Bishop

Sa Pebrero 4, 1831, si Joseph Smith nakadawat og pagpadayag nga nagtudlo kang Edward Partridge isip unang bishop sa Simbahan.¹ Pipila lang ka mga adlaw human sa iyang pagkapili, laing pagpadayag ngadto ni Joseph Smith mipasabut nga ang tahas sa bishop mao ang pagdumala sa pagpatuman sa bag-ong gipadayag nga balaod sa pagpahinungod. Sumala sa pagpadayag, ang bishop makadawat og gipahinungod nga mga kabtangan gikan sa mga miyembro sa Simbahan ug magdumala niadtong mga kabtangan alang sa kaayohan sa mga kabus ug sa pagpamalit ug yuta diha sa Zion.² Niadtong Hulyo 1831, laing pagpadayag ang nagsugo kang Bishop Partridge sa pagbalhin ngadto sa Distrito sa Jackson, Missouri, diin mahimo siyang makapalit og yuta ug ibahin-bahin kini ngadto sa mga lote, o mga kabilin, alang niadtong mga Santos nga nagsunod sa balaod sa pagpahinungod.³

hulagway ni Edward Partridge — Edward Partridge, unang bishop sa Simbahan.

Usa ka pagpadayag sa Nobyembre 1831 ngadto ni Joseph Smith mipalapad sa mga katungdanan sa bishop: siya ang magdumala “sa tanan nga temporal nga mga butang” sa Simbahan ug usab “mahimo nga usa ka maghuhukom sa Israel.”⁴ Pipila ka bulan ang milabay, si Joseph Smith nakadawat og laing pagpadayag nga padayong mihatag og gibug-aton nga ang bishop “molingkod sa paghukom,” mangalagad sa balaod sa pagpahinungod, ug mahimong may tulubagon ngadto sa Dios kon giunsa niya sa pagbuhat ang iyang mga katungdanan.⁵

Niadtong 1835, si Joseph Smith pinaagi sa inspirasyon miusab sa duha ka nahaunang mga pagpadayag aron sa pagpatin-aw sa posisyon ug mga katungdanan sa usa ka bishop. Siya mipasabut gayud nga ang “tinuod nga mga kaliwat ni Aaron” adunay “pinasubay sa balaod nga katungod ngadto sa kaobispohan, kon sila mga unang natawo sa mga anak ni Aaron.” Kon dili, usa ka high priest ang matawag aron ibutang sa katungdanan.⁶ Agi og dugang, giklaro ni Joseph Smith nga ang bishop mao ang presidente sa Aaronic Priesthood ingon man isip presidente sa korum sa priest.⁷

Tungod kay si Partridge wala na sa Ohio pagkahuman sa Hulyo 1831, si Newel K. Whitney gitudlo pinaagi sa pagpadayag niadtong Disyembre 1831 nga mamahimong bishop didto sa Ohio. Si Partridge ug Whitney mipadayon sa paglihok isip mga bishop didto sa Missouri ug Ohio ug silang duha lang ang bishop sa Simbahan hangtud ang stake naorganisar sa Adam-ondi-Ahman sa Missouri niadtong 1838 ug si Vinson Knight gitawag sa pagserbisyo isip bishop.⁸

Sa dihang ang mga Santos namuyo sa Nauvoo, Illinois, si Partridge, Whitney, ug Knight pulos gitawag nga mahimong mga bishop: ang matag usa sa tulo ka managlahi nga mga ward sa dapit. Ang uban nga mga bishop gitawag sa bag-ong mga stake nga gihimo didto sa Illinois ug sa Iowa Territory, ug ang mga bishop gitawag sa mga kongregasyon sa Simbahan sa mga dapit sama sa Philadelphia. Niadtong Agosto 1842, ang Nauvoo high council mibahin sa Nauvoo ngadto sa 13 ka eklesiastikanhong mga ward ug mitudlo og mga bishop sa matag ward.⁹ Niadtong Abril 1847, si Whitney gipaluyohan isip ang unang Presiding Bishop sa Simbahan, ang katungdanan nga nagpadayon sukad niana.¹⁰

Human miabut ang mga Santos sa Walog sa Salt Lake, ang mga lider sa Simbahan mibahin sa komunidad ngadto sa 19 ka mga ward nga dunay usa ka bishop matag ward. Samtang nagkadako ang Siyudad sa Salt Lake ug bag-ong mga komunidad ang natukod, dugang pang mga ward ang nahimo nga dunay bishop sa matag usa niini. Kini nga mga bishop nagsilbing eklesyastikal nga mga opisyal sa matag ward, midumala sa mga resibo sa ikapulo ug sa ubang mga donasyon, mipahigayon og mga miting sa Dominggo, ug mitawag sa mga miyembro sa ward ngadto sa nagkadaiyang mga posisyon. Sama sa kanhi nga mga bishop, sila sa kinatibuk-an inabagan sa duha ka mga magtatambag.

Ang mga responsibilidad sa bishop napalapdan sa mga tuig 1900 sa dihang si Presidente Joseph F. Smith ug ang ubang mga lider miorganisar pag-usab sa mga korum sa Aaronic Priesthood nga gilangkuban sa mga kabatan-onan. Ang mga bishop gitahasan sa pag-awhag sa mga batan-ong lalaki sa ilang mga responsibilidad sa priesthood ug sa pagdumala sa tanang korum sa Aaronic Priesthood sa ilang mga ward. (Kini sa kanhiay ubos sa hurisdiksyon sa mga stake.)¹¹

Karon, ang mga bishop gitawag sa pagdumala sa tanang mga ward sa Simbahan. Sila moatiman sa mga temporal ug espiritwal nga mga panginahanglan sa mga miyembro sa ilang panon ug modumala sa hapit tanang mga aspeto sa Simbahan sulod sa ilang mga ward.

May Kalabutan nga mga Hisgutanan: Consecration and Stewardship