Thomas B. Marsh

Natawo sa Massachusetts niadtong 1799, si Thomas B. Marsh mibiya sa pinuy-anan sa edad nga 14 ug miapil og nagkadaiyang mga mugbo nga mga trabaho didto sa Vermont ug sa New York. Sa pipila ka higayon nag-uma siya, misilbi sa kan-anan, miatiman og mga kabayo, naninda og mga grocery, ug mihimo og printing-press type. Wala matagbaw sa mga relihiyon, mipalayo siya gikan sa tanan nga mga simbahan, naglaum sa panahon nga usa ka bag-ong simbahan motumaw nga anaa “ang kamaturan diha sa kalunsay niini.”¹ Niadtong 1830, nahibaloan niya ang gipahiuli nga ebanghelyo didto sa Palmyra, New York, diin iyang nahimamat si Martin Harris ug nahatagan sa 16 ka mga pahina sa Basahon ni Mormon, nga mao pay paggawas sa press. Mibalik si Marsh sa Massachusetts, ug gipakita ang mga pahina sa iyang asawa, si Elizabeth Godkin Marsh, nga mituo sa hubad nga buhat sa Dios.

Ang mga Marsh mibalhin uban sa iyang tulo ka mga anak ngadto sa Palmyra niadtong Septyembre 1830 ug nabunyagan sa Simbahan sa wala madugay human niana. Human mibalhin ngadto sa Kirtland, Ohio, niadtong 1831, si Marsh naorden nga high priest. Niadtong Nobyembre 1832, mibalhin siya ngadto sa Distrito sa Jackson, Missouri, ug gipahimutang ang iyang pamilya sa usa ka komportable nga balay nga troso diha sa Big Blue River ug nagsugod sa pagtikad sa yuta. Pagkahuman nga gi-abug ang mga Santos sa manggugubot nga panon pagawas sa distrito, ang mga Marsh nanimuyo duol sa Distrito sa Lafayette, diin si Marsh nagtudlo sa eskwelahan.

Nakatuman si Marsh og importanting mga calling atol niadtong mga tuiga. Sa wala madugay human miapil sa Simbahan, gitawag siya pinaagi sa pagpadayag nga mahimong usa ka “Mananambal sa Simbahan.” Wala maklaro kon si Marsh, kinsa walay pormal nga pagbansay sa medikal, kinahanglan moserbisyo isip usa ka medikal nga doktor o gani usa ka espiritwal nga mananambal.² Sa Missouri, miserbisyo siya isip presidente sa branch ug, sa kaulahian, sa Zion high council. Niadtong Abril 1835, gi-orden siya nga usa ka sakop sa bag-ong gihimo nga Korum sa Napulog Duha ka mga Apostoles. Sa edad nga 36, siya ang kinamagulangan nga sakop niana nga pundok ug busa gipaluyohan isip ang unang presidente sa korum diha sa kasaysayan sa Simbahan.

Maabtik nga gipangulohan ni Marsh ang Napulog Duha sa usa ka misyon sa mga estado sa silangan. Ang korum gilangkuban sa mga batan-ong lalaki, silang tanan adunay pipila lang katuig nga kasinatian sa Simbahan. Niadtong 1837, atol sa usa ka panahon sa krisis sa ekonomiya ug kasungian didto sa Kirtland, ang pipila sa Napulog Duha mikwestyon sa pagpangulo ni Joseph Smith, ug si Marsh nanlimbasug sa paghiusa sa korum. Bisan og ang upat sa Napulog Duha na-excommunicate gikan sa Simbahan, si Marsh nahimong importanting tawo sa pagtabang sa uban diha sa korum, lakip ni Parley P. Pratt, sa pagbuntog sa ilang mga kabalaka ug sa pagpabilin nga matinud-anon.

Sa samang panahon, si Joseph Smith mipadala ni Heber C. Kimball aron sugdan ang misyonaryo nga buhat didto sa England. Sa pagkahibalo niini, gikasuko ni Marsh, tingali nasagmuyo nga isip presidente sa korum wala siya gikonsulta bahin niini nga tahas. “Magpaubos ka; ug ang Ginoo nga imong Dios moagak kanimo,” usa ka pagpadayag nga nahatag pinaagi ni Joseph Smith gisulti kaniya. Ang Ginoo miawhag kang Marsh nga magmatinud-anon ug “ayaw pagsukol batok sa akong sulugoon nga si Joseph.”³

Gani, human sa pagbalhin ngadto sa Far West, Missouri, niadtong 1838, si Marsh nag-anam ka kritikal ngadto ni Joseph Smith ug misukwahi ngadto sa mga Santos sa Ulahing mga adlaw nga migamit og kabayolente sa pagpakig-away sa mga manggugubot nga panon didto sa Missouri.⁴ Siya ug si Orson Hyde mipirma og usa ka affidavit nga nagdetalye sa ilang kabalaka bahin sa kabayolente sa Mormon, nga nahimong usa ka ebidensya nga gigamit batok sa mga Santos pinaagi sa mga opisyal sa Missouri. “Adunay troso diha sa akong mata ug nagtuo ko nga makadiskobri ko og usa ka puling diha sa kang Joseph,” iyang gisaysay sa kaulahian, “bisan og wala ra kini apan usa ka troso diha sa akong mata.”⁵ Mipalayo siya sa Simbahan niadtong Oktubre 1838, ug siya ug si Elizabeth mipadako sa ilang pamilya didto sa Missouri. Namatay si Elizabeth niadtong 1854, ug si Marsh nagtinguha nga dawaton pagbalik sa Simbahan tulo ka tuig ang milabay. Samtang nagtabang sa paglalin sa Simbahan, sa wala madugay nabunyagan siya pag-usab didto sa Florence, Nebraska. Sa katapusan nanimuyo sa Utah, si Marsh naminyo ni Hannah Adams, nagtudlo sa eskwelahan didto sa Spanish Fork, ug sa kaulahian mibalhin sa Ogden, diin namatay siya niadtong 1862.

May Kalabutan nga mga Hisgutanan: Korum sa Napulog Duha