Makasaysayanon nga mga Dapit sa Simbahan
Sugod sa sayong bahin sa mga 1900, gipalit ug gipreserbar sa Simbahan ang pipila sa labing mahinungdanon nga mga dapit sa Pagpahiuli. Ang katuyoan sa Simbahan sa pagpreserbar ug pagpadagan niini nga mga dapit mao ang pagsaksi sa mga panghitabo sa Pagpahiuli, sa mga panalangin sa Dios sa Iyang katawhan, ug sa pagkamaunongon sa mga Santos sa Ulahing mga Adlaw kinsa misakripisyo aron sa pagtukod sa gingharian sa Dios. Ang mga Santos sa Ulahing mga Adlaw karon personal ug birtuwal nga mobisita sa makasaysayanon nga mga dapit aron makasinati sa mga lugar nga may kalabotan kang Propeta Joseph Smith ug sa sayong kasaysayan sa Simbahan.
Niadtong 1902, ang Unang Kapangulohan miestablisar og Bureau of Information on Temple Square—ang labing makita ug gibisita nga makasaysayanong dapit sa Simbahan. Mihatag og mga pagsuroy ang lokal nga mga misyonaryo, ug daghang pundok sa mga bisita ang miabot aron sa pagkat-on mahitungod sa mga gambalay ug sa Simbahan. Kini nga paningkamot malamposon kaayo nga niadtong 1905, samtang nagsingabot ang usa ka gatos nga kasaulogan sa pagkatawo ni Joseph Smith, ang Unang Kapangulohan mitugot sa pagpalit sa umahan diin natawo si Joseph didto sa Sharon, Vermont. Bisan og napalit na kaniadto sa Simbahan ang pioneer nga sementeryo sa Mount Pisgah, Iowa, niadtong 1886; ang Bilanggoan sa Carthage sa Illinois niadtong 1903; ug bahin sa luna sa templo sa Independence, Missouri, niadtong 1904, ang Lugar nga Natawhan ni Joseph Smith mao ang unang dapit nga piho nga gipalambo isip usa ka dapit sa pagkat-on, inspirasyon, ug relihiyoso nga pagbiyahe [pilgrimage].1 Ang desisyon sa Unang Kapangulohan misugod og unsay mahimong usa ka konektado nga hugpong [network] sa sobra sa duha ka dosena nga makasaysayanon nga mga dapit diha sa Estados Unidos.2
Pundasyon sa lugar nga natawhan ni Joseph Smith sa Sharon, Vermont, sa dihang gipalit sa mga lider sa Simbahan ang yuta niadtong 1905.
Sulod sa mosunod nga pipila ka dekada, ang Simbahan mipalit og dugang nga makasaysayanon nga mga dapit, lakip ang Sagradong Kakahoyan niadtong 1907, ang luna sa Templo sa Far West niadtong 1909, ang Bungtod sa Cumorah niadtong 1923 ug 1928, ang Whitmer nga Umahan niadtong 1926, daghang katigayonan sa Nauvoo sugod niadtong 1937, ug ang luna sa Bilanggoan sa Liberty niadtong 1939.3
Gipaabangan sa Simbahan ang pipila niini nga mga katigayonan ngadto sa mga mag-aabang. Sa ubang mga katigayonan, ang mga lider sa Simbahan mitawag og mga magtiayon aron moserbisyo isip mga mag-uuma ug mga tig-atiman. Sa parehong mga sitwasyon, ang mga tawo usahay manuktok sa mga pultahan ug mohangyo og mga pagsuroy.4 Ang mga bisita pihong interesado sa Bilanggoan sa Carthage. Niadtong 1939, sa pag-awhag ni Bryant S. Hinckley, ang presidente sa Northern States Mission, ang Simbahan mipahiuli sa bahin sa bilanggoan ngadto sa makasaysayanon nga kahimtang niini ug mitawag og magtiayon nga misyonaryo aron sa paghatag og mga pagsuroy, nga miestablisar og usa ka sundanan alang sa ubang mga dapit.5
Gawas nga dagway sa Bilanggoan sa Carthage, Carthage, Illinois.
Sukad sa mga 1960, mitutok ang Simbahan sa paghimo og tukma nga mga pagpahiuli sa orihinal nga mga estruktura ug mga talan-awon, nga naimpluwensiyahan sa mga hilig sa makasaysayanong pagpreserbar diha sa Estados Unidos.6 Ang mga dapit sama sa balay nga troso nga gitukod sa pamilya ni Joseph ug Lucy Mack Smith diha sa ilang umahan sa New York mainampingong gipahiuli ug gisangkapan sa mga gamit sa balay. Ang kulang nga mga estruktura, sama sa nahaunang balay nga troso sa mga Smith, gitukod pag-usab diha sa mga pundasyon sa orihinal. Kining gipahiuli ug subling gitukod nga mga gambalay, nga nahimutang sa makasaysayanon nga mga talan-awon, makatabang sa mga bisita nga mas hingpit nga makahunahuna sa labing sayo nga mga panghitabo sa Pagpahiuli. Sa pipila ka dapit, ilabi na kon nawala ang orihinal nga mga estraktura o ang talan-awon mao ang labing mahinungdanon, ang mga istorya nag-unang gisugilon pinaagi sa mga monumento, mga salida, ug mga exhibit.
Ang nahaunang mga gambalay sa Simbahan, lakip na ang mga templo, mga tabernakulo, ug mga chapel, importante usab nga makasaysayanon nga mga dapit, daghan niini nagpabilin nga aktibong gigamit sa mga miyembro ug mga kongregasyon sa Simbahan. Siyempre adunay gatosan sa ubang mga dapit nga mahinungdanon sa kasaysayan sa Simbahan sa tibuok kalibotan. Daghan niini nga mga lokasyon nagpakita og makasaysayanon nga mga timailhan nga gibutang sa mga gobyerno, mga pamilya, makasaysayanon nga mga katilingban, o sa Simbahan mismo. Ang uban gipahiangay aron gamiton sa lahi nga katuyoan [repurposed] apan gihinumdoman gihapon sa lokal nga mga Santos.
May Kalabotan nga mga Hisgotanan: Bilanggoan sa Liberty, Palmyra ug Manchester, Sagradong Kakahoyan ug Umahan sa Pamilyang Smith