Restriksyon sa Pagkapari ug sa Templo

Sa teyolohiya ug sa pagbansay, Ang Simbahan ni Jesukristo sa mga Santos sa Ulahing mga Adlaw mihangop sa malukpanon nga tawhanong pamilya. Ang kasulatan ug mga pagtulun-an sa mga Santos sa Ulahing mga Adlaw mipamatuod nga ang Dios nahigugma sa tanan Niyang anak ug mihimo sa kaluwasan nga maanaa alang sa tanan. Ang Dios milalang sa daghang nagkalain-lain nga mga kaliwatan ug mga kagikan ug managsama ang pagtagad kanila. Sama sa giingon sa Basahon ni Mormon, “ang tanan managsama ngadto sa Dios.”¹ Ang istruktura ug organisasyon sa Simbahan nag-awhag og panagtipon sa kaliwatan. Ang mga miyembro sa Simbahan sa nagkadaiyang kaliwatan ug mga kagikan regular nga nangalagad sa panimalay sa matag usa ug nagserbisyo uban ang usag usa isip mga magtutudlo, isip mga lider sa kabatan-onan, ug sa dili maihap nga uban pang mga tahas sa ilang lokal nga mga kongregasyon. Ang maong mga gimbuhaton nakapahimo sa Ang Simbahan ni Jesukristo sa mga Santos sa Ulahing mga Adlaw nga usa ka kompleto nga nagkatipon nga tinuohan.

Bisan pa man niining moderno nga kamatuoran, sa gidugayon sa kasaysayan niini—gikan sa tunga-tunga sa 1800 hangtud sa 1978—ang Simbahan wala mo-orden og mga lalaki nga kaliwat og itom nga Aprikano ngadto sa pagkapari o mitugot sa itom nga mga lalaki o mga babaye nga moapil sa mga ordinansa sa pagtuga o pagsilyo diha sa templo.

Atol sa unang duha ka dekada sa pagkatukod sa Simbahan, pipila ka itom nga kalalakin-an ang naorden sa pagkapari. Usa niini nga kalalakin-an, si Elijah Able, miapil usab sa mga seremonya sa templo didto sa Kirtland, Ohio, ug sa wala madugay gibunyagan isip pagpuli alang sa nangamatay nga mga kaliwat didto sa Nauvoo, Illinois. Walay masaligan nga ebidensya nga adunay bisan kinsa nga itom nga kalalakin-an ang wala hatagi sa pagkapari atol sa tibuok kinabuhi ni Joseph Smith.

Niadtong 1852 si Presidente Brigham Young mianunsyo sa publiko nga ang kalalakin-an nga adunay itom nga Aprikanong kaliwatan dili na maorden sa pagkapari, bisan kon human niana ang mga itom nga katawhan nagpadayon sa pag-apil sa Simbahan pinaagi sa pagbunyag ug pagdawat sa gasa sa Espiritu Santo. Human sa kamatayon ni Brigham Young, ang misunod nga mga Presidente sa Simbahan midili sa itom nga mga miyembro sa pagdawat sa pagtuga sa templo o nga maminyo diha sa templo. Paglabay sa panahon, ang mga lider ug mga miyembro sa Simbahan mipakatap og daghang teyoriya aron sa pagpasabut sa mga restriksyon sa pagkapari ug sa templo. Wala niini nga mga pagpasabut ang gidawat karon isip opisyal nga doktrina sa Simbahan.

Samtang nagtubo ang Simbahan sa tibuok kalibutan, ang tibuok misyon niini nga “busa panglakaw kamo, ug himoa ninyong tinun-an ang tanang kanasuran”² ingon og dili na haum uban sa mga restriksyon sa pagkapari ug sa templo. Ang mga lider sa Simbahan namalandong sa mga saad nga gihimo sa mga propeta sama ni Brigham Young nga ang itom nga mga miyembro sa umaabot nga adlaw makadawat sa mga panalangin sa pagkapari ug sa templo. Niadtong Hunyo 1978, ang Presidente sa Simbahan nga si Spencer W. Kimball, ang iyang mga magtatambag sa Unang Kapangulohan, ug ang mga miyembro sa Korum sa Napulog duha ka mga Apostoles nakadawat og pagpadayag nga mibakwi sa restriksyon sa pag-orden sa pagkapari ug mihatag sa mga panalangin sa templo ngadto sa tanang takus nga mga Santos sa Ulahing mga Adlaw, kalalakin-an ug kababayen-an. Ang pamahayag sa Unang Kapangulohan kabahin sa pagpadayag gikanonisar diha sa Doktrina ug mga Pakigsaad isip Opisyal nga Pahayag 2.

Karon, ang Simbahan misalikway sa mga teyoriya nga gipakatap kaniadto nga ang itom nga mga panit usa ka timailhan nga wala kagustuhi sa Ginoo o gitunglo sa kahitas-an, o nga kini nagpakita og dili matarung nga mga binuhatan sa premortal nga kinabuhi; nga ang kaminyoon sa duha ka tawo nga gikan sa managlahing kaliwatan [race] usa ka sala; o ang mga itom o katawhan sa ubang kaliwatan o kagikan ubos sa bisan unsang paagi kay sa uban. Ang mga lider sa Simbahan karon klarong nanghimaraut sa tanang diskriminasyon sa kaliwatan [racism], kaniadto ug karon, sa bisan unsang matang. Ang mga pagtulun-an sa Simbahan nga adunay kalabutan sa mga anak sa Dios gipasabut og maayo pinaagi sa usa ka bersikulo diha sa ikaduhang basahon ni Nephi: “[Ang Ginoo] wala maglimud kang bisan kinsa nga moduol ngadto kaniya, itum ug puti, ulipon ug gawasnon, lalaki ug babaye; … ang tanan managsama ngadto sa Dios, Judeo ug Hentil.”³

Alang sa dugang nga impormasyon kabahin niini nga hisgutanan, tan-awa sa “Race and the Priesthood.”

May Kalabutan nga mga Hisgutanan: Jane Elizabeth Manning James, Elijah Able