Pagbiya gikan sa Nauvoo

Tunga-tunga sa Pebrero ug Septyembre 1846, liboan ka mga Santos sa Ulahing mga Adlaw ang mibiya sa Nauvoo, Illinois. Sa milabayng tinglarag, ang mga lider sa Simbahan naghimo og plano alang sa usa ka dakong pagpamalhin, nagtinguhang mag-organisar og 25 ka mga grupo sa tag-100 ka mga karwahe nga ang matag-usa mobiya sa tingpamulak sa 1846. Ang nagsakang gidaghanon sa mga panag-away, hinuon, nag-aghat ni Brigham Young ug ubang mga lider sa pagpakigsabot og kalinaw tali sa mga kaaway atol sa tinglarag sa 1845, diin gitakda nga ang mga miyembro sa Simbahan magsugod sa ilang pangpamalhin nianang tingtugnaw. Gikan sa Pebrero 4 hangtud sa Marso 1, 1846, mga 400 ka mga karwahe ang nagdala sa mga 2,000 ka mga Santos sa Ulahing mga Adlaw tabok sa Suba sa Mississippi ngadto sa usa ka kampo sa Sugar Creek, Iowa. Laing 12,000 ka mga Santos ang mitabok ngadto sa Iowa atol sa tingpamulak ug ting-init, ug ang nahabiling gatusan miuban sa pagpamalhin pagka-Septyembre.¹ Ang mga miyembro sa Simbahan mipakigsaad nga motabang sa mga kabus taliwala kanila aron makatapos sa panaw. Ang mga lider sa Simbahan misulay sa pagbaligya sa Templo sa Nauvoo ug ubang mga kabtangan sa Simbahan aron sa pagtabang sa mga kabus, apan wala silay makit-an nga mopalit sa templo.

Ang ubang nangaging paghulagway sa pagbiya nagsugyot nga ang manggugubot mipugos sa mga Santos sa pagtabuk sa nigahi nga Suba sa Mississippi ibabaw sa yelo. Bisan tuod ang unang mga grupo mibiya og sayo kay sa orihinal nga plano, ang kasabutan nga gihimo sa mga lider sa Simbahan sa milabayng tinglarag nakapugong sa mga pag-ataki sa manggugubot. Ang kadaghanan sa mga grupo nakatabuk sa suba nga malinawon gamit ang mga barko, apan ang pipila nakatabuk tingali ibabaw sa yelo gikan sa Pebrero 25 hangtud Marso 1.²

Samtang ang ting-init nagpadayon, ang mga kaaway sa Simbahan dinha sa dapit nag-anam og kahigwaos uban sa pipila ka mga Santos sa Ulahing mga Adlaw nga nahabilin sa Nauvoo. Ang tensyon tali sa mga anti-Mormon ug mga lumulupyo sa Nauvoo––lakip na ang daghang dili mga Mormon kinsa mibati sa lisod nga kahimtang sa mga Santos––misangko sa kinatas-an niadtong Septyembre 1846. Usa ka grupo sa pipila ka gatus nga armadong mga anti-Mormon ang miataki sa Mormon ug dili Mormon nga mga tigpanalipod sa siyudad. Ang duha ka habig nagbinayluay og pabuto sa kanyon ug pusil, miresulta sa dili mominos sa tulo ka mga patay ug pipila ka dosena nga mga naangol. Usa ka walay gidapigan nga komite ang misulod aron makigsabot sa pagpahunong sa panag-away, ug ang nahabiling mga Mormon ug ilang mga dumadapig napugos sa dinaliang pagbiya sa siyudad.³

Kadaghanan sa namakwit nga mga Santos sa Ulahing mga Adlaw sa tuig 1846 naabut sa Concil Bluffs, sa kasadpan sa Iowa, apan daghan ang nagpabiling nagkatibulaag sa palibut nga mga dapit sulod sa daghang mga bulan o katuigan. Pipila lamang ka pamilya ang nagpabilin sa Illinois.