“Si Joseph Smith ug ang Dinaghan nga Kaminyoon,” Mga Hisgutanan sa Kasaysayan sa Simbahan
“Si Joseph Smith ug ang Dinaghan nga Kaminyoon”
Si Joseph Smith ug ang Dinaghan nga Kaminyoon
Ang mga Santos sa Ulahing mga Adlaw nagtuo nga ang monogamiya—ang kaminyoon tali sa usa ka lalaki ug usa ka babaye—mao ang walay pagkausab nga balaod sa Ginoo sa kaminyoon.1 Sa kapanahunan sa bibliya, ang Ginoo misugo sa pipila sa Iyang mga katawhan sa pagbuhat og dinaghan nga kaminyoon—ang kaminyoon sa usa ka lalaki ug sobra sa usa ka babaye.2 Ang ubang nahaunang mga miyembro sa Ang Simbahan ni Jesukristo sa mga Santos sa Ulahing mga Adlaw nakadawat usab ug mituman niining sugo nga gihatag pinaagi sa mga propeta sa Ginoo.
Human madawat ang usa ka pagpadayag nga nagsugo kaniya sa pagbuhat og dinaghan nga kaminyoon, si Joseph Smith nagminyo og daghang asawa ug mipaila sa maong buhat ngadto sa suod nga kaubanan. Kini nga baruganan usa sa labing lisud nga aspeto sa Pagpahiuli—alang ni Joseph mismo ug alang sa ubang mga miyembro sa Simbahan. Ang dinaghan nga kaminyoon misulay sa pagtuo ug nakamugna og kontrobersiya ug oposisyon. Pipila sa mga Santos sa Ulahing mga Adlaw sa sinugdanan midawat sa pagpahiuli sa biblikanhong buhat nga hingpit nga lahi ngadto sa ilang mga panabut. Apan sa kadugayan daghan ang mipamatuod sa kagamhanan sa espirituhanon nga mga kasinatian nga nakatabang nila nga mabuntog ang ilang pagduha-duha ug naghatag kanila og kaisug sa pagdawat niining buhat.
Daghang mga detalye mahitungod sa nahaunang buhat sa dinaghan nga kaminyoon ang wala mahibaloi tungod kay ang mga partisipante gihangyo nga ihilum ang ilang mga buhat. Ang makasaysayanon nga rekord sa nahaunang dinaghan nga kaminyoon gamay ra: pipila ka mga rekord sa panahon nakahatag og mga detalye, ug sa kadugayan ang mga paghandom dili kanunayng masaligan. Ang mga Santos subling misaysay sa pipila ka importanting mga istorya kalabut ngadto sa pagbuhat sa dinaghan nga kaminyoon pinaagi ni Joseph Smith ug sa uban nga nahaunang mga Santos sa Ulahing mga Adlaw. Alang sa dugang nga kasayuran kalabut sa nahaunang dinaghan nga kaminyoon, tan-awa sa “Plural Marriage in The Church of Jesus Christ of Latter-day Saints,” Gospel Topics Essays, topics.lds.org.
May Kalabutan nga mga Hisgutanan: Joseph Smith Jr., Emma Hale Smith, Fanny Alger, Nauvoo Expositor