“Pagpahiuli sa Aaronic Priesthood,” Mga Hisgutanan sa Kasaysayan sa Simbahan
“Pagpahiuli sa Aaronic Priesthood”
Pagpahiuli sa Aaronic Priesthood
Sa sunod-sunod nga mga sulat nga gimantala niadtong 1834, si Oliver Cowdery misulat sa labing unang detalyado nga pagsugilon sa pagpakita ni Juan Bautista kang Cowdery ug Joseph Smith niadtong 1829 sa Harmony, Pennsylvania. Sumala pa ni Cowdery, ang pagbisita ni Juan Bautista nahinabo tungod sa paghubad sa 3 Nephi nga naghulagway sa pagtugyan ni Jesukristo sa katungod sa pagbunyag ngadto sa iyang mga disipulo sa karaang panahon. Ang duha ka tawo naghunahuna kon ang mga bunyag sa milabay nga mga siglo napahigayon ba pinaagi sa tukma nga katungod. Nangita og tubag niini nga mga pangutana, miadto sila sa usa ka hilit nga lugar duol sa panimalay ni Joseph aron sa pagpangutana sa Dios. “Ang tingog sa Manunubos namulong og kalinaw ngari kanamo,” mihinumdum si Cowdery, ug usa ka anghel ang “mikanaog sinul-oban sa himaya, ug mihatag sa gipaabut nga mensahe,”1
Gitugyan ni Juan Bautista ang Aaronic priesthood diha ni Joseph Smith.
Ang duha ka lalaki mipamatuod nga miluhod sila atubangan sa anghel kinsa “mipandong sa iyang mga kamot kanamo” ug miingon, “Diha kaninyo nga akong kauban nga mga sulugoon sa ngalan sa Mesiyas ako motugyan sa pagkapari [priesthood] ni Aaron.” Bisan kon karon aduna na silay katungod sa pagbunyag sa usag usa pinaagi sa tubig, ang anghel mipahayag nga kini nga priesthood wala maghatag kanila og katungod sa paghatag sa gasa sa Espiritu Santo. Ang anghel mipaniguro kanila nga ang “gahum sa pagpandong sa mga kamot, alang sa gasa sa Espiritu Santo” muabut “sa tukmang panahon.” Gipaila niya ang iyang kaugalingon nga si Juan, “kadto gihapon nga gitawag og Juan Bautista sa Bag-ong Tugon,” ug miingon nga siya nagbuhat “ubos sa panudlo ni Pedro, Santiago, ug Juan, kinsa naghupot sa mga yawe sa pagkapari ni Melchizedek.” Si Joseph Smith ug Oliver Cowdery mipahayag nga kini nga kasinatian nahitabo niadtong Mayo 15, 1829.2 Sa dihang ang panan-awon natapos, miadto sila sa duol nga Suba sa Susquehanna ug mibunyag sa usag usa.
Ang detalyadong personal nga pagsugilon ni Joseph Smith ug Oliver Cowdery gisulat pipila ka tuig ang milabay gikan sa pagpakita ni Juan Bautista, apan ang gimantala ug ang wala gimantala nga tinubdan duol kaayo nga pagkasulat sa panghitabo mismo nga nagtino sa kainsakto sa ilang panumduman. Sama pananglit, usa ka dili Mormon nga pamantalaan mireport sa pangangkon ni Cowdery sa pagkadawat og tahas gikan sa langitnong mga bisita pipila ka bulan human sa pagmantala sa Basahon ni Mormon.3 Si Joseph Smith sa wala madugay mipasabut nga sa sinugdanan, siya ug si Cowdery nagduha-duha sa pagpaambit sa mga detalye sa ilang kasinatian “tungod sa espiritu sa pagpanggukod” diha sa ilang lugar.4
Ang 1834 nga pagsugilon ni Cowdery gihimo isip kabahin sa sayong paningkamot ni Joseph sa pagrekord ug pagmantala sa kompleto nga kasaysayan sa Simbahan. Sa iyang unang gisulat nga kasaysayan, nga gibuhat sa Ohio niadtong 1832, si Joseph misaad nga mosaysay sa mga unang importanting mga kalihokan nga nahitabo sa sayong bahin sa kasaysayan sa simbahan lakip na ang pagdawat sa “balaang Priesthood” pinaagi sa pagpangalagad sa mga anghel.5 Ang paningkamot sa pagmantala sa sinugdanan nalangay sa dihang ang mga manggugubot miguba sa pang-imprinta sa Simbahan didto sa Independence, Missouri, niadtong 1833, ug ang kasaysayan mismo miagi og pipila ka mga kausaban ug paghugpong-hugpong atol sa tibuok nga kinabuhi ni Joseph. Ubos sa direksyon ni Joseph, ang mga klerk sa wala madugay mihiusa sa gisugilon ni Cowdery uban sa dugang nga impormasyon nga gihatag ni Joseph sa unsa ang makita karon sa seksyon 13 sa Doktrina ug mga Pakigsaad ug diha sa Perlas nga Labing Bililhon (Joseph Smith — Kasaysayan 1: 68 – 72).6
Bisan og ang pulong Aaronic Priesthood wala makita sa mga pagpadayag ni Joseph Smith hangtud 1834, ang konsepto sa ubos nga pagkapari [priesthood] itandi sa mas dako, o taas, ang Biblia ug ang Basahon ni Mormon parehong naghisgut sa pagkapari.7 Ang pag-usab ni Joseph Smith sa Exodo (kabahin sa iyang dinasig nga paghubad sa Biblia) sa ting-init niadtong 1832 mipakita og kalainan tali sa labaw ug sa mas ubos nga mga pagkapari [priesthood].8 Usa ka pagpadayag nga nadawat ni Joseph sa misunod nga Septyembre mipasabut nga ang mas ubos nga pagkapari, nga gihatag ngadto kang “Aaron ug sa iyang mga binhi,” nagpasabut nga “ang ebanghelyo sa pagpangandam, nga ang ebanghelyo mao ang ebanghelyo sa paghinulsol ug sa Bunyag, ug sa kapasayloan sa mga sala, ug sa Balaod sa kalibutanon nga mga sugo.”9
Sa dihang si Joseph Smith ug si Oliver Cowdery unang miorganisar sa Simbahan sa sayong bahin sa 1830, ilang gibahin ang mga responsibilidad sa pipila ka mga katungdanan [office], pinasubay sa mga pakisayran [references] diha sa Biblia ug sa Basahon ni Mormon. Kining mga katungdanan sama niadtong ubang mga simbahan sa ilang panahon, nga kasagaran usab mipahimutang sa ilang mga kongregasyon subay sa mga sumbanan sa Bag-ong Tugon ug mipili og mga opisyales sa Simbahan sama sa mga deacon, teacher, priest, elder, ug bishop.10 Sa sinugdanan, kining mga opisyales sa bag-ohay nga gitukod nga Simbahan wala gyuy kalabutan sa Aaronic o Melchizedek nga mga Pagkapari. Paglabay sa panahon, dugang nga mga pagpadayag mihatag og instruksyon ni Joseph Smith kon unsaon pagpahiuyon sa organisasyon sa Simbahan diha sa katungod sa pagkapari [priesthood authority], ug pagka-1835, ang mga katungdanan ug mga buluhaton labaw pa gyud nga giorganisar ubos sa awtoridad sa Aaronic ug Melchizedek nga mga Pagkapari.11
May kalabutan nga mga Hilisgutan: Pagpahiuli sa Melchizedek Priesthood, Hubad sa Basahon ni Mormon