“Matthias F. Cowley,” Mga Hisgotanan sa Kasaysayan sa Simbahan (2022)
“Matthias F. Cowley,” Mga Hisgotanan sa Kasaysayan sa Simbahan
Matthias F. Cowley
Si Matthias Foss Cowley (1858–1940) natawo sa wala madugay human nga ang iyang mga ginikanan mibalik ngadto sa Siyudad sa Salt Lake human sa pagbakwit sa potensiyal nga mga hulga sa kapintas atol sa Gubat sa Utah.1 Nagdako siya diha sa Salt Lake City 14th Ward, diin miserbisyo siya isip usa ka magtutudlo sa ward alang sa pamilya ni Apostol John Taylor ug nahimong higala sa tibuok kinabuhi sa anak nga lalaki ni Elder Taylor nga si John W. Taylor.2 Human sa kamatayon sa iyang amahan niadtong 1864, si Cowley mitabang sa iyang ama-ama sa pagsuhid og yuta alang sa Riles sa Habagatang Utah [Southern Utah Railroad]. Atol sa tingtugnaw nga mga bulan, si Cowley mitambong sa University of Deseret ug nahimong madasigon nga estudyante sa Biblia. Sa 19 anyos nga pangidaron, miserbisyo siya sa una sa duha ka misyon ngadto sa habagatang bahin sa Estados Unidos. Sa wala pa ang iyang ikaduha nga pagbiya, gidumala ni Cowley ang mga paningkamot sa pagpasiugda sa [Young Men’s Mutual Improvement Association] Kapunongan sa Batan-ong mga Lalaki sa Pagpalambo sa Usag Usa nga magasin, Ang Tigtampo [The Contributor] , nga midala kaniya ngadto sa daghang ward ug mga stake sa tibuok Teritoryo sa Utah. Sa unang adlaw nga giablihan ang Logan Utah Temple alang sa buhat sa ordinansa niadtong 1884, naminyo siya ngadto kang Abigail Hyde. Si Cowley gitawag ug gi-orden nga Apostol niadtong 1897, usa ka tuig human nga ang Utah gidawat isip usa ka estado ug ang Simbahan misugod sa pagbalhin ngadto sa usa ka bag-o nga siglo.3
Elder Matthias F. Cowley niadtong 1898.
Nakasaksi si Cowley og grabeng kagubot nga gitunong ngadto sa Simbahan tungod sa dinaghan nga kaminyoon. Niadtong 1889, iyang giminyoan si Luella Smart Parkinson, ang iyang unang dinaghan nga asawa. Ang ilang kaminyoon nahitabo sa usa ka panahon diin ang federal nga mga opisyal kusganong mipatuman sa mga balaod batok sa pagpangasawa og daghan nga gituyo sa pagbungkag sa mga pamilya sa mga Santos sa Ulahing mga Adlaw ug sa paghikaw sa mga katungod sa Simbahan.4 Usa ka tuig human sa kaminyoon ni Cowley ngadto kang Luella, si Presidente Wilford Woodruff mipagula sa Manipesto, usa ka dinasig nga pamahayag nga nagsugo sa mga Santos sa Ulahing mga Adlaw nga mohunong sa pagsulod sa dinaghan nga kaminyoon. Taliwala sa mga 1880 ug sa sayong bahin sa ika-20 nga siglo, ang mga Presidente sa Simbahan nga sila si Wilford Woodruff, Lorenzo Snow, ug Joseph F. Smith naningkamot pa og maayo sa pagkab-ot sa pagkaestado sa Utah, pagpalambo sa mga relasyon sa gobyerno sa Estados Unidos, ug pagsugpo sa paghimo og dinaghan nga kaminyoon.5 Niadtong 1899, giminyoan ni Cowley si Harriet Bennion, ang iyang ikaduhang dinaghan nga asawa.6 Ang ubang mga lider sa Simbahan mikonsiderar sa Manipesto isip usa ka paningkamot sa paglukmay sa gobyerno ug nagtuo nga ang “bag-o ug walay kataposan nga pakigsaad sa kaminyoon” (Doktrina ug mga Pakigsaad 131:2) angay pa gihapon alang sa matinud-anon. Si Cowley pribadong nagpadayon sa pagduso sa dinaghan nga kaminyoon ug sa pagpahigayon og bag-o nga dinaghan nga mga kaminyoon.7 Atol sa nasodnong gitaho nga kampanya nga dili palingkoron ang isig ka Apostol nga si Reed Smoot sa posisyon diha sa Senado sa Estados Unidos, si Cowley ug ang uban gipatawag aron sa pagpamatuod mahitungod sa ilang mga koneksiyon ngadto sa pagpangasawa og daghan. Mihangyo siya nga dili motambong.
Niadtong 1904, isip kabahin sa usa ka saad nga iyang gihimo atol sa mga pagdungog sa mga paghusay ni Smoot, si Joseph F. Smith mipahibalo sa unsay nailhan nga ang Ikaduhang Manipesto. Kini nga palisiya mipahayag ni bisan kinsa nga mosulod ngadto sa bag-o nga dinaghan nga mga kaminyoon nga “nakasala batok sa Simbahan” ug angay nga i-excommunicate.8 Ang Unang Kapangulohan human niana midili nga ang mga ordinansa sa pagselyo ipahigayon sa gawas sa mga templo, nga ang mga seremonya sa kaminyoon sa templo pagahimoon ubos sa pagdumala sa mga presidente sa templo ug senior nga mga lider sa Simbahan. Si Cowley ug ang isig ka Apostol nga si John W. Taylor misupak sa bag-ong palisiya. Niadtong 1905, giminyoan ni Cowley si Lenora Mary Taylor, ang iyang ikatulong dinaghan nga asawa didto sa Canada.9 Wala madugay human niana, ang nahibilin sa Korum sa Napulog Duha mihangyo nila ni Elder Cowley ug Taylor nga moluwat gikan sa korum tungod kay “wala sila nagkauyon sa Napulog Duha kabahin sa pagpakasal sa dinaghan nga mga asawa ug nag-awhag sa uban sa pagpakasal og dinaghan nga mga asawa.” Human nga miluwat sila si Cowley ug Taylor, ang duha mipadayon sa pagduso sa dinaghan nga kaminyoon. Niadtong 1910 ug 1911, ang Korum sa Napulog Duha misusi sa mga taho nga daghang lalaki diha sa pagpangulo nga mga posisyon sa Simbahan ang nagpakasal og dugang nga mga asawa. Sa dihang nahibaloan sa Apostoles nga si Cowley mipadayon sa pagpahigayon ug pag-awhag og dinaghan nga mga kaminyoon, mibotar sila nga siya “hikawan sa katungod ug Awtoridad sa paggamit og bisan unsa nga mga katungdanan sa Pagkapari.”10
Bisan pa man sa iyang nahaunang mga dili pag-uyon bahin sa dinaghan nga kaminyoon, si Cowley mipadayon sa pagpamulong diha sa publiko nga mga dapit, pagsangyaw sa ebanghelyo, ug pagsulat og mga libro nga makatabang sa Simbahan. Niadtong 1936, misulat siya ngadto sa Unang Kapangulohan nga naglaom nga malimpyo ang iyang ngalan ug nagkompisal, “Nalingla ko,” ug “sa higayon nga mihatag ko og tambag o mihimo og buhat nga supak ngadto sa mga baroganan, mga lagda, ug mga patakaran sa Simbahan … ako nasayop gayod sa pagtambag.”11 Gidawat siya pag-usab sa hingpit nga pagkigdait ug sa wala madugay gitawag sa pagserbisyo og usa ka misyon ngadto sa Uropa, diin misangyaw siya diha sa pipila ka makasaysayanon nga mga dapit, misulat alang sa Millennial Star nga magasin, ug mipundok og genealogical nga datos uban sa iyang asawa nga si Luella ug anak nga babaye nga si Laura.12 Sa iyang kamatayon upat ka tuig ang milabay tungod sa mga hinungdan nga may kalabotan sa pangidaron, si Cowley nahinumdoman alang sa iyang “madasigon nga buhat” isip usa ka tigsangyaw, tigsulat, ug misyonaryo.13
May Kalabotan nga mga Hisgotanan: Dinaghan nga Kaminyoon human sa Manipesto, Balaodnon Batok sa Pagpangasawa og Daghan [Antipolygamy Legislation], Ang mga Paghusay ni Reed Smoot, Utah