Hyrum Smith

Si Hyrum Smith natawo niadtong Pebrero 9, 1800. Sa bata pa, talagsaon siya nga estudyante, ug sa edad nga 11 misulod siya sa Moor’s Indian Charity School, diin nadawat niya ang labing pormal nga edukasyon kay ni bisan kinsa sa mga anak nga Smith. Isip hamtong, miserbisyo siya isip usa ka trustee sa Palmyra school board ug mi-interbyu og mga kandidato nga magtutudlo, lakip na ang nagbiyahe nga magtutudlo nga si Oliver Cowdery.¹

Human sa kamatayon sa iyang igsoon nga si Alvin, si Hyrum ang miabaga sa dakong bahin sa panggasto sa pamilya. Naminyo siya kang Jerusha Barden pagka-Nobyembre 1826. Isip usa sa Walo ka mga Saksi, mipamatuod si Hyrum sa katinuod sa mga palid sa Basahon ni Mormon, ug sa kadugayan mitabang siya sa pag-imprinta sa Basahon ni Mormon. Siya ang nangulo sa unang branch sa Simbahan sa Colesville, New York, hangtud nga ang grupo mibiya padulong sa Ohio niadtong 1831.²

Si Hyrum ug Jerusha adunay unom ka anak. Nasinati nila ang subo nga pagkamatay sa ilang dos anyos nga anak nga babaye niadtong 1832. “Gitawag si Mary gikan sa karon ngadto sa kahangturan,” misulat si Hyrum sa iyang journal. “Namatay siya diha sa akong mga bukton. Ang ingon nga adlaw wala pa nako masinati sukad ug O unta itugot sa Dios nga makita namo siya pag-usab sa mahinungdanong adlaw sa katubsanan nga dili na magkabulag pa.”³

Miserbisyo si Hyrum og pipila ka misyon sa unang mga adlaw sa Simbahan ug apil sa unang mga high priest nga gi-orden sa Kirtland. Mitabang siya sa pag-organisar sa Tulunghaan sa mga Propeta ug kabahin sa usa ka komite nga midumala sa pagtukod sa Templo sa Kirtland. Pagka-1834, miapil si Hyrum sa Kampo sa Israel (Kampo sa Zion), ug gitudlo siya ngadto sa High Council sa Kirtland.⁴

Namatay si Jerusha pagka-1836 sa dili pa lang dugay human manganak og batang babaye, ug si Hyrum nagminyo og usab paglabay sa pipila ka bulan.⁵ Isip bag-ong gitawag nga Ikaduhang Magtatambag sa Unang Kapangulohan, mibiya siya uban sa iyang ikaduhang asawa, si Mary Fielding Smith, padulong sa Far West, Missouri. Samtang didto sa Missouri, gibilanggo si Hyrum sa Liberty Jail uban sa iyang igsoong si Joseph.⁶

Human mibalhin ang mga Santos ngadto sa Nauvoo, Illinois, miabaga si Hyrum og dagkong mga katungdanan sa pagpangulo. Gipulihan niya ang iyang amahan, si Joseph Smith Sr., isip patriyarka sa Simbahan niadtong 1841 ug gitudlo sa katungdanan sa Assistant nga Presidente sa Simbahan, usa ka posisyon nga gibakantehan ni Oliver Cowdery.⁷ Sa usa ka pinadayag nga nadawat pagka-Enero 1841, ang Ginoo miingon, “Bulahan ang akong sulugoon nga si Hyrum Smith, kay Ako, ang Ginoo, nahigugma kaniya tungod sa kaligdong sa iyang kasingkasing, ug tungod kay siya nahigugma niana nga matarung diha sa akong atubangan.”⁸ Miserbisyo si Hyrum isip sakop sa Konseho sa Siyudad sa Nauvoo, sakop sa Nauvoo Legion, ug bise mayor sa Nauvoo. Gitudlo usab siya ngadto sa komite sa Templo sa Nauvoo ug sa Konseho sa Kalim-an.⁹ Bisan pa sa mga pagduha-duha, gidawat ni Hyrum ang doktrina sa dinaghan nga kaminyoon ug pagka-1843 nakigminyo kang Catherine Phillips ug sa biyudang igsoon sa iyang ikaduhang asawa, si Mercy Rachel Fielding Thompson.¹⁰

Sa dihang nagkauyon ang Konseho sa Siyudad sa Nauvoo nga gub-on ang imprintahanan sa Nauvoo Expositor pagka-Hunyo 1844, naputos sa kontrobersiya si Joseph ug Hyrum. Magkauban, gibutang sa managsoon ang siyudad ubos sa martial law aron sa pagpanalipod sa mga lumulupyo gikan sa mga hulga sa mga panon sa manggugubot. Silang duha gipasakaan sa korte og kasong pagbudhi tungod sa ilang martial law nga mando ug kinahanglang moadto sa Carthage, Illinois, alang sa husay.¹¹ Samtang naghulat sa husay si Hyrum ug Joseph, usa ka panon sa manggugubot ang miataki sa Bilanggoan sa Carthage, mipatay sa managsoon pinaagi sa sunod-sunod nga pagpusil. Ang mga Santos sa Ulahing mga Adlaw mipasidungog ni Hyrum isip usa ka martir sukad niini. Daghan sa iyang mga kaliwat nahimong mga lider sa Simbahan, lakip sa iyang anak nga si Joseph F. Smith ug apo nga si Joseph Fielding Smith, kinsa ang matag usa nakaserbisyo usab isip Presidente sa Simbahan.

May Kalabutan nga mga Hilisgutan: Joseph Sr. and Lucy Mack Smith Family, Deaths of Joseph and Hyrum Smith