Unang Kapangulohan

Sa dihang giorganisar ni Joseph Smith ang Simbahan niadtong Abril sa 1830, usa ka pagpadayag ang nagtawag kaniya nga “usa ka manalagna, ug Maghuhubad, ug Propeta, usa ka Apostol ni Jesukristo, usa ka Anciano [Elder] sa Simbahan.”¹ Sumala pa, ang mga miyembro sa Simbahan mipaluyo ni Joseph isip unang anciano ug si Oliver Cowdery isip ikaduha nga anciano, ang labing unang mga titulo alang sa mga lider sa Simbahan. Niadtong Nobyembre 1831, laing pagpadayag ngadto ni Joseph Smith ang nagtukod sa buhatan sa “presidente sa high priesthood.” Kini nga presidente “mahisama ngadto kang Moises” ug “mamahimong usa ka Manalagna, usa ka tigpadayag, usa ka maghuhubad, ug usa ka propeta, makaangkon sa tanan nga mga gasa sa Dios diin siya mihatag diha sa pangulo sa simbahan.”² Atol sa usa ka komperensya niadtong Enero 25, 1832, si Joseph Smith natawag nga presidente sa high priesthood.³

Mga unom ka bulan human sa tawag ni Joseph Smith, mipili siya og duha ka lalaki—si Jesse Gause ug si Sidney Rigdon—isip iyang mga magtatambag diha sa “pagpangalagad sa kapangulohan sa high Priesthood.”⁴ Si Gause mipadayon isip usa ka magtatambag hangtud sa Disyembre 1832, sa dihang gi-excommunicate siya gikan sa Simbahan tungod sa wala mapiho nga mga rason.⁵ Niadtong Enero sa 1833, si Frederick G. Williams mipuli ni Gause diha sa kapangulohan.

Duha ka bulan human sa pagkatawag ni Williams, nakadawat si Joseph Smith og pagpadayag nga nag-ingon nga si Rigdon ug Williams “managsama ra” uban kaniya “diha sa paghupot sa mga yawe niining Katapusan nga Gingharian.”⁶ Sumala pa, atol sa usa ka konseho sa mga high priest didto sa Kirtland, Ohio, niadtong Marso 18, 1833, si Joseph miorden ni Rigdon ug Williams nga “managsama ra uban kaniya sa paghupot sa mga Yawe sa Gingharian ug ngadto usab sa Kapangulohan sa high Priesthood.”⁷ Ang tulo ka kalalakin-an gipasabut isip ang kapangulohan sa high priesthood ug milihok ubos sa direksyon ni Joseph Smith. Laing pagpadayag ang nagtudlo nga, isip usa ka kapangulohan, sila adunay “awtoridad sa pagdumala … sa tanang mga Problema sa simbahan.”⁸

Sa dihang si Joseph Smith mipundok sa halangdong mga konseho sa Kirtland, Ohio, ug sa Distrito sa Clay, Missouri, niadtong 1834, ang matag halangdong konseho adunay kapangulohan. Ang kapangulohan sa Kirtland naglangkob nilang Joseph Smith, Sidney Rigdon, ug Frederick G. Williams, ang samang mga sakop isip ang kapangulohan sa high priesthood. Ang kapangulohan sa Missouri naglangkob nilang David Whitmer, William W. Phelps, ug John Whitmer. Aron mailhan ang kalainan niining duha ka kapangulohan sa halangdon nga konseho, ang mga lider sa Simbahan ug mga miyembro nagsugod sa pagtawag sa kapangulohan sa high priesthood isip ang “Unang Kapangulohan.” Ang unang nahisulat nga pakisayran ngadto sa pundok isip ang Unang Kapangulohan miabut diha sa usa ka pagpadayag nga gimantala niadtong 1835 sa Doktrina ug mga Pakigsaad.⁹

Bisan ug ang usa ka instruksyon sa priesthood nga nahatag ni Joseph Smith niadtong 1835 namahayag nga ang “tulo ka tigdumalang halangdong mga priest” maporma nga “usa ka korum sa kapangulohan sa simbahan,” adunay mga higayon nga mokapin sa tulo ka mga indibidwal ang anaa diha sa Unang Kapangulohan.¹⁰ Niadtong Disyembre 1834, pananglitan, si Oliver Cowdery naorden “ngadto sa katungdanan sa pagka-assistant sa Presidente sa Halangdon ug Balaan nga Priesthood,” ug sa misunod nga adlaw, si Hyrum Smith ug si Joseph Smith Sr. naorden “ngadto sa katungdanan sa Kapangulohan sa high priesthood.”¹¹ Si Brigham Young, David O. McKay, ug Spencer W. Kimball usab adunay kapin sa duha ka magtatambag atol sa panahon sa ilang kapangulohan.

Human sa pagka-martir ni Joseph Smith niadtong Hunyo 1844, ang Unang Kapangulohan giwala ug ang liderato sa Simbahan nabalik ngadto sa Korum sa Napulog Duha ka mga Apostoles, uban ni Brigham Young isip Presidente.¹² Niadtong Disyembre 27, 1847, kapin sa duha ka tuig human sa kamatayon ni Joseph Smith, si Brigham Young subling miorganisar sa Unang Kapangulohan, uban ni Heber C. Kimball ug Willard Richards isip iyang mga magtatambag. Sa samang paagi, si Presidente John Taylor ug Wilford Woodruff mihulat og kapin sa duha ka tuig human sa kamatayon sa nag-una nila aron subling maorganisar ang Unang Kapangulohan ug temporaryo nga nangulo sa Simbahan isip Presidente sa Korum sa Napulog Duha. Sa pagsugod ni Lorenzo Snow niadtong 1898, ang bag-ong mga Presidente sa Simbahan sa kinatibuk-an subling miorganisar dayon sa Unang Kapangulohan human sa kamatayon sa kanhi propeta.