“George Albert Smith,” Mga Hisgotanan sa Kasaysayan sa Simbahan (2022)
“George Albert Smith,” Mga Hisgotanan sa Kasaysayan sa Simbahan
George Albert Smith
Si George Albert Smith miserbisyo isip ang ikawalo nga Presidente sa Simbahan tali sa 1945 ug 1951. Natawo sa Abril 4, 1870, midako siya sa Siyudad sa Salt Lake, Utah, uban ang iyang inahan, si Sarah Farr Smith, ug ang iyang amahan, si John Henry Smith (sa kadugayan usa ka Apostol ug Magtatambag diha sa Unang Kapangulohan). Isip usa ka batan-on, mitrabaho si George sa usa ka pabrika ug dakong tindahan sa Siyudad sa Salt Lake, nakaangkon og katungdanan diha sa kompaniya nga iyang giila nga nagpalambo sa iyang pamatasan sa pagtrabaho. Sa 1888, misugod siya og trabaho isip usa ka manunukod og yuta sa agianan sa tren diha sa mga kamingawan sa kasadpang Estados Unidos ug miantos sa permanenting kadaot sa mata tungod sa kasilaw sa hayag sa adlaw. Bisan pa sa pisikal nga kalisod, gidawat ni George ang usa ka mission call gikan sa Presidente sa Simbahan nga si Wilford Woodruff sa pagduaw sa habagatang Utah ug sa pag-organisar og mga stake chapter sa Young Men’s Mutual Improvement Association [Kapunongan sa Batan-ong mga Lalaki sa Pagtinabangay sa Pagpalambo].
Human mipauli gikan niining mubo nga misyon, gipangolitawhan ug dayon giminyoan ang iyang kababata nga silingan ug hinigugma, si Lucy Woodruff. Tulo ka semana sa wala pa ang kasal, nadawat ni George ang usa ka mission call ngadto sa Southern States Mission, ug wala pay usa ka bulan sa ilang kaminyoon, nakita sa mga Smith ang ilang mga kaugalingon nga magpuyo og daghang kilometro ang gilagyoon. Pipila ka bulan ang milabay, nakig-uban si Lucy kaniya diha sa mga opisina sa misyon diin siya miserbisyo isip ang sekretaryo sa misyon, ug sa ilang kahinangop sa wala madugay siya [si Lucy] nakadawat og usa ka mission call sa pagtabang kaniya. Sa duha ka higayon mga 16 ka bulan ang gilagyoon, ang presidente sa misyon, si J. Golden Kimball, mibiyahe ngadto sa Siyudad sa Salt Lake ug gibilin ang pagdumala sa misyon ngadto ni George.1 Napulog pito ka bulan human sa pagpauli gikan sa ilang duha ka tuig nga misyon, gikahinangop sa mga Smith ang ilang unang anak, usa ka babaye nga ginganlan og Emily. Nanganak si Lucy og duha pa sulod sa 10 ka tuig, usa ka anak nga babaye nga ginganlan og Edith ug usa ka anak nga lalaki nga ginganlan og George Albert Jr. Nahinumdom si Edith sa iyang amahan ingon nga mapinanggaon kaayo ug manggihatagon ngadto sa tanang sakop sa ilang pamilya.2
Sa Oktubre 1903, mibiya si George sa iyang trabaho sa opisina sa Siyudad sa Salt Lake sa pagtambong og usa ka sesyon sa kinatibuk-ang komperensiya ug, wala makakaplag og kalingkoran diha sa Tabernacle, mihukom sa pagdala sa iyang anak nga mga babaye ngadto sa Utah State Fair apan nahingangha sa pagkahibalo didto sa panimalay nga siya gitawag isip usa ka Apostol didto sa sesyon nga wala niya matambongi.3 Gi-set apart siya sa Presidente sa Simbahan nga si Joseph F. Smith ug dihadiha dayon misugod sa pagtuman sa iyang mga katungdanan, bisan pa sa pisikal ug mental nga kaugtas. Sa tibuok niyang apostolikanhong serbisyo, si Elder Smith misagubang og depresyon ug kakulba, diin sa pipila ka mga higayon mibilin kaniya sa kahugno ug pisikal nga kaluya. Taudtaod human sa pagpangamuyo ngadto sa Dios nga tugotan na lang siyang mamatay, siya dihay daghang talagsaong espirituhanong mga kasinatian nga mipahiuli sa iyang pagsalig ug mihatag kaniya og kalig-on sa paglahotay. Human sa pagpahulay ug pagpabaskog sa 1909, mibalik siya sa iyang mga katungdanan sa 1912. Ang depresyon wala sa hingpit mibiya kaniya bisan pa sa iyang tumang kakugi nga naangkon ang mga pag-uswag, apan siya mipadayon og paningkamot sa pagtuman sa iyang mga katungdanan ug pag-amuma sa iyang pamilya.
George Albert Smith, mga 1920.
Isip usa ka Apostol, gidumala niya ang European Mission tali sa 1919 ug 1921, mabinantayong mitrabaho uban sa Young Men’s Mutual Improvement Association ug sa Boy Scouts of America [Lalaking mga Scout sa America], mitabang sa pagpatunhay sa mga dapit sa kasaysayan sa Simbahan diha sa New York, ug miayom sa pipila ka miaging pagdinumtanay nga mga relasyon tali sa paryente sa pamilyang Smith nga mga miyembro sa Simbahan ug sa Reorganized Church of Jesus Christ of Latter Day Saints.4
Human sa kamatayon ni Heber J. Grant sa 1945, si George Albert Smith gipaluyohan ug gi-set apart isip ang ikawalong Presidente sa Simbahan.5 Sa panahon sa iyang administrasyon, giugmad niya ang gugma ug kalooy isip ang timailhang mga hiyas sa pagpuyo sa ebanghelyo ug gipakita ang kalooy sa pag-ayom sa mga panagbangi. Mibisita siya sa mga Santos sa Ulahing mga Adlaw sa Mexico ug gipangulohan ang panag-uli sa Third Convention, usa ka nahimulag nga pundok nga milambo sulod sa mga ward ug mga branch didto 10 ka tuig ang milabay.6 Human sa iyang pagkamatay atol sa iyang adlawng natawhan sa 1951, si George Albert Smith napasidunggan og maayo alang sa iyang sinseridad ug tumang gugma alang sa mga tawo.7
Alang sa dugang pang impormasyon mahitungod sa mga panghitabo ug mga tema sa kinabuhi ni George Albert Smith, tan-awa sa Prophets of the Restoration nga mga video sa history.Churchof JesusChrist.org o diha sa Gospel Library nga app.
Kalabot nga mga Hisgotanan: Young Men Organizations [Mga Organisasyon sa Batan-ong mga Lalaki], Third Convention [Ikatulong Kombinsiyon], Other Latter Day Saint Movements [Ubang mga Kalihokan sa Santos sa Ulahing mga Adlaw]