Oliver Cowdery

Natawo sa Vermont niadtong 1806, si Oliver Cowdery mao ang ikawalo ug katapusang anak ni William ug Rebecca Fuller Cowdery. Nagdako siya sa usa ka relihiyusong pamilya nga milahutay og daghang kalisdanan panahon sa sayong bahin sa iyang kinabuhi, sama sa mga pagkapakyas sa mga pananom ug pipila ka mga pagpamalhin. Sa wala pa ang ikatulo nga adlawng natawhan ni Cowdery, namatay ang iyang inahan tungod sa tuberculosis, ang samang sakit nga sa kaulahian mokutlo sa iyang kinabuhi. Ang mga rekord nagpakita nga mipuyo si Cowdery sa mga paryente sulod sa dugay nga mga panahon samtang batan-on pa, tingali tungod sa ekonomikanhong mga rason. Samtang batan-on pa, mieskwela siya, nagtuon sa Biblia ug nakaangkon og mga kahanas sa pagsulat ug pinulongan nga nakatabang kaniya wala madugay sa iyang kinabuhi.¹

Niadtong 1828, sa dihang si Oliver Cowdery kapin sa baynte anyos pa lang og pangedaron, mibalhin siya ngadto sa kasadpang New York, diin gitanyagan siya og posisyon isip magtutudlo sa eskwelahan duol sa Palmyra. Didto nakadungog siya og mga hungihong mahitungod ni Joseph Smith ug sa bulawan nga mga palid. Ang kinaunhang sinulat nga kasaysayan ni Joseph Smith nagrekord nga ang Ginoo mipakita ngadto ni Cowdery ug “mipakita kaniya sa mga palid diha sa usa ka panan-awon ug usab sa katinuod sa buhat.”² Human mipuyo sulod sa mubong panahon uban sa mga ginikanan ni Joseph Smith sa Manchester, nakahukom siya nga mobiyahe ngadto sa Harmony, Pennsylvania, aron personal nga makigkita ni Joseph. Hapit pagkahuman dayon sa iyang pag-abut, si Cowdery misugod sa pagtrabaho isip tigsulat ni Joseph sa paghubad sa Basahon ni Mormon. Si Cowdery nakadawat og awtoridad sa pagkapari gikan sa anghelikanhong mga tigpangalagad, usa sa Tulo ka mga Saksi sa mga palid sa Basahon ni Mormon, mitabang sa pagdumala sa pagmantala sa Basahon ni Mormon, ug usa ka nag-unang miyembro sa Simbahan niadtong Abril 6, 1830. Kalabut sa iyang kalambigitan niining milagruso nga mga panghitabo, si Cowdery sa kadugayan misulat, “Ako sa kanunay motan-aw niini nga pagpakita sa kaayo sa Manluluwas uban sa katingala ug pagpasalamat samtang ako gitugutan sa paghulat.”³

Pagpahiuli sa Aaronic nga Pagkapari — Painting nga naghulagway sa pagpahiuli sa Aaronic nga Pagkapari pinaagi ni Juan Bautista. Si Oliver Cowdery nagluhod diha sa tuo.

Niadtong 1830, nangulo si Cowdery og grupo sa upat ka misyonaryo ngadto sa mga pamuy-anan sa American Indian didto sa kanhi kasadpang utlanan sa Estados Unidos. Miagi sila sa Ohio, diin ang ilang pagsangyaw misangpot sa pagdaghan sa mga pagkakabig nga nakatabang sa pag-establisar sa Kirtland isip sentro sa Simbahan.⁴ Paglabay sa duha ka tuig, gipakaslan ni Cowdery si Elizabeth Ann Whitmer. Ang magtiayon dunay unom ka mga anak, apan usa lamang ka anak nga babaye, si Maria Louise, ang nabuhi lapas sa pagkabata. Si Elizabeth ug Maria Louise namatay niadtong 1892 nga migintang lang og duha ka adlaw ug dungan nga gilubong. Si Oliver Cowdery wala nay laing kaliwat.⁵

Atol sa nag-una nga mga katuigan sa Simbahan, si Cowdery naila pag-ayo nga nagserbisyo isip ang Ikaduha nga Anciano [Elder], ang Kaabag [Assistant] nga Presidente sa Simbahan, ug kaabag nga magtatambag sa Unang Kapangulohan.⁶ Aduna usab siyay mahinungdanong tahas sa pag-andam sa mga pinadayag ni Joseph Smith aron mamantala diha sa Basahon sa mga Sugo ug, sa wala madugay, sa Doktrina ug mga Pakigsaad. Uban ni Joseph Smith ug Sidney Rigdon, giablihan ni Cowdery ang mga pultahan sa Balay sa Ginoo diha sa Kirtland niadtong 1836 ug miabi-abi sa mga Santos sa Ulahing mga Adlaw sa sesyon sa pagpahinungod. Nangulo siya sa mga kalihokan isip usa sa mga presidente sa halangdon nga pagkapari ug nakasaksi sa pagpakita ni Jesukristo ug sa anghelikanhong mga tigpangalagad diha sa templo usa ka semana human sa pagpahinungod.

Paglabay sa usa ka tuig, ang ekonomikanhong mga problema sa Kirtland, lakip ang kapakyasan sa banko sa Kirtland Safety Society, nakahimo og dakong kadaut sa panalapi ni Oliver Cowdery, ug miresponde siya pinaagi sa pagtinguha og iyang kaugalingong negosyo imbis nga mopadayon sa pagpahinungod sa iyang kabtangan ngadto sa Simbahan.⁷ Si Cowdery dugang nga mihagit sa mga lider sa Simbahan pinaagi sa pag-akusar kanila nga wala tarunga ang pagdumala sa mga pundo ug pinaagi sa pagpakatap og mga hungihong nga si Joseph Smith nakahimo og pagpanapaw.⁸ Pagka-1838, mihangyo si Joseph sa halangdong konseho sa pag-imbistigar sa mga alegasyon ni Cowdery. Ang konseho sa katapusan nagpundok ug mikonsiderar og pipila ka mga kaso batok kang Cowdery, sa katapusan mibotar sa pagsuporta sa kadaghanan niini ug sa pag-excommunicate kang Cowdery.⁹ Usa ka pinadayag sa wala madugay misugo nga pulihan ni Hyrum Smith si Cowdery isip Kaabag nga Presidente sa Simbahan.¹⁰

Gigahin ni Cowdery ang misunod nga pipila ka tuig sa pagtuon ug pagpraktis sa balaod sa Kirtland, sa katapusan gidawat isip usa ka abogado sa Ohio Bar. Mibalhin dayon siya og sento saysenta ka kilometro padulong sa kasadpan ngadto sa Tiffin, Ohio, diin mipadayon siya sa pagtrabaho isip abogado sa misunod nga pito ka tuig. Samtang anaa sa Tiffin, nakigsinulatay siya sa mga Santos sa Ulahing mga Adlaw kinsa naglaum nga mahiusa siya og balik sa Simbahan. Ang igsoon ni Brigham Young (ug bayaw ni Cowdery) nga si Phineas Young mibisita ni Cowdery ug nasayran nga “dako siya og tinguha nga makauban ang iyang karaan nga mga higala.”¹¹ Sa pagkadungog niini ug uban pa nga mga taho, giawhag ni Joseph ang Korum sa Napulog Duha sa pagdapit ni Cowdery nga mobalik ngadto sa pakigdait. Gisultihan ni Cowdery ang mga sakop sa Napulog Duha nga ang iyang dili maayong pagbati resulta sa dakong bahin sa agresibo nga mga Santos sa Ulahing mga Adlaw sa Missouri nga nanghulga kaniya ug dili gikan sa bisan unsa nga personal nga pagduhaduha sa mga Apostoles o ubang mga lider.¹² Nanghinaut si Cowdery nga ang iyang namantala nga pagpamatuod sa Basahon ni Mormon dili maapektuhan sa iyang mga kapakyasan ug reputasyon. Sulod sa mubong panahon, masabut nga daw moipon og balik si Cowdery sa mga Santos sa Nauvoo. Nadawat ug nabasa ni Joseph Smith ang sulat gikan ni Cowdery pipila ka oras sa wala pa siya patya diha sa Bilanggoan sa Carthage.¹³

Pagka-1847, si Cowdery mibalhin ngadto sa Wisconsin, nanghinaut nga ang kausaban sa klima makaayo sa iyang panglawas. Didto milansad siya sa asembliya sa estado apan napildi og 40 ka boto sa eleksyon ug diha-diha dayon mihunahuna nga moapil sa mga grupo sa Mormon nga mga pioneer nga milalin ngadto sa Utah. Si Cowdery namulong sa komperensya sa duol nga Iowa ug mipasalig sa iyang suporta ngadto sa Korum sa Napulog Duha. Paglabay sa pipila ka adlaw, ang Halangdong Konseho mibotar sa pagdawat og balik ni Cowdery ngadto sa hingpit nga pakigdait. Si Orson Hyde sa Korum sa Napulog Duha ka mga Apostoles mibunyag og usab, mikumpirma og usab, ug mi-orden og usab ni Cowdery, kinsa miplano dayon nga makighiusa og balik sa mga Santos sa Utah. Hinoon, padayon nga nagkagrabe ang iyang panglawas ug namatay siya niadtong 1850 sa wala pa siya makabiyahe padulong sa kasadpan.¹⁴