Enero 6–12: “Patalinghog, O Kamo nga mga Katawhan”

Doktrina ug mga Pakigsaad 1

Niadtong Nobyembre 1831, ang gipahiuli nga Simbahan ni Jesukristo usa pa lang ka tuig ug tunga. Bisan og nagtubo ang gidaghanon, kini nga pundok sa tumutuo wala pa kaayo mailhi nga nagpuyo sa gamay nga mga lungsod, gipangulohan sa usa ka propeta nga baynte singko kapin ang pangidaron. Apan ang Dios mikonsiderar niining mga tumutuo nga Iyang mga sulugoon ug Iyang mga mensahero, ug gusto Siya nga ang mga pagpadayag nga Iyang nahatag kanila imantala ngadto sa kalibotan.

Ang Doktrina ug mga Pakigsaad 1 mao ang pasiuna sa Ginoo, o introduksiyon, ngadto niini nga mga pagpadayag. Klaro kining nagpakita nga bisan og gamay ra ang miyembro sa Simbahan, gusto sa Dios nga ang Iyang mga Santos mopakigbahin sa tanang butang mahitungod sa mensahe. Usa kini ka “tingog sa pasidaan” alang sa tanang “lumulupyo sa yuta,” magtudlo kanila sa paghinulsol ug sa paglig-on sa “walay kataposan nga pakigsaad” sa Dios (mga bersikulo 4, 8, 22). Ang mga sulugoon nga nagdala niini nga mensahe mao “ang mahuyang ug yano.” Apan ang mapaubsanon nga mga sulugoon mao ang gitawag sa Dios—kaniadto ug karon—sa pagdala sa Iyang Simbahan “gikan sa kangiob ug gikan sa kangitngit” (mga bersikulo 23, 30).

Mga Ideya alang sa Pagkat-on diha sa Panimalay ug sa Simbahan

Doktrina ug mga Pakigsaad 1

“Patalinghog, O Kamo nga mga Katawhan.”

Ang usa ka pasiunang pahina nagpaila sa basahon. Nagtino kini sa mga tema sa basahon ug mga katuyoan ug motabang sa mga tigbasa nga maandam sa pagbasa. Samtang magbasa ka sa seksiyon 1—sa “pasiuna” sa Ginoo ngadto sa Doktrina ug mga Pakigsaad (bersikulo 6)—pangitaa ang mga tema ug mga katuyoan nga gihatag sa Ginoo alang sa Iyang mga pagpadayag. Unsa ang imong makat-onan nga makatabang kanimo sa imong pagtuon sa Doktrina ug mga Pakigsaad niining tuiga? Pananglitan, mahimo imong pamalandongan kon unsa ang kahulogan sa “maminaw sa tingog sa Ginoo” niini nga mga pagpadayag (bersikulo 14) o ang “siksika kini nga mga sugo” sa (bersikulo 37).

Tan-awa usab sa pasiuna ngadto sa Doktrina ug mga Pakigsaad.

Doktrina ug mga Pakigsaad 1:4–6, 23–24, 37–39

Ang Ginoo mamulong pinaagi sa Iyang mga sulugoon, lakip na sa mga propeta sa ulahing mga adlaw.

Ang seksiyon 1 gisugdan ug gitapos uban sa pamahayag sa Dios nga Siya mamulong pinaagi sa Iyang pinili nga mga sulugoon (tan-awa sa mga bersikulo 4–6, 23–24, 38). Isulat unsay imong nakat-onan gikan niining pagpadayag mahitungod:

• Sa Ginoo ug sa Iyang tingog.

• Kon ngano nga ang mga propeta gikinahanglan sa atong panahon karon.

Kon unsa ang imong gibati nga nadasig nga buhaton isip resulta sa unsay imong nahibaloan?

Kon kanus-a ka nakadungog sa tingog sa Ginoo pinaagi sa tingog sa Iyang mga sulugoon? (tan-awa sa bersikulo 38).

Mahimo usab ka nga maghunahuna nga ang usa ka higala nga wala mahibalo mahitungod sa buhing mga propeta nagbasa sa seksiyon 1 uban nimo. Unsa kaha ang mga pangutana sa imong higala? Asa sa mga bersikulo ang gusto nimong hisgotan ngadto sa imong higala aron matabangan siya nga makasabot sa imong gibati mahitungod sa pagbaton og mga propeta sa atong panahon karon?

Tingali interesado ka nga mahibalo nga sa dihang ang usa ka konseho sa mga elder nagmiting niadtong 1831 aron hisgotan ang mahitungod sa pagmantala sa mga pagpadayag ni Joseph Smith, ang pipila sa mga tawo misupak sa ideya. Naulaw sila sa dili kaayo hanas nga pagsulat ni Joseph, ug nabalaka sila nga ang pagmantala sa mga pagpadayag mahimong makahatag og dugang nga mga problema sa mga Santos (tan-awa sa Mga Santos, 1:161–64). Kon ikaw usa ka sakop niini nga konseho, unsaon nimo pagtubag niini nga mga kabalaka? Unsa nga mga ideya ang imong makit-an diha sa seksiyon 1 nga tingali makatabang? (tan-awa, pananglitan sa, mga bersikulo 6, 24, 38).

Ikonsiderar ang paglakip og usa ka himno sama sa “Dali, ug Paminawon Nato ang Pulong sa Propeta” (Mga Himno, nu. 15) diha sa imong pagtuon ug pagsimba. Pangitaa ang hugpong sa mga pulong diha sa himno nga nagtudlo og parehas nga mga baroganan sama sa mga bersikulo diha sa seksiyon 1.

Tan-awa usab sa Topics and Questions [Mga Hilisgotan ug mga Pangutana], “Prophets [Mga Propeta],” Gospel Library.

Ang Ginoo mamulong ngari kanato pinaagi sa Iyang mga sulugoon, ang mga propeta.

Doktrina ug mga Pakigsaad 1:12–30, 34–36

Ang Pagpahiuli nakatabang nako sa pag-atubang sa mga hagit sa ulahing mga adlaw.

Diha sa seksiyon 1 sa Doktrina ug mga Pakigsaad, ang Ginoo mipasabot kon nganong gipahiuli Niya ang Iyang ebanghelyo. Tan-awa kon pila ka rason ang imong malista samtang magbasa ka sa mga bersikulo 12–23. Sa imong kasinatian, sa unsang paagi nga natuman ang mga katuyoan sa Ginoo alang sa Pagpahiuli?

Ang Ginoo nasayod nga sa atong panahon karon adunay grabe nga mga hagit (tan-awa sa bersikulo 17). Unsa ang imong nakita diha sa mga bersikulo 17–30, 34–36 nga makatabang nimo nga mobati og kalinaw ug pagsalig bisan pa niining mga hagit?

Tan-awa usab sa Russell M. Nelson, “Hangupon ang Umaabot uban sa Hugot nga Pagtuo,” Liahona, Nob. 2020, 73–76.

Doktrina ug mga Pakigsaad 1:19–28

Ang Ginoo mogamit sa “mahuyang ug yano” aron sa pagtuman sa Iyang buhat.

Samtang magbasa ka sa Doktrina ug mga Pakigsaad 1:19–28, mahimo nimong pamalandongan kon unsay ipasabot sa pagkahimong usa ka sulugoon sa Dios. Unsa ang mga kinaiya nga gusto sa Ginoo nga mabatonan sa Iyang mga sulugoon? Unsa ang nahimo sa Ginoo pinaagi sa Iyang mga sulugoon? Sa unsang paagi nga ang mga panagna niini nga mga bersikulo natuman sa tibuok kalibotan ug diha sa imong kinabuhi?

Pangitaa si Jesukristo. Ang katuyoan sa mga kasulatan mao ang pagpamatuod sa Manluluwas ug sa Iyang ebanghelyo. Samtang magbasa ka sa Doktrina ug mga Pakigsaad 1, hunahunaa ang pagmarka o sulatan ang mga bersikulo nga magtudlo nimo og butang mahitungod kang Jesukristo.

Alang sa dugang nga mga ideya, tan-awa ang mga isyu karong bulana sa Liahona ug sa Alang sa Kalig-on sa mga Kabatan-onan nga mga magasin.

Mga Tawo, Mga Dapit, Mga Panghitabo

• Joseph Smith Jr.

• Basahon sa mga Kasugoan

• Doktrina ug mga Pakigsaad

Iklik dinhi aron makakita pa og dugang

Mga Ideya sa Pagtudlo sa mga Bata

Doktrina ug mga Pakigsaad 1:4, 37–39

Pinaagi sa Iyang mga propeta, ang Ginoo nagpasidaan nako bahin sa espirituwal nga peligro.

• Aron makasugod og panaghisgot mahitungod sa mga pasidaan gikan sa Ginoo, mahimo ka nga maghisgot mahitungod sa mga pasidaan nga atong madawat gikan sa ubang tawo mahitungod sa mga peligro nga dili nato makita. Ang pipila ka ehemplo maglakip sa dangog nga salog, umaabot nga bagyo, o nagsingabot nga sakyanan. Tingali ikaw ug ang imong mga bata mahimong motan-aw og mga ehemplo sa mga karatula sa pasidaan ug itandi kini nga mga pasidaan ngadto sa mga pasidaan nga gihatag sa Ginoo kanato. Sumala sa Doktrina ug mga Pakigsaad 1:4, 37–39, sa unsang paagi nga ang Ginoo nagpasidaan nato? Unsay Iyang gipasidaan kanato bag-ohay lang? Tingali mahimo kang motan-aw o mobasa bahin sa bag-ong mga mensahe sa kinatibuk-ang komperensiya ug mangita og mga ehemplo sa “tingog sa pasidaan” sa Dios.

• Kantaha og dungan ang usa ka awit mahitungod sa mga propeta, sama sa kataposang bersikulo sa “Sunda ang Propeta” (Songbook sa mga Bata, 58–59). Ipakigbahin ang imong pagpamatuod nga ang propeta nagsulti sa pulong sa Dios.

Doktrina ug mga Pakigsaad 1:17

Ang Pagpahiuli nakatabang nako sa pag-atubang sa mga hagit sa ulahing mga adlaw.

• Sa pag-awhag og panaghisgot mahitungod sa Doktrina ug mga Pakigsaad 1:17, ikaw ug ang imong mga bata mahimong maghanduraw nga kamo nangandam alang sa usa ka bihaye. Unsa ang inyong iimpake? Kon nakahibalo na kamo daan nga moulan o ang inyong kotse o bus mahiyosan og ligid, sa unsang paagi nga makaapekto kana sa paagi sa inyong pagpangandam alang sa pagbiyahe? Basaha og dungan ang bersikulo 17, ug hisgoti ang mahitungod sa unsay nahibaloan na sa Dios nga mahitabo kanato. Sa unsang paaagi nga Siya nangandam alang niini? (Kon gikinahanglan, ipasabot nga ang “kalamidad” usa ka kalisdanan o grabe nga butang.) Sa unsang paagi nga ang mga sugo sa Dios makatabang nato sa pagdumala sa mga hagit sa atong panahon?

Doktrina ug mga Pakigsaad 1:17, 29

Ang Ginoo mitawag ni Joseph Smith nga mahimong usa ka propeta.

• Sa pagkat-on mahitungod sa tahas ni Joseph Smith sa pagpahiuli sa ebanghelyo sa Manluluwas, ikaw ug ang imong mga bata mahimong motan-aw sa hulagway sa Manluluwas ug sa hulagway ni Joseph Smith (tan-awa ang mga hulagway dinhi niini nga latid) ug maghisgot mahitungod sa unsay gihatag sa Manluluwas ngari kanato pinaagi ni Joseph Smith. Ang imong mga bata mahimong mangita sa mga ehemplo diha sa Doktrina ug mga Pakigsaad 1:17, 29. Sultihi ang imong mga bata kon sa unsang paagi nga ikaw nahibalo nga ang Dios “mitawag sa akong sulugoon si Joseph Smith, Jun., ug namulong ngadto kaniya gikan sa langit” (bersikulo 17).

© 1998 David Lindsley

Doktrina ug mga Pakigsaad 1:30

Ang Simbahan ni Jesukristo sa mga Santos sa Ulahing mga Adlaw mao ang “tinuod ug buhi nga simbahan” sa Ginoo.

• Unsa ang ipasabot nga moingon nga ang Simbahan “tinuod ug buhi”? Aron makahunahuna ang imong mga anak mahitungod niini nga pangutana, tingali mahimo ka nga mopakita nila og buhi ug dili buhi nga mga butang—sama sa usa ka buhi nga tanom ug usa ka patay nga tanom. Unsaon nato pagkahibalo nga ang usa ka butang buhi? Dayon mahimo nimong basahon ang Doktrina ug mga Pakigsaad 1:30 ug hisgotan kon unsa ang ipasabot nga ang Simbahan “tinuod ug buhi.”

Alang sa dugang nga mga ideya, tan-awa ang isyu karong bulana sa Higala nga magasin.

Beside Still Waters [Tapad sa Tin-aw nga Katubigan], ni Simon Dewey