Howard W. Hunter
Si Howard W. Hunter miserbisyo isip ang ika-14 nga Presidente sa Simbahan sulod sa siyam ka bulan tali sa 1994 ug sa iyang kamatayon pagka-1995. Siya natawo niadtong 1907 sa Boise, Idaho, ngadto nila ni Nellie ug Will Hunter, ang una sa duha ka anak. Sa panahon sa kaminyoon ni Nellie ug Will, si Will wala magpasakop sa bisan unsang simbahan bisan gipadako nga Episcopalian. Atol sa pagkabata ni Howard, si Will wala mosupak sa tanang pamilya sa pagtambong og mga panagtigom sa simbahan apan miinsister nga ang iyang mga anak moabot sa pagkahingkod sa dili pa magpabunyag. Sa edad nga 12 anyos, si Howard mihangyo pag-ayo sa iyang amahan alang sa pagtugot nga magpabunyag ug milampos. Nagsugod siya sa pagserbisyo sa iyang korum sa mga deacon samtang nagtrabaho usab og daghang trabaho sa nagkalainlaing industriya, gikan sa golf ngadto sa mga tindahan.
Ang labing makalingaw nga kalihokan ni Howard atol sa high school mao ang pagpangulo sa iyang kaugalingong grupo sa musika, ang Hunter’s Croonaders, nga nagduyog alang sa mga sayaw sa tibuok rehiyon sa Boise. Iyang gisuhito ang daghang instrumento, lakip ang mga tambol, saxophone, ug clarinet, ug pagkahuman sa high school, nakabaton og kontrata sa pagtugtog diha sa usa ka depasahero nga barko. Sa pagpauli sa panimalay, si Howard naki-sakay paingon sa California aron sa pagbisita og usa ka higala ug kanhi miyembro sa banda ug nakahukom nga didto na manimuyo. Nahimamat dayon niya si Clara May Jeffs (kinsa gitawag og Claire), ug ang duha nag-date sulod sa tulo ka tuig sa wala pa magminyo niadtong 1931. Upat ka adlaw sa wala pa ang ilang kaminyoon, si Howard nakahukom sa pag-undang sa propesyon sa musika. Ang ilang unang anak, si Howard William Hunter Jr., natawo niadtong 1934 apan makapasubo lang namatay sa dihang usa pa ka masuso, mihimo sa magtiayon nga mibati og “grabeng kaguol ug naluya.” Pagkasunod tuig, si Howard misulod sa Southwestern Law School sa pagpadayon og karera sa pagka-abogado. Human migradwar niadtong 1939, mipraktis siya sa pagka-abogado ug sa kataposan miserbisyo sa mga konseho nga adunay duha ka dosena nga kompaniya.
Si Howard W. Hunter, sa tunga, naggunit og saxophone kauban sa iyang banda, ang Hunter’s Croonaders.
Niadtong 1940, sa edad nga 32, si Howard gitawag isip ang bishop sa bag-ong giporma nga El Sereno Ward, usa ka responsibilidad nga si Howard miingon “tanan bag-o ngari kanako” ug tingali usa ka matang sa misyon nga iyang gihanduraw nga serbisyohan unya uban ni Claire. Sa iyang unom ka tuig isip bishop, si Howard naningkamot sa pagtukod og panaghigalaay sa tibuok ward, nga sa kadugayan gikahimuot sa paghinumdoman sa mga miyembro. Niadtong 1950, gitawag siya isip presidente sa Pasadena California Stake, usa ka area nga anaa sa dakong pag-uswag sa populasyon sa Los Angeles County. Sulod sa dekada, ang populasyon sa lalawigan midoble og samot, nagdala og daghang mga Santos sa Ulahing mga Adlaw ngadto sa area. Niadtong 1959, nakurat siya sa dihang si Presidente David O. McKay mihatag kaniya sa calling sa pagserbisyo isip usa ka Apostol. Gidawat niya ang call, mibiya sa iyang pagpraktis og abogasiya, ug mihalad sa iyang kaugalingon ngadto sa full-time nga pagserbisyo sa Simbahan.
Sa tibuok niyang apostolikanhong pangalagad, si Elder Hunter malukpanong mibiyahe sa pagtan-aw sa daghang internasyonal nga mga paningkamot sa Simbahan. Nangulo siya sa Genealogical Society (sa wala madugay ang Family History nga Departamento sa Simbahan) ug misugyot og mga pagpahiangay sa mga sumbanan sa pagselyo, ilabina kon unsaon sa mga miyembro pagpahigayon og mga pagselyo alang sa patay nga mga paryente. Sa rekomendasyon ni Elder Hunter, si Presidente David O. McKay mitugot sa pag-usab sa palisiya nga nagtugot sa mga miyembro sa pagselyo sa patay nga mga paryente nga babaye ngadto sa tanang bana nga ilang naminyoan atol sa ilang mga kinabuhi. Si Elder Hunter usab midala og mga buluhaton sa pagdumala sa Polynesian Cultural Center sa Hawaii ug sa wala madugay sa Departamento sa Kasaysayan sa Simbahan isip ang Historian ug Recorder sa Simbahan. Usa sa iyang halandumon nga mga nakab-ot mao ang pagkuha og yuta didto sa Bukid sa mga Oliba [Mount of Olives] sa Israel alang sa konstruksiyon sa Brigham Young University Jerusalem Center alang sa Near Eastern Studies ug ang Orson Hyde Memorial Garden. Ang iyang suod nga pakighigala sa mayor sa Jerusalem nga si Teddy Kollek mipakita sa kamahinungdanon sa pagpundok og suporta alang sa mga proyekto.
Si Elder Howard W. Hunter sa pagpahinungod sa Orson Hyde Memorial Garden sa Jerusalem, sa 1979, uban ni Mayor Teddy Kollek.
Gikan sa 1972 pauswag, si Claire Hunter nag-antos og kanunay nga sakit nga may kalabotan sa utok [neurological illness] nga kasagaran nakahimo kaniya nga dili makalihok. Human sa usa ka cerebral nga pag-atake niadtong 1982, si Claire nagpakita og mga sinyales sa permanenteng pagkadaot sa utok ug namatay 18 ka bulan sa wala madugay. Atol niining higayona, si Elder Hunter misinati og mga hagit sa panglawas nga naglakip sa ulcer, pag-atake sa kasingkasing, ug grabe nga sakit sa dugukan [spinal]. Daghang mga operasyon ug pisikal nga therapy sa mga 1980 nakapabalik sa iyang maayong panglawas, bisan pa niana padayon siya sa balikbalik nga pakigbatok sa mga hagit sa tibuok niyang kinabuhi. Sa 1990, siya ug si Inis Stanton, usa ka kanhi kaila gikan sa California, naminyo. Si Inis kanunay nga mag-uban ni Presidente Hunter atol sa tibuok niyang pangalagad isip Presidente sa Korum sa Napulog Duha ug sa wala madugay isip Presidente sa Simbahan.
Unom ka adlaw human namatay si Presidente Ezra Taft Benson niadtong Mayo 1994, si Presidente Howard W. Hunter gi-set apart isip Presidente sa Simbahan. Atol sa iyang hamubo nga kapangulohan, si Presidente Hunter mihangyo sa mga miyembro sa Simbahan sa pag-apil og maayo sa pagsimba diha sa templo ug sa paghimo sa ilang mga kinabuhi nga nakasentro diha ni Jesukristo. Iyang gihatagan og importansiya ang panag-uban sa pamilya ug miawhag sa Simbahan nga dili mag-eskedyul og bisan unsang mga miting o mga programa sa mga gabii sa Lunes aron sa pagtugot sa pag-obserbar alang sa family home evening. Miawhag siya sa family history ug sa buhat sa templo nga paspasan.
Si Presidente Hunter namatay niadtong Marso 1995. Bisan sa iyang hamubo nga pangalagad isip Presidente sa Simbahan, ang iyang malumo nga batasan ug walay pagduhaduha nga pagpamatuod nakapamahal kaniya ngadto sa mga Santos. Ang iyang manununod, si Presidente Gordon B. Hinckley, mihatag og pasidungog ngadto sa kabilin ni Presidente Hunter, naghatag og gibug-aton sa iyang pagpahinungod sa ebanghelyo ug sa kamanggiluy-on nga iyang gipakita ngadto sa uban. “Kon mosulti siya, maminaw kaming tanan,” miingon si Presidente Hinckley sa iyang lubong. “Siya misulti uban sa dakong kombiksiyon sa iyang pagsaksi sa kabalaan ni Ginoong Jesukristo.”
Alang sa dugang nga impormasyon mahitungod sa kinabuhi ni Howard W. Hunter, tan-awa sa Prophets of the Restoration nga mga bidyo diha sa history.ChurchofJesusChrist.org o diha sa Librarya sa Ebanghelyo nga app.
May Kalabotan nga mga Hisgotanan: Family Home Evening, Pagtukod og Templo, Family History ug Genealogy