Susa Young Gates

Si Susa Young Gates natawo sa Marso 18, 1856. Siya ang ikaduhang anak nga babaye ni Brigham Young ug ni Lucy Bigelow ug ang unang bata nga natawo sa Lion House sa Siyudad sa Salt Lake. Nagtubo siya nga gilibutan sa dinosina ka mga igsoon ug nakasinati og malipayon nga pagkabata nga puno sa kasinatian sa eskwela, musika, drama, sayaw, ug himnastika [gymnastics]. Si Susa adunay espisyal nga gasa sa musika ug literaryo nga pagpahayag.¹

Sa edad nga 14, si Susa mibalhin og puyo sa gilay-ong 300 ka milya gikan sa Siyudad sa Salt Lake ngadto sa gamayng lungsod sa St. George sa habagatang Utah. Duha ka tuig human niana, naminyo siya sa usa ka dentista, si Alma Dunford. Duna silay duha ka anak, babaye ug lalaki, apan ang ilang kaminyoon nagkaproblema, ug si Susa nakigdeborsyo ni Dunford niadtong 1878. Ang maong pagdiborsyo nakatruma pag-ayo ni Susa. Gikuhaan siya sa legal nga pag-atiman sa duha niya ka mga anak ug talagsa ra kaayo niya makontak ang iyang anak nga babaye sa daghang mga katuigan; nawala usab ang kabtangan nga kabilin sa iyang amahan. Ang panglibak sa komunidad batok kaniya walay kalooy.²

Human migahin og usa ka tuig sa Brigham Young Academy sa Provo, diin giorganisar niya ang unang departamento sa musika, si Susa naminyo ni Jacob F. Gates, usa ka batan-ong lalaki gikan sa St. George, niadtong Enero 1880. Kini nga kaminyoon napamatud-an nga usa ka tinubdan sa mahangturon nga kalipay ug kasuod nga suporta. Ang duha nagserbisyo og misyon nga magkauban didto sa Hawaii sukad niadtong 1885 hangtud sa 1889.

Sa mga tuig 1880 si Susa nagsugod sa pag-establisar sa iyang kaugalingon isip usa ka tigsulat, mitampo og mga report, mga artikulo, ug mga istorya ngadto sa lokal nga mga mantalaan, kasagaran migamit sa iyang paborito nga dalangalan [pen name], nga Homespun. Niadtong 1889 iyang gitukod ang Young Woman’s Journal [Journal sa mga Batan-ong Babaye], ang binulan nga magasin sa Young Ladies’ Mutual Improvement Association [Asosasyon alang sa Mutwal nga Pag-uswag sa mga Batan-ong Kababayen-an], nga iyang gi-edit hangtud pagka 1900. Mitampo siya sa mga magasin ug mantalaan sa nahabiling panahon sa iyang kinabuhi, ug niadtong 1914 nahimo siyang unang editor sa Relief Society Magazine. Alang ni Susa, ang pagsulat usa ka minahal nga paningkamot diin siya makahimo og makahuloganon nga kontribusyon sa kumonidad. “Ang akong tibuok kalag alang ra gayud sa pag-ugmad niini nga gingharian,” misulat siya ngadto sa usa sa iyang suod nga kasumbongan sa iyang pagbati mahitungod sa iyang literaryo nga mga ambisyon. “Motrabaho ko og maayo aron makatabang sa akong mga kaigsoonang babaye niining sama nga buhat.”³

Gikan sa mga 1890 pataas, si Susa makugihong misalmot diha sa dalaygon kaayong nagsunod-sunod nga mga buhat sa publiko, politika, ug serbisyo sa Simbahan. Nagserbisyo siya sa Board of Trustees sa Brigham Young University, nagtudlo og mga klase sa siyensiya sa panimalay, ug mipadasig sa pisikal nga edukasyon. Miapil siya sa National Council of Women, namulong sa nasyonal nga mga miting, nag-alagad isip delegado sa pipila nila ka mga kongreso, ug nangulo sa Komitiba sa Tigmantala [Press Committee]. Iyang gihatagan og gibug-aton ang genealogy ug buhat sa templo sa tunga-tunga sa iyang kinabuhi ug nahimong usa ka makusganong hilum nga pwersa nga nakaaghat sa pag-establisar niini nga mga buluhaton isip usa ka butang nga gitutukan pag-ayo alang sa mga miyembro sa Simbahan.⁴ Nagserbisyo siya sa kinatibuk-ang board sa YLMIA hangtud niadtong 1911, dihang natawag siya ngadto sa kinatibuk-ang board sa Relief Society, diin siya nagserbisyo hangtud pagka 1922. Sa iyang kaulahiang mga tuig, iyang gimantala ang usa ka biograpiya sa iyang amahan, The Life Story of Brigham Young [Ang Istorya sa Kinabuhi ni Brigham Young], ug migama og liboan ka mga pahina sa usa ka wala mamantala nga manuskrito nga gilaraw nga mahimong kasaysayan sa mga babaye nga mga Santos sa Ulahing mga Adlaw.

hulagway ni Susa Young Gates — Litrato ni Susa Young Gates.

Si Susa Young Gates nakasinati og daghang trahedya ug kagul-anan sa iyang kinabuhi, lakip na sa mga kamatayon sa walo sa trese niya ka mga anak, pipila kanila namatay sa dili kasagarang makalilisang nga mga sirkumstansya. Nakasinati siya og grabe nga mga problema sa panglawas, pinansyal nga mga kakulian, ug sakit sa dughan tungod sa mga pagpili sa mga sakop sa pamilya. Bisan pa niana, ang iyang pagtuo mipalig-on sa iyang kinabuhi, ug siya namalandong nga nakat-on siya nga dili “magtinguha sa pagtuis sa kabubut-on sa Dios aron mapahiuyon sa iyang kaugalingong mga tinguha.” Hinuon, siya miingon, nga siya nakat-on sa “pagpuasa ug pag-ampo nga ako unta makontento” bisan unsa pa ang gihatag sa Ginoo. “Kon unta himuon ako sa Ginoo nga kontento sa tanan Niya nga pagpakiglabot ngari kanako,” siya miingon, “unsa may [kabalak-an] kon unsay mahitabo nako?”⁵

Si Susa Young Gates sa ulahing bahin sa kinabuhi — Hulagway ni Susa Young Gates sa ulahing bahin sa kinabuhi.

May Kalabutan nga mga Hisgutanan: Brigham Young, Retrenchment, Young Women Organizations, Relief Society, Church Periodicals, Church Academies, Women’s Suffrage