“Miting sa Pagsugod sa Simbahan ni Kristo,” Mga Hisgutanan sa Kasaysayan sa Simbahan
“Miting sa Pagsugod sa Simbahan ni Kristo”
Miting sa Pagsugod sa Simbahan ni Kristo
Niadtong Martes, Abril 6, 1830, si Joseph Smith, Oliver Cowdery, ug uban pa naghugpong aron sa pag-organisar sa Simbahan ni Kristo. Gipaabut na nila kining miting sukad sa ting-init sa 1829, dihang ang mga pagpadayag nagsugo kang Joseph ug Oliver sa pagtukod og usa ka simbahan kon ang Basahon ni Mormon mahuman na sa pagmantala ug ang mga tumutuo mahimo nang magkapundok.1 Wala matala ang miting, apan adunay pipila ka mga kapanguhaan, lakip sa usa ka pagpadayag nga nadawat nianang okasyon, nagpakita og pipila sa unsay nahitabo. Ang miting gisugdan sa pag-ampo, ug ang kahugpungan mipaluyo ni Joseph ug Oliver isip mga elder ug mga magtutudlo sa Simbahan. Si Joseph ug Oliver miorden dayon sa usag usa isip mga lider sa Simbahan, ang mga partisipante sa miting miambit sa sakrament sa Panihapon sa Ginoo, si Joseph ug Oliver mipandong sa ilang mga kamot sa ulo niadtong mga nabunyagan aron mahatag ang gasa sa Espiritu Santo ug gikumpirmar sila nga mga miyembro sa Simbahan, ug si Joseph nakadawat og pagpadayag nga karon makita sa Doktrina ug mga Pakigsaad 21.
Usa ka log home sa lugar sa umahan ni Peter Whitmer Sr. sa Fayette, New York.
Tali sa Abril 6 ug Hunyo 9, sa dihang gipahigayon ang unang komperensya sa Simbahan, si Joseph ug Oliver miorganisar sa mga branch didto sa Fayette, Manchester, ug sa Colesville, New York. Ang pipila sa mga unang mga istorya nakapalibug sa mga dapit niining mga miting, nagsugyot nga ang Abril 6 nga miting sa pag-organisar gipahigayon didto sa Manchester kay sa Fayette. Ang nag-unang kopya sa manuskrito sa Doktrina ug mga Pakigsaad 21 naglakip og usa ka notasyon nga nasugyot nga ang pagpadayag gihatag didto sa Manchester. Si William W. Phelps migamit niining notasyon sa dihang giandam niya ang pagpadayag alang sa publikasyon niadtong 1833 sa Book of Commandments. Lain pang mga rekord nga nalambigit ngadto ni Phelps ug Orson Pratt—walay bisan usa nila nga mitambong sa miting sa pag-organisar—nga nagngalan usab sa Manchester nga lokasyon sa Abril 6 nga miting. Hinoon, pipila sa mga nag-unang mga dokumento nga gihatag ni Joseph ug Oliver, dungan sa naulahing naimprinta sa Doktrina ug mga Pakigsaad, nag-ingon nga ang miting nahitabo didto sa Fayette o gikuha ang pakisayran ngadto sa Manchester. Sumala pa, ang kadaghanan sa mga historian nagkauyon sa nag-unang mga nag-obserbar ug midumdom nga ang miting sa pagsugod didto sa Fayette.
May Kalabutan nga Hisgutanan: Palmyra and Manchester