Zion/Bag-ong Jerusalem

Ang mga pulong Zion ug Bag-ong Jerusalem pareho nga makita diha sa Biblia. Sa Daang Tugon, ang Zion sa kasagaran mao ang kapulong [synonym] alang sa Jerusalem lakip ang bungtod sa templo niini. Ang mga panagna diha sa Bag-ong Tugon gikaingon nang daan nga ang Ginoo sa usa ka adlaw molalang sa kalangitan ug ang yuta mabag-o. Isip kabahin sa bag-ong paglalang, usa ka siyudad sa Dios nga gipasabut isip usa ka “bag-ong Jerusalem” ang “mokanaog gikan sa Dios gawas sa langit.”¹ Ang mga tigsangyaw sa panahon ni Joseph Smith wala miuyon mahitungod sa kahulogan niining mga pulonga. Ang uban migamit sa hugpong sa mga pulong nga “kahimoan sa Zion” isip usa ka ngalan alang sa pagpakatap sa Kristiyanismo.²

Ang Basahon ni Mormon ug ang nahaunang mga pagpadayag ni Joseph Smith namulong sa umaabut nga siyudad sa Zion nga magsilbing usa ka pundukanan alang sa nagkatibulaag nga kaliwatan sa Israel sa ulahing mga adlaw. Sa dinasig nga rebisyon ni Joseph Smith sa Genesis naghatag og usa ka asoy sa “Dakbayan sa Pagkabalaan” gitawag og Zion nga gitukod pinaagi sa karaan nga propeta nga si Enoch. Kadtong kinsa mipundok ngadto sa Zion ni Enoch miwagtang sa kawad-on ug nagkahiusa, matarung, ug putli diha sa kasingkasing. Sa katapusan, si Enoch ug ang lumulupyo sa Zion gidala ngadto sa langit.³ Sugod niadtong 1831, ang mga Santos sa Ulahing mga Adlaw nagtinguha sa pagtukod og usa ka siyudad sa Zion diin sila makapangandam alang sa Ikaduhang Pag-anhi ni Jesukristo. Usa ka pagpadayag ang mihingalan niining siyudad nga ang “Bag-ong Jerusalem.”⁴ Laing pasabut sa Zion nga mas halapad isip usa ka katawhan kinsa “maputli og kasingkasing.”⁵

Nahaunang mga Paningkamot sa Pagtukod sa Zion

Niadtong 1831, si Joseph Smith nakadawat og pagpadayag nga ang dapit alang sa siyudad sa Zion anaa duol sa lungsod sa Independence sa Distrito sa Jackson, Missouri.⁶ Si Bishop Edward Partridge misugod sa pagpamalit og kayutaan diha sa dapit ug mitabang sa pagpahiluna sa bag-ong mga miyembro sa ilang paghiabut. Niadtong ting-init sa 1833, si Joseph Smith ug ang iyang mga magtatambag diha sa Unang Kapangulohan nagtinguha og balaan nga giya samtang ilang gihimo ang usa ka plano alang sa siyudad, nga naglakip sa linya sa mga karsada ug 24 ka sibiko ug mga estraktura sa simbahan nga ang tanan gigahin isip mga “templo” alang sa nagkalainlaing katuyoan.⁷ Nianang ting-init, hinoon, ang mga lumulupyo sa Distrito sa Jackson mipapahawa sa mga Santos gawas sa distrito, mipugos kanila sa pagbiya sa ilang mga yuta ug sa ilang mga paningkamot sa pagtukod sa siyudad sa Zion.

Sa sunod-sunod nga mga pagpadayag, ang Ginoo misugo sa mga Santos kalabut sa espirituhanon nga mga kinaiya nga nagkulang sila apan gikinahanglan alang ni bisan kinsang tawo kinsa mitinguha sa pagtukod sa Zion ug mihatag kanila og mga instruksyon kon unsaon sa pagpadayon.⁸ Ang mga Santos misugod sa pagpangandam alang sa “katubsanan sa Zion,” usa ka panahon diin sila mobalik ug mobawi sa ilang mga yuta didto sa Missouri ug ipadayon ang pagtukod sa balaan nga siyudad.⁹

Usa ka Pagbutyag sa Salabutan

Ang pagsulay sa mga Santos sa pagtubos sa Zion, lakip na sa mga pagpangamuyo ngadto sa legal nga sistema sa Estados Unidos, wala moresulta og usa ka pag-ila sa ilang mga katungod o sa dinalian nga pagbalik ngadto sa Distrito sa Jackson. Diha sa usa ka pagpadayag niadtong Enero 1841 kalabut sa napakyas nga pagsulay sa pagtukod og usa ka Zion nga nakasentro sa templo didto sa Distrito sa Jackson, ang Ginoo mipasabut, “Kini angay kanako nga dili na kinahanglan nga ipabuhat … apan sa pagdawat sa ilang mga halad.”¹⁰ Ang samang pagpadayag ang nagsugo sa mga Santos sa pagtukod og usa ka templo sa Nauvoo, Illinois, ug sugdan kanang siyudad isip usa ka bag-ong dapit sa panagpundok.

Didto sa Nauvoo, si Joseph Smith nagtudlo nga ang Zion “gilangkuban sa tibuok Amihanan ug Habagatang Amerika,” midugang pa nga, sa usa ka pagsabut, “bisan asang dapit diin ang mga Santos magkapundok mao ang Zion.”¹¹ Mipasabut usab siya og maayo sa kaimportane sa templo alang sa Zion ug sa panagpundok, namahayag nga “kon asa kita makatukod og una og usa ka [templo], mao kana ang dapit.”¹² Gilauman ni Joseph nga ang usa ka siyudad sa templo sama sa Nauvoo magsilbing sentro sa panagpundok, ug nga ang mga stake sa Zion matukod sa daghang mga dapit, ang matag usa magsilbing usa ka dangpanan alang sa mga matinud-anon.¹³

Ang mga Santos sa Ulahing mga Adlaw mipadayon sa paglaum nga makabalik sa Distrito sa Jackson, Missouri. Sa samang higayon, ang mga lider sa Simbahan sama ni Brigham Young nagtudlo sa kaimportante sa pagtukod sa Zion sa bisan asang dapit nga nahimutang ang mga Santos. Dili pa lang dugay human sa ilang pagpahiluna didto sa Walog sa Salt Lake, si Presidente Young namulong kabahin sa ilang nagkadako nga siyudad isip usa ka Bag-ong Jerusalem ug sa pagpabarug sa Templo sa Salt Lake isip ang sentro sa panagpundok.¹⁴

Niadtong mga 1950 ug sa mga 1960, ang Simbahan misugod sa pagpalig-on sa mga stake sa Zion sa daghang mga lokasyon sa tibuok kalibutan. Naghulagway niining paningkamot, si Elder Spencer W. Kimball mipasabut nga “ang Unang Kapangulohan ug ang Napulog Duha nakakita og dakong kaalam sa daghang Zion, daghan ang mga dapit nga pundukanan diin ang mga Santos sa ilang kaugalingong mga kultura ug nasud makalihok isip usa ka pangpatubo diha sa pagpalig-on sa gingharian.”¹⁵ Karon, ang mga Santos sa Ulahing mga Adlaw nagpundok sa lokal nga mga stake sa Zion ug nagtukod og mga templo sa daghang mga nasud, ug ang mga lider sa Simbahan mihatag og gibug-aton sa kaimportante sa pagkahimong mga tawo kinsa nagpakabuhi sa mga sumbanan sa Zion—pagkahiusa, pagkadiosnon, ug gugma nga putli.¹⁶

May Kalabutan nga mga Hisgutanan: Gathering of Israel, Jackson County Violence