“Gasa sa mga Pinulongan,” Mga Hisgutanan sa Kasaysayan sa Simbahan
“Gasa sa mga Pinulongan”
Gasa sa mga Pinulongan
Ang pagpamulong diha sa mga pinulongan nahisgutan diha sa mga pagpadayag ngadto ni Joseph Smith isip usa sa daghang mga gasa sa Espiritu nga nagsunod niadtong kinsa magbaton og hugot nga pagtuo kang Jesukristo.1 Ang nahaunang mga Santos sa Ulahing mga Adlaw nakasinati niining gasa sa duha ka paagi. Ang una, ang pagpamulong o pagkanta sa wala mahibaloi nga pinulongan, usahay gitawag og glossolalia. Kining matang sa espiritwal nga pagpahayag gisabut nga naggikan sa panahon ni Pablo ug sa kasagaran pagasundan og usa ka dinasig nga interpretasyon.2 Ang ikaduhang paagi nga ang mga miyembro sa Simbahan nakasinati sa gasa sa mga pinulongan mao ang pagsangyaw sa ebanghelyo diha sa usa ka pinulongan nga langyaw ngadto sa mamumulong apan pamilyar ngadto sa iyang mga tigpaminaw. Kini nga buhat, naila isip xenoglossia, nakita niadtong panahon sa Pentecostes sa dihang ang karaang mga disipulo ni Jesukristo milagrusong namulong diha sa langyaw nga mga pinulongan ug sa ingon, gipaila ang ebanghelyo ngadto sa mga Hentil.3
Diha sa usa ka miting niadtong 1835, si Elizabeth Ann Whitney nakadawat og usa ka panalangin gikan sa patriyarka sa Simbahan nga si Joseph Smith Sr., diin gisaad diha kaniya ang “gasa sa makapadasig nga pagkanta.” Atol sa miting, si Whitney mitindog ug misugod sa pagkanta diha sa pinulongan nga wala mahibaloi. Napuno sa Balaang Espiritu, si Parley P. Pratt mihubad sa iyang kanta alang sa uban nga tigpaminaw. “Sa karaang mga panahon adunay usa ka tawo,” gisugdan ang kanta, “taliwala sa matahum nga tanaman, Diin ang kanindot sa mga bulak sa walay katapusan ang pagbuswak, Ug nangalimyon sa kahumot; Tan-awa, si Adan ang iyang ngalan.” Si Joseph Smith Sr. mituo nga si Whitney miawit diha sa lunsay nga pinulongan sa langit.4 Mga panghitabo sa glossolalia, sama sa pagkanta ni Whitney, mitumaw diha sa mga nahaunang mga miting sa simbahan, ug bisan og giyam-iran kini sa daghang mga Kristiyano,5 ang maong buhat gidawat sa nahaunang mga Santos sa Ulahing mga Adlaw, kinsa mituo nga ang pagbag-o sa espiritwal nga mga gasa usa ka importante nga bahin sa Pagpahiuli sa ebanghelyo. Giisip ni Brigham Young ang pagpamulong og mga pinulongan isip usa ka espirituhanong “makapadasig” nga kasinatian ug usa ka importanting bahin sa iyang pagkakabig.6
Sa Kirtland, ang mga panagsumpaki taliwala sa mga Santos sa Ulahing mga Adlaw kabahin sa katinuod sa pipila ka mga espirituhanon nga mga pagpakita nga naggiya kang Joseph Smith sa pagtinguha og pagpadayag kabahin sa nahisgutan.7 Mitubag ang Ginoo nga bisan og ang ubang sayop nga espirituhanon nga mga pagpakita nakasulod sa Simbahan, ang mga Santos sa Ulahing mga Adlaw makaila sa tinuod gikan sa sayop nga mga pagpakita, lakip sa glossolalia nga mga panghitabo, basta mosunod lang sila sa Espiritu Santo ug sa sundanan nga gitakda sa Ginoo.8 Sa kaulahian si Joseph mipasidaan sa mga Santos nga si Satanas mahimong makamanipular sa pagpamulong ug nga ang Ginoo dili gayud mopadayag og mga doktrina sa Simbahan sa ingon niini nga paagi sa buhat.9 Siya mipadayon sa paghatag og katin-awan, “Ang mga dila gihatag alang sa katuyoan sa pagsangyaw taliwala niadtong kansang pinulongan dili masabut,” midugang nga si bisan kinsa “nga anaa ang Espiritu Santo makapamulong sa mga butang sa Dios diha sa iyang kaugalingon nga dila, ingon man sa pagpamulong diha sa lain.”10 Ang glossalalia nagpadayon isip usa ka importanting bahin sa pagsimba sa mga Santos sa Ulahing mga Adlaw sa nahabilin sa ika-19 nga siglo, bisan og ang buhat hinay-hinayng mikunhod paglabay sa panahon ug ang tanan nahanaw sa sayong bahin sa ika-20 nga siglo.
Gikan sa sinugdanan, ang mga Santos sa Ulahing mga Adlaw midawat sa espirituhanon nga gasa sa pagpamulong diha sa langyaw nga mga pinulongan isip usa ka tabang sa pagpakatap sa ebanghelyo. Sa mga pagpadayag ni Joseph Smith gisaad sa mga misyonaryo kining gasa, ug daghan ang misugilon og milagrusong mga kasinatian sa pagsangyaw sa ebanghelyo diha sa dili pamilyar nga mga pinulongan. Isip usa ka 23-anyos nga misyonaryo didto sa Hawaii niadtong 1850, si George Q. Cannon naningkamot og maayo aron makat-on og Hawaiian aron siya makasangyaw, nagpakita og “hugot nga pagtuo diha sa atubangan sa Ginoo aron makabaton sa gasa sa pagsulti ug pagsabut sa pinulongan.” Siya mihisgut nga usa ka gabii niana samtang nagtudlo, siya “mibati og lahi nga pagpanginit sa akong dunggan” ug “sukad nianang higayuna gamay nalang, kon aduna man, nga naglisud sa pagsabut sa unsay gisulti sa mga tawo.” Si Hyrum Jensen, usa ka bag-ong misyonaryo didto sa Norway niadtong mga 1890, nawad-an sa kadasig sa dihang ang mga tawo mibiay-biay kaniya tungod sa iyang pagka-dili makamao sa pagsulti. Mihapit siya sa usa ka kakahuyan ug nag-ampo nga ang Ginoo mohatag kaniya og gasa sa mga pinulongan. Mipamatuod si Jensen nga sukad nianang adlawa, “Ako nakasulti og Norwegian nga mas sayon kay sa iyang pagpamulong sa Iningles.”11
Samtang gipalapdan ang misyonaryo nga buhat sa ulahing bahin sa ika-19 ug sayo nga bahin sa ika-20 nga mga siglo, ang xenoglossia nahimong uso sa pagsabut sa gasa sa mga dila. Ang Language Training Mission ug nga sa kaulahian ang mga missionary training center mipalambo og mga programa sa pagtuon sa pinulongan nga mopalambo sa espirituhanon nga gasa sa mga dila, nag-andam sa mga misyonaryo sa pagsangyaw sa ebanghelyo diha sa daghang langyaw nga mga pinulongan. Ang mga Santos sa Ulahing mga Adlaw sa tibuok kalibutan nagpamatuod sa gahum niining espirituhanon nga gasa.12
May Kalabutan nga mga Hisgutanan: Gifts of the Spirit [Mga Gasa sa Espiritu]