“Mga Miting sa Sakrament,” Mga Hisgutanan sa Kasaysayan sa Simbahan
Mga Miting sa Sakrament
Mga Miting sa Sakrament
Sa dihang naorganisar na ang Simbahan niadtong 1830, ang pagpadayag ngadto ni Joseph Smith nagsugo “nga ang simbahan nagkatigum kanunay sa pag-ambit sa pan ug bino, sa paghinumdom sa Ginoong Jesus” ug usab gikatakda nga mao kadto ang katungdanan sa mga anciano (elders) ug sa mga pari aron sa pagpangalagad sa sakrament sumala sa gihulagway diha sa Basahon ni Mormon.1 Busa, ang sakrament gihatag atol sa pagsugod nga miting sa Simbahan niadtong Abril 6, 1830—Martes—diha sa panimalay ni Peter Whitmer Sr. sa Fayette Township, New York.2
Wala kadto maklaro nianang panahona kon diin o pila ka higayon ang mga Santos sa Ulahing mga Adlaw kinahanglan magkatigum, wala usab maklaro kon kanus-a ug unsaon gayud nila pagpahigayon ang sakrament. Sukad nianang unang miting, ang mga pamaagi sa mga Santos sa Ulahing mga Adlaw sa pagtuman sa sugo sa panagtigum aron madawat ang sakrament nagkalain-lain depende sa ilang mga kahimtang ug giya sa mga lider sa Simbahan.
Sinema nga mga Miting
Bisan og ang kadaghanan sa mga American Protestant sa ika-19 nga siglo mihatag og bili sa Igpapahulay, dili ang tanan nanambong sa simbahan. Pipila sa mga denominasyon, sama sa mga Presbyterian ug mga Congregationalist, kasagaran nga magkatigum sa Dominggo diha sa mga kapilya. Ang uban, sama sa mga Methodist, mga Baptist, o kadtong nagpabilin nga wala nagpasakop sa usa ka partikular nga sekta, sa kanunay dili pormal nga magsimba diha sa ilang kaugalingong mga panimalay, mitambong og mga panagtigum sa gagmayng grupo, o miapil sa dagko nga mga relihiyusong kalihokan kon kini mahitabo.3
Ang labing unang mga Santos walay mga kapilya, mao nga magpundok sila aron sa pagsimba, pagsangyaw, ug pagkanta bisan asa man sila. Sa sinugdanan, wala sila mopahigayon og sinemana nga sakrament, apan gihimo ang ingon sa mga okasyon sama sa mga komperensya sa Simbahan nga kada tulo ka bulan ug sa mga kumpirmasyon nga mga panagtigum. Ang mga rekord sa mga Santos sa Ulahing mga adlaw una nga naghisgut sa sinemana nga pagsunod sa sakrament niadtong Agosto 1831, sa dihang ang usa ka pagpadayag nagtudlo nga ang mga Santos “kansang mga tiil nagbarug ibabaw sa yuta sa Zion”—nagpasabut sa Independence, Missouri—kinahanglan “moadto sa balay alampoanan ug mohalad sa inyong mga sakramento diha sa akong balaan nga adlaw.”4 Samtang nagpaabut sa pagtukod sa usa ka balay nga kasimbahan, hinoon, mipadayon sila sa pagtigum diha sa ginagmay nga grupo kon itugot sa panahon.5
Uban sa pagkakompleto sa Templo sa Kirtland niadtong 1836, ang mga Santos sa Ulahing mga Adlaw mihalad sa sakrament sa kada semana. Nahitabo kini atol sa duha ka miting sa Dominggo nga bukas ngadto sa tibuok komunidad—usa sa dili pa ang paniudto ug ang usa pagkahuman sa paniudto sa hapon.6 Sa Nauvoo, ang mga Santos managtigum diha sa tibuok siyudad nga panagpundok-pundok sa gawas panahon sa Igpapahulay, nga kasagaran liboan ka mga Santos ang manambong.7 Sa mas gagmay nga mga branch, ang mga misyonaryo ug mga miyembro regular nga magkatigum sa mga panimalay alang sa mga panagtigum sa pag-ampo, panagtigum sa pagsangyaw, ug sa pag-ambit sa sakrament. Kini nga mga panagtigum kanunayng gipahigayon diha sa Igpapahulay apan usahay mahitabo atol sa semana.8
Kon mausab ang mga sirkumstansya, ang mga Santos mopahiangay sa ilang mga estilo sa pagsimba. Ang mga balay-tigumanan nga natukod diha sa Utah atol sa buhi pa si Brigham Young dili makapaigo sa tanan sa samang higayon. Ang mga hamtong sagad magkatigum niining mga gambalay sa Dominggo; ang kabatan-onan ug kabataan kasagaran makaambit sa sakrament sa mga miting sa auxiliary atol sa semana. Alang sa dakong bahin sa ika-19 nga siglo, ang puasa ug mga tigum sa pagpamatuod gipahigayon sa unang Huwebes sa matag bulan. Samtang nagkadaghan ang natukod nga mga balay-tigumanan ug ang mga gidak-on sa ward nausab na ngadto sa kapasidad sa usa ka balay-tigumanan, ang mga Santos sa tanang edad mahimo nang magkatigum sa matag Dominggo.9
Niadtong 1980, aron maminusan ang pagbiyahe sa mga miyembro, gihiusa sa mga lider sa Simbahan ang sakrament, Sunday School, ug korum ug mga miting sa auxiliary sa ward, ngadto sa tulo ka oras panahon sa Igpapahulay. Kon sa mga kahimtang nga gikinahanglan, kini nga mga panagtigum sa Igpapahulay gihimo sa laing adlaw sa semana gawas sa Dominggo. Pananglitan, ang Simbahan nag-obserbar sa Igpapahulay sa Biyernes o Sabado didto sa Tunga-tungang Silangan [Middle East] ug mopahigayon og mga panagtigum sa branch sa daghan nga mga adlaw sa semana sa Hong Kong aron mahatagan ang mga trabahante sa lain-laing mga nasud og oportunidad sa pag-apil sa mga sakrament service.10
Ang Sakrament
Samtang si Joseph milakaw aron sa pagpalit og bino aron magamit sa pagpahigayon sa sakrament sa usa ka miting niadtong Agosto 1830, iyang gikahinagbo ang usa ka langitnong mensahero ug mitudlo kaniya sa paggamit lamang sa bino nga ginama sa mga lokal nga mga miyembro sa Simbahan alang sa sakrament.11 Ang Ginoo padayon nga mitudlo niining pagpadayag nga “dili igsapayan unsa ang imong kan-on o unsa ang imong imnon kon ikaw moambit sa sakramento, kon kini mao ang ikaw mobuhat niini uban sa bug-os nga tinguha ngadto sa akong himaya.”12 Sa pagsunod niining pagpadayag, ang mga Santos sa una migamit og bino nga ilang hinimo alang sa ordinansa: pananglitan, si Elizabeth Ann Whitney, ang asawa ni bishop Newel K. Whitney, mitanyag sa iyang hinimo nga red currant nga bino alang sa sakrament didto sa Kirtland.13 Ang bino alang sa sakrament gianam sa pagpuli og tubig paglabay sa panahon sa ika-19 nga siglo.14
Ang gidaghanon sa pan nga gigamit sa mga sakrament service nausab paglabay sa panahon. Sa espesyal nga okasyon sama sa pagpahinungod sa templo atol sa ika-19 nga siglo, ang mga Santos usahay mokaon og pan ug miinom sa bino o tubig hangtud nga sila mabusog, sumala sa gihulagway sa 3 Nephi.15 Si Nancy Naomi Alexander Tracy mihisgut kon giunsa, sa pagsaulog sa pagpahinungod sa Templo sa Kirtland, nga ang mga elder “moadto sa mga kabalayan, mopanalangin sa mga Santos ug mopahigayon sa sakrament. Gihatag ang mga piyesta. Tulo ka mga pamilya giusa ug mopahigayon og usa sa among balay. Magluto kami og daghang pan.”16
Sa Simbahan sa una, ang mga hamtong nga kalalakin-an kasagaran mopanalangin sa sakrament ug ang mga babaye maoy mohatag sa pan, bino, ug mga hapin sa lamesa. Niadtong mga 1870 ang mga lider sa Simbahan misugod sa pag-orden og mga batan-ong mga kalalakin-an ngadto sa katungdanan sa Aaronic Priesthood, ug ang batan-ong mga teacher ug mga deacon gitahasan sa pagpang-apud-apud sa mga timaan sa sakrament ngadto sa kongregasyon. Ang mga sakop sa Bishopric ug ubang mga hamtong nga naghupot sa priesthood mipadayon sa pagpahigayon diha sa lamesa sa sakrament hangtud sa sayo nga bahin sa 1900, sa dihang ang batan-ong mga priest—agig dugang ngadto sa hamtong nga mga naghupot sa priesthood—misugod sa pagpanalangin sa pan ug tubig.17 Niadtong 1950, ang mga lider sa Simbahan mirekomendar nga ang mga teacher mahimong mahatagan og responsibilidad sa pag-andam sa lamesa sa sakrament.18
Kinulit nga naghulagway sa pagpasa sa “komon nga kopa” atol sa ika-19 nga siglo sa sakrament service didto sa Tabernakulo sa Siyudad sa Salt Lake.
Sugod niadtong 1911, alang sa katuyoan sa kalimpyo, ang “komon nga kopa” sa bino o tubig nga kanhi gipasa sa tibuok kongregasyon gipulihan sa gagmay, nga tinagsa-tagsa nga kopa sa sakrament.19 Niadtong 1946, sa kabalaka nga ang tradisyon sa paghatag og wali ug mga pasundayag sa musika dungan sa sakrament service makabalda, ang Unang Kapangulohan mitudlo sa mga miyembro sa pagtamod og balaang pagtahod, mapalandungon nga kahilom atol sa ordinansa.20
Ang mga Santos sa Ulahing mga Adlaw sa kontemporaryo nga kongregasyon miambit sa sakrament.
“Ang ordinansa sa sakrament,” gitudlo kaniadto ni Elder Dallin H. Oaks niadtong 2008, “nakahimo sa miting sa sakrament nga labing sagrado ug importanting miting sa Simbahan.”21 Busa, niadtong 2015, ang mga lider sa Simbahan mipatawag og usa ka pagbag-o sa paghatag og gibug-aton sa pagsimba sa Igpapahulay nga gisentro sa pag-ambit sa sakrament sa Panihapon sa Ginoo.22
May Kalabutan nga mga Hisgutanan: Wards and Stakes, School of the Prophets