Mga Panalangin sa Pagbarug Pinaagi sa Kinaugalingong Paningkamot
Ang Espiritu Nakahimo sa Kalainan
Salamat sa usa ka kurso sa Self-Reliance Services ug sa giya gikan sa Espiritu Santo, si Molly Kohrman nakakaplag og kaisug sa pagsugod sa iyang kaugalingong negosyo.
Sa unsang paagi ang usa ka tawo nga gradwado sa recreational therapy ug 10 ka tuig nga kasinatian sa natad sa kahimsog sa pangisip misangput sa pag-abli og tindahan sa mga dessert nga namaligya og mabulukon nga brownies, blondies, ug ice cream?
Alang ni Molly Kohrman, ang tubag yano ra. Niadtong 2017 mikuha siya og 12 ka semana nga kurso sa Self-Reliance Services kon unsaon sa pagsugod ug pagpalambo sa imong kaugalingong negosyo. Kana nga kurso mihatag kaniya og kaisug sa pagkab-ut sa usa ka damgo.
“Mitambong ko og eskwelahan sa paghimo og pastry sa Washington, D.C., ug mitambong ko og eskwelahan sa pagpangluto didto sa Utah,” miingon siya. “Sa dihang ang akong stake miingon nga mopahigayon sila og mga klase kalabut sa pagbarug pinaagi kinaugalingong paningkamot [self-reliance class], naghunahuna ko, ‘Angay siguro nako ni nga susihon. Dugay na gyud kong gusto nga makaangkon og akong kaugalingong negosyo. Nakatambong ko og ubang mga klase nga pangnegosyo. Dili makadaut nga makat-on pa og dugang.’”
Ang kurso lahi kay sa ubang mga klase sa negosyo o pastry nga natun-an na ni Molly. Unsa ang nakapahimo niining talagsaon, miingon siya, mao ang presensya sa Espiritu Santo ug ang diwa sa panaghigalaay tali sa mga sakop sa maong kurso.
“Ang mga diskusyon sa negosyo maayo ug makatabang,” miingon siya, “apan ang espiritwal nga bahin nga gilangkob ngadto sa mga diskusyon sa negosyo mao ang nakahimo sa labing dako nga kalainan alang kanako.”
Mga Talento ug Pagduhaduha
“Miagi ko og panahon sa grabeng pagduhaduha,” miingon si Molly. “Naghunahuna ko kon ang paggamit sa tanan nakong tinigum, panahon, ug kusog aron makasugod og negosyo mao ba gayud ang labing maayo nga paggamit sa akong mga kapanguhaan sa dihang, nianang panahona, nagtrabaho ko sa usa ka posisyon nga nakatabang ko sa mga tawo nga mapugngan ang paghikog.”
Panahon sa iyang unang klase, si Molly ug ang ubang nanambong naghisgot sa tinguha sa Ginoo nga magmalampuson ang Iyang mga Santos ug mopili og panginabuhian nga makahatag kanila og kalipay. Nangutana siya sa grupo, “Unsaon ninyo pagbalanse ang paggamit sa mga talento nga gihatag kaninyo alang sa mahinungdanong mga butang batok sa paggamit sa inyong mga talento alang sa butang nga gusto lang ninyong buhaton?”
Samtang naghisgot ang grupo sa iyang pangutana, nakaamgo si Molly nga dili lang siya mamaligya og brownies. Kon magmalampuson ang iyang negosyo, makapatrabaho siya og mga tawo, aduna na siyay pinansyal nga mga kapanguhaan aron makadonar sa maayong mga kawsa, ug, sa higayon nga dili na kaayo siya daghan og buluhaton, mahimo siyang mobalik sa social work isip boluntaryo.
“Milungtad hangtud niana nga diskusyon una pa ko tinud-anay nga nakasabut. Wala dayon motuhop kana nga ideya hangtud nga nakauban nako sa usa ka kwarto ang mga tawo nga susama og panghunahuna,” miingon siya. “Anaa kami sa nagkalain-laing mga yugto sa proseso sa negosyo ug sa nagkalain-laing mga yugto sa kinabuhi, apan ang Espiritu anaa didto, ug siguradong migiya kini sa among diskusyon—sa matag klase. Nakaamgo ko nga kon gusto gayud nako nga makaangkon og akong kaugalingong negosyo, niana ang Langitnong Amahan mosuporta kanako.”
Mga Brownie ug mga Panalangin
Sa mga tunga-tunga sa iyang 12 ka semana nga kurso, si Molly misugod sa pagluto ug pagpaambit og mga brownie ngadto sa 10 ka mga miyembro sa iyang grupo sa kinaugalingong paningkamot [self-reliance group].
“Wala man hinoon sila masuko niini, ug ang pipila kanila adunay nindot kaayo nga feedback,” miingon siya. “Misugod ko sa pagsulay og lain-laing mga lami, mga frosting, ug mga sangkap. Sa pagtapos na sa klase, aduna akoy nindot kaayo nga ideya sa unsay gusto nakong buhaton.”
Miingon si Molly nga importante nga magpundok matag semana ang iyang grupo, patubagon ang usag usa alang sa sinemana nga mga pasalig, magkat-on sa unsang paagi ug kinsa ang pangayoan og tabang, ug giyahan ang usag usa ngadto sa gikinahanglan nga mga kapanguhaan.
“Sa tibuok panahon nga nagkauban kami, mibati ko nga napanalanginan ug gisuportahan sa mga tawo sa akong grupo,” miingon siya. “Ang klase mitabang nako nga makahibalo sa tanang mga butang nga kinahanglan nakong mahibaloan.”
Human ablihi ang iyang tindahan sa brownie niadtong tinglarag sa 2018, daling nadiskubrehan ni Molly nga ang pagpadagan og negosyo nagkinahanglan og mas dakong panahon kay sa iyang gihunahuna. Apan usa ka baruganan nga iyang nahinumduman gikan sa iyang klase sa pagbarug pinaagi sa kinaugalingong paningkamot padayon nga nagpanalangin kaniya.
“Naghisgot kami nga grabe na unya kaayo ang panginahanglan sa among panahon, apan makahimo og kalainan kon mogahin kami og panahon alang sa Espiritu,” miingon siya. “Akong nakita nga tinuod kana. Kon sa kalit mobati ako nga nabug-atan ug nahasol, maminaw ko sa mga kasulatan o pakigpulong sa kinatibuk-ang komperensya samtang nagtrabaho ko nga nag-inusara sa buntag, ug makatabang kini nga mas maayo ang akong bation ug mohatag kanako og kalinaw.”
Kana nga pagbati sa kalinaw, inubanan sa kahinam, kalipay, kontento nga mga kustomer, nakahimo ni Molly sa pagpadayon—bisan human sa kapoy kaayo nga mga adlaw.
“Dili ko makasugod niini nga negosyo kon wala ang tabang sa Langitnong Amahan,” miingon siya. “Ug kon wala ang tabang ug suporta sa daghang mga tawo, dili gayud kini mahimo. Usa kini ka talagsaon nga oportunidad. Dugay na nako kining gusto nga buhaton.”
Ug salamat sa iyang klase sa pagbarug pinaagi sa kinaugalingong paningkamot, “napanalanginan ko og kahigayonan nga makasulay.”
Litrato sa mga suplay nga pangluto gikan sa Getty Images