Pagtukod og Templo

Ang mga templo nahimong kabahin sa kasinatian sa Santos sa Ulahing mga Adlaw hapit sukad sa pagsugod sa Simbahan.¹ Daghang mga pagpadayag nadawat ni Joseph Smith sa wala pa ang 1833 nga naghatag og piho nga detalye kon asa mopalit og yuta ug unsaon sa pagtukod sa “balay sa Ginoo” diin ang himaya sa Dios magpuyo.² Nagpasabut ngadto sa mga pagpadayag ug sa dili mominos sa usa ka panan-awon, si Joseph ug ang iyang mga magtatambag diha sa Unang Kapangulohan misugo sa pagpatukod sa unang balay sa Ginoo didto sa Kirtland, Ohio.³ Kini ug ang ubang giplano nga mga templo didto sa Independence, Far West, ug Adam-Ondi-Ahman gituyo alang sa pagsimba sa kongregasyon ug ubang mga kalihokan lakip ang tanang mga bahin sa relihiyoso ug komunidad nga buluhaton sa Santos sa Ulahing mga Adlaw. Samtang dugang nga mga templo gitukod, una sa Nauvoo ug sa kadugayan didto sa Utah, nahimong nagkadako ang ilang paghatag og gibug-aton diha sa mga pagbuhat sa sagradong ordinansa nga kini nabantog karon.

Ang mga plano sa pagpahimutang sa mga kwarto sa templo nausab uban sa matag henerasyon samtang ang mga lider ug mga miyembro sa Simbahan nakakita og mga oportunidad alang sa mga pagpahiangay. Ang Presidente sa Simbahan nga si John Taylor miuyon sa pag-usab sa desinyo sa laraw sa pagpahimutang sa mga kwarto sa Templo sa Salt Lake kaniadtong mga 1880. Gipanguha ni Joseph F. Smith ang dagkong pundukanang mga kwarto gikan sa mga templo nga gitukod sa mga 1910. Sa 1953 si David O. McKay mipalambo sa paggamit og video aron sa paghimo sa buluhaton sa templo nga mas masabtan ngadto sa mga dili kamaong mosulti og Iningles. Gidugangan ni Spencer W. Kimball ang kabatid sa pagtrabaho ug gipaubsan ang mga bili sa pagtukod ug sa pag-atiman sa mga templo. Ang arkitekturang mga istilo sa pagtukod sa mga templo kadaghanan nagpakita sa uso sa panahon nga kini gitukod.

Arkitektura nga drowing sa silangang atubangan sa Templo sa Salt Lake.

Ang mga Presidente sa Simbahan nagdumala sa tanang mga bahin sa desinyo sa templo, pagtukod, ug sa paggamit. Ang kadaghanon sa templo nga gitukod ug ang personal na pagbansay ug interes sa mga Presidente mi-impluwensya sa ilang pagdumala sa pagtukod sa mga templo. Mabinantayon nga nakigtrabaho si Joseph Smith uban ni arkitekto William Weeks sa daghang mga detalye sa pagtukod sa Templo sa Nauvoo.⁴ Gisunod ni Brigham Young ang sumbanan ni Joseph pinaagi sa pakigtrabaho nga mabinantayon uban sa mga arkitekto sa mga templo nga gitukod sa Utah, nga nagsunod sa mga desinyo ug mga plano sa pagpahimutang sa mga kwarto sa Templo sa Nauvoo.⁵ Mipaigo sa mga gastuhanan si Joseph F. Smith ug Heber J. Grant alang sa mga templo nga gitukod ubos sa ilang pagmando ug mihatag og kinatibuk-ang mga pag-uyon alang sa tanang mga plano ug mga desinyo. Si Gordon B. Hinckley mipahibalo sa panginahanglan og daghang mas gagmay nga mga templo diha sa nagkadaghang layo nga mga dapit sa kalibutan sa hinapos sa ika-20 nga siglo. Pinaagi sa pagdasig, mihatag usab siya og unang plano sa pagpahimutang sa mga kwarto nga buhaton sa mga arkitekto alang niining bag-ong mga templo.⁶

pagtukod sa Templo sa Hawaii — Ang templo sa Hawaii nagpadayong gitukod, sa mga 1919.

Ang mga miyembro sa Simbahan nga may kasinatian ug nabansay sa arkitektura ug pagtukod kasagaran nangulo sa desinyo sa templo. Ang mga arkitekto sa templo sa ika-19 nga siglo sama ni Truman O. Angell ug William H. Folsom migamit sa ilang kasinatian isip mga karpintero. Sayo sa ika-20 nga siglo, ang Simbahan mipasiugda og mga kompetisyon sa desinyo alang sa mga templo sama niadtong anaa sa Cardston, Laie, Mesa, ug Idaho Falls. Ang tanan nga mga arkitekto nga midaug niini nga mga kompetisyon nabansay diha sa mga eskwelahan sa arkitektura. Sa ikaduhang katunga sa ika-20 nga siglo, usa ka full-time nga empleyado sa Simbahan midumala sa desinyo sa templo ug usa ka team sa mga empleyado miandam sa mga dokumento sa pagtukod. Bag-ohay lamang, ang gikontrata nga mga kompanya sa arkitektura ang ga-andam sa mga dokumento sa pagtukod ubos sa direksyon sa mga arkitekto sa Simbahan.

Sukad sa mga 1830, ang ikapulo ug ubang mga donasyon sa miyembro sa Simbahan ang naggasto sa pagtukod sa templo. Ang mga miyembro sa ika-19 nga siglo mihatag og panahon ug mga materyales sa pagtukod og mga templo nga nagrepresentar sa ilang hingpit nga sakripisyo ug paghalad. Ang konsepto sa paggamit og hinatag nga trabaho sa pagtukod og mga templo gigamit pag-usab sa mga 1950 uban sa programa sa misyonaryo nga trabaho, diin nag-empleyo og daghang lokal nga mga miyembro isip mga misyonaryo sa pagtukod og mga meetinghouse, mga eskwelahan, ug mga templo sa tibuok kalibutan. Sa hinapos sa ika-20 ug sayo sa ika-21 nga mga siglo, ang mga kompaniya sa pagtukod ang kasagaran mihimo sa pagtukod, nagtrabaho ubos sa kontrata sa Simbahan ug ubos sa direksyon sa Presiding Bishopric ug sa mga empleyado sa Simbahan.

Daghang mga kausaban sa estilo, desinyo, ug pagtukod sa templo ang nahitabo samtang ang gidaghanon sa mga templo mitubo. Sa 1980, 17 ka mga templo ang magamit; usa ka dakong pagtubo sa pagtukod og templo sa mga 1998 ug 2001 midala sa gidaghanon nga labaw sa 100, diin mihimo niini nga posible alang sa kinadaghanan sa mga Santos sa pagpuyo sulod sa 200 ka mga milya (320 ka mga kilometro) sa templo. Sa pagka-Abril 2019 gisuportahan sa Simbahan ang 162 nga magamit nga mga templo, uban sa laing 47 nga gianunsyo o nagpadayon nga gitukod.

Kalabut nga mga Hisgutanan: Templo sa Kirtland Temple, Templo sa Nauvoo Temple, Templo sa Salt Lake Temple, Mga Pagpahinungod sa Templo ug Pagpahinungod nga mga Pag-ampo, Anghel Moroni