usa ka libo walo ka gatus ug kawhaan. …

Human ako moabut sa dapit diin ako naglaraw sa pag-adto, human ako makapaniid sa akong palibut, ug nakita ang akong kaugalingon nga nag-inusara, ako miluhod ug misugod sa pagtugyan sa mga tinguha sa akong kasingkasing ngadto sa Dios. Ako wala pa gani makasugod, sa ingon, sa kalit lamang ako gipugngan sa usa ka gahum nga sa hingpit mibuntog kanako, … Bagâ nga kangitngit ang mialirong kanako, ug kini gipakaingon ko sa makadiyut ingon og ako gitakda ngadto sa kalit nga kalaglagan.

Apan, sa pagpanlimbasug sa akong tibuok nga mga gahum sa pagtawag sa Dios aron pagluwas kanako gikan sa gahum niini nga kaaway diin mibuntog kanako, ug niana nga higayon sa diha nga ako andam na sa pag-unlod ngadto sa pagkawalay paglaum ug pagtugyan sa akong kaugalingon ngadto sa kalaglagan … ako nakakita og usa ka dako nga gilis sa kahayag ibabaw gayud sa akong ulo, labaw sa kahayag sa adlaw, nga nag-anam og paubos hangtud kini midapat kanako.

… Sa diha nga ang kahayag midapat kanako ako nakakita og duha ka Personahe, kansang kahayag ug himaya dili mahulagway, nagtindog ibabaw kanako diha sa kawanangan. Usa kanila misulti ngari kanako, nagtawag kanako sa akong ngalan ug miingon, nagtudlo ngadto sa lain—Kini mao ang Akong Hinigugmang Anak. Paminaw Kaniya! …

… Ako sa tinuod nakakita og usa ka kahayag, ug sa taliwala niana nga kahayag ako nakakita sa duha ka mga Personahe, ug sila sa kamatuoran namulong ngari kanako; ug bisan pa ako gikasilagan ug gigukod sa pag-ingon nga ako nakakita og usa ka panan-awon, apan kini tinuod; … ako nakakita og usa ka panan-awon; ako nasayud niini, ug ako nasayud nga ang Dios nasayud niini, ug ako dili makalimud niini.

Usa ka Sundanan sa Pagpangita og Kamatuoran

Unsaon nato sa pagkahibalo kon unsay tinuod? Si Propeta Joseph Smith mipahiluna og sundanan nga atong masunod.

Si Joseph adunay pangutana ug mibasa sa Santiago 1:15 nga kon kita nakulangan sa kaalam mahimo kita nga mangayo sa Dios.

Ang pagpangita ni Joseph misangpot sa Pagpahiuli sa ebanghelyo ni Jesukristo. Unsa man ang sangputanan sa imong pagpangita?

Kon ikaw adunay mga pangutana, asa man ka moadto alang sa mga tubag?

Si Presidente Russell M. Nelson mipaambit kon unsaon nato pagsunod ang ehemplo ni Propeta Joseph:

“Pangita og mingaw nga lugar. Ipaubos ang inyong kaugalingon atubangan sa Dios.”
“Pag-ampo sa ngalan ni Jesukristo bahin sa inyong mga kabalaka, inyong mga kahadlok, inyong mga kahuyang—o, ang mga tinguha sa inyong kasingkasing.”
“Ug dayon maminaw!”
“Isulat ang mga ideya nga mosulod sa inyong hunahuna.”
Isulat ang inyong mga gibati ug sundi kini sa paglihok sa unsay giaghat nga angay ninyong buhaton.”

“Ang Dios buot ba gayud makigsulti kaninyo? OO!”

(Gikan sa Abril 2018 nga kinatibuk-ang komperensya.)

Mga paghulagway pinaagi ni Andrew Roberts