Doktrina ug mga Pakigsaad

Ang Doktrina ug mga Pakigsaad mao ang usa ka libro sa kasulatan nga naglangkob sa mga pagpadayag nga nahatag ngadto kang Joseph Smith ug sa pipila sa iyang mga sumusunod isip Presidente sa Simbahan. Ang Simbahan unang misulay sa pag-complile ug pagmantala sa koleksyon sa mga pagpadayag ni Joseph Smith niadtong 1833, apan ang pag-ataki sa manggugubot nga panon nakabalda sa pagmantala nianang unang koleksyon, nga gitawag og Basahon sa mga Kasugoan. Mga usa ka tuig ang milabay, si Joseph Smith ug ang ubang mga lider misugod na usab sa pag-andam sa mga pagpadayag alang sa pagmantala.¹ Ang Halangdong Konseho sa Kirtland mipili og usa ka komite nga gilangkuban sa Unang Kapangulohan ug sa Kaabag sa Presidente sa Simbahan sa pag-compile sa “mga aytem sa doktrina ni Jesukristo” gikan sa mga pagpadayag nga nahatag ngadto kang Joseph Smith ngadto sa usa ka “basahon sa mga pakigsaad.”² Ang komite mimantala niining libro niadtong 1835 nga giulohan og Doktrina ug mga Pakigsaad sa ang Simbahan sa mga Santos sa Ulahing mga Adlaw. Usa ka kinatibuk-ang kahugpungan sa Simbahan ang hiniusang gibotohan sa pagdawat niining libro isip “usa ka balaod sa simbahan” ug usa ka “lagda sa hugot nga pagtuo ug sa buhat.”³

Ang Doktrina ug mga Pakigsaad napalapdan diha sa Basahon sa mga Kasugoan sa daghang mga paagi: ang komite milakip og daghang mga pagpadayag nga wala malakip sa Basahon sa mga Kasugoan, miandam ug midugang og mga pagtulun-an sa teyolohiya, ug mipaila sa daghang ginagmay nga mga pagkoriher sa teksto. Ang ulohan, Doktrina ug mga Pakigsaad, mihulagway sa duha ka bahin sa libro. Ang una, “bahin sa doktrina sa simbahan,” nga naglangkob sa teyolohikanhong mga pagtulun-an nga sa kaulahian naila isip “Lectures on Faith.”⁴ Ang ikaduha, “Pakigsaad ug mga Kasugoan sa Ginoo,” naglangkob sa mga pagpadayag. Ang pag-compile milambo gikan sa 65 ka mga “kapitulo” diha sa Basahon sa mga Kasugoan ngadto sa 103 ka mga “seksyon” sa Doktrina ug mga Pakigsaad.⁵

Laing mga edisyon ang misunod, matag usa mipaila sa pipila ka mga kausaban ngadto sa pag-format sa volume ug paglakip og dugang nga mga pagpadayag. Sa Nauvoo, gidumala ni Joseph Smith ang usa ka edisyon nga nagdugang og pipila ka bag-ong mga seksyon ug namantala sa wala madugay human sa iyang kamatayon niadtong 1844.⁶ Ang Korum sa Napulong Duha ka mga Apostoles didto sa Britain nakakita sa panginahanglan alang sa mga British nga mga Santos nga makaangkon og access ngadto sa mga pagpadayag ug miandam og usa ka European nga edisyon aron magamit sa gawas sa nasud base sa 1844 Nauvoo nga edisyon. Ang mga gipaprinta pag-usab nga Nauvoo ug European nga mga edisyon ang gipanghatag nga mga kopya ngadto sa mga miyembro samtang nagkadako ang Simbahan, apan sa mga tuig 1870, si Presidente Brigham Young misugo ni Orson Pratt sa Korum sa Napulong Duha ka mga Apostoles sa pag-update sa Doktrina ug mga Pakigsaad. Ang 1876 nga edisyon gibahin ang matag seksyon ngadto sa mga bersikulo ug gidugangan og 26 ka bag-ong mga seksyon, naglakip sa usa ka pagpadayag bahin sa celestial nga kaminyoon, usa ka asoy sa panan-awon nilang Joseph Smith ug Oliver Cowdery ngadto ni Elijah diha sa Templo sa Kirtland, sa panagna ni Joseph sa gubat, ug mga kinutlo sa iyang mga sulat gikan sa Liberty Jail.⁷

Tulo ka edisyon sa ika-20 nga siglo mihashas ug mipalambo sa Doktrina ug mga Pakigsaad. Ang 1921 nga bersyon gitangtang ang Lectures on Faith.⁸ Ang 1981 nga edisyon gi-standardize ang mga ulohang seksyon, gihatagan og lugway ang mga cross-reference ngadto sa laing mga basahon sa kasulatan, ug gidugangann og bag-ong mga aytem, lakip ang panan-awon ni Joseph F. Smith niadtong 1918 kabahin sa kalibutan sa mga espiritu ug sa bag-ong pagpadayag ngadto ni Presidente Spencer W. Kimball sa paghatag sa priesthood ngadto sa tanang takus nga mga lalaki nga mga Santos sa Ulahing mga adlaw, nga dili igsapayan ang kaliwat.⁹ Paglabay sa panahon, dugang pagdokumento anaa na, ug niadtong 2013, ang Simbahan mimantala sa bag-ong edisyon sa Doktrina ug mga Pakigsaad uban sa mas tukma nga makasaysayanong mga pasiuna alang sa daghang mga seksyon.¹⁰

May Kalabutan nga mga Hisgutanan: Book of Commandments, Lectures on Theology (“Lectures on Faith”), Revelations of Joseph Smith