Unsaon Nako Pag-istorya ang Akong mga Anak mahitungod sa Kahimsog sa Pangisip?

Imahe

image of child with storm clouds in their mind

Mga paghulagway pinaagi ni David Green

5 ka Paagi sa Pagsugod og Sultihanay

Ang dili komportable nga mga pagbati kabahin sa kinabuhi. OK ra nga mobati usahay og kasuko, kaguol, o kabalaka. Kini nga mga pagbati wala kanunay magpasabut nga ikaw adunay nabuhat nga sayop.
Nahibalo ka kon unsaon pagtabang sa doktor kon mabali ang imong tiil? Adunay mga tawo usab kinsa makatabang sa naglagot nga mga hunahuna ug mga pagbati. Kinahanglang mangayo kita og tabang kon magkinahanglan kita niini.
Ang mga sayop kabahin sa paagi sa atong pagkat-on ug paglambo dinhi sa yuta. Walay usa nga hingpit! Ang Langitnong Amahan nagmahal kanato, bisan kon masayop kita. Gusto Niya nga kitang tanan mopadayon sa pagpaningkamot.
Ang ubang mga kalihokan—sama sa lawom nga pagginhawa, pakig-istorya sa usa ka tawo, pagdula og sports, o pagdrowing—makatabang nimo nga mas maayo ang bation kon masuko ka. Kinahanglang dili kita mobuhat og mga butang nga makapasakit sa atong kaugalingon, sa ubang mga tawo, o sa mga hayop.
Usahay ang mga tawo adunay kalagot nga mga pagbati o nahasol nga mga hunahuna nga dili mawala. Ang ubang mga tawo adunay lahi nga mga problema sa paagi nga naglihok ang ilang mga hunahuna. Dili kana ilang sayop. Kinahanglan nga magmabination ug magmatinabangon kita sa tanan ug motagad kanila sama sa paagi ni Jesukristo.

Tabang nga mga Ideya [Tips] sa Pagpakigsulti

Importante nga imong pangutan-on ang imong mga anak mahitungod sa ilang mga hunahuna ug pagbati, ug dayon maminaw og maayo. Ang mga pangutana mahimong maglakip sa: Unsa man ang gisigehan nimo og hunahuna karon? Unsa nga mga kausaban ang nahitabo sa imong kinabuhi? Nakamatikod ka ba og bisan unsang bag-ong pagbati bag-ohay lang? Aduna ka bay mga pangutana nga dugay na nimong gustong ipangutana sa usa ka tawo?
Ang mga pangutana sa imong mga anak importante. Makatabang kini kanimo nga mahibalo unsa ang andam nga makat-unan sa imong mga anak. Imbis nga kausahon ra nimo og hatag ang tanan nimong nahibaloan mahitungod sa usa ka hilisgutan ngadto sa usa ka bata, tubaga ang pangutana gamit ang sukaranan nga impormasyon. Dayon dapita sila sa pagtubag. Kon wala silay bisan unsa nga follow-up nga mga pangutana, tingali ang sukaranang impormasyon igo na sa pagkakaron. Kon duna silay dugang nga mga pangutana, tingali andam na sila alang sa dugang nga mga detalye.
Likayi ang pakiglalis sa imong anak mahitungod sa mga pagbati nga ilang gipaambit, bisan kon kadto nga mga pagbati dili motakdo sa imong panglantaw sa sitwasyon.
Usahay ang pagsulat mas sayon kay sa pagsulti. Kon dili maayo ang pag-istoryahanay, sulayi sa pagdapit ang imong anak sa pagsulat o pagdrowing sa unsay ilang gibati.

Mga Ideya para sa Kalihokan

Alang sa gagmay nga mga bata, pagdrowing og mga nawong nga nagrepresentar sa lain-laing mga pagbati ug tabangi ang imong mga anak sa pagngalan sa mga pagbati.
Paghunahuna uban sa imong mga anak og lista sa mga kalihokan nga sulayan kon naglagot sila.
Paghunahuna og tawo nga nasubo o naglisud sa ubang paagi. Unsay mabuhat sa imong pamilya aron sa pagpakita og gugma ngadto kanila?
Pagbasa ug paghisgut og mga istorya gikan sa Liahona diin ang mga miyembro sa Simbahan misinati og mga pagsulay uban ang pagtuo sa Dios.

Nagkinahanglan Ko og Tabang!

Kon imong gibati nga ang emosyon ug pamatasan sa imong anak dili makontrolar, o nabutang sa peligro ang kahimsog sa ilang pangisip, pagkontak og propesyonal sa kahimsog sa pangisip. (Adunay artikulo sa ubos nga adunay mga sugyot mahitungod niana nga proseso.) Ang imong bishop makatabang kanimo sa pagkontak sa Family Services o sa ubang mga kapanguhaan sa pagpanambag diha sa imong dapit. Gimahal ka, ug wala ka mag-inusara!