Mga Gasa sa Espiritu

Sa Bag-ong Tugon, si Jesukristo misaad sa Iyang mga disipulo nga “kanila nga motuo maganunot kining maong mga ilhanan,” lakip sa pagpapahawa sa mga yawa, magasulti sa “mga bag-ong sinultihan,” ug sa pag-ayo sa sakit.¹ Sa sayo nga bahin sa mga 1800, hinoon, daghang mga Kristiyano nga nanagdebate kon ang maong mga milagro gituyo ba lamang isip ilhanan sa awtoridad sa karaan nga mga Apostoles o kon nahitabo pa kini sa mga tumutuo sa bisan unsang mga kapanahunan. Ang mga Kristiyano kinsa mituo nga ang mga gasa natapos uban sa mga Apostoles kasagaran gitawag og “cessationist,” samtang kadtong mituo nga kining mga gasa nagpadayon gitawag og “charismatic.” Ang nag-unang mga Santos sa Ulahing mga Adlaw, nagtuo sa mensahe sa Basahon ni Mormon nga “ang adlaw sa mga milagro” wala mihunong,² mao ang mga charismatic: nagtinguha sila ug mipadayag sa mga gasa sa Espiritu sa nagkadaiyang pamaagi.

Ang mga Santos sa wala madugay nakat-on ra, hinoon, nga dili tanang mga gipakita nga charismatic naggikan sa Dios. Sa dihang si Joseph Smith miabut ngadto sa Kirtland gikan sa New York niadtong 1831, nakasaksi siya sa mga panagtigum nga puno sa charismatic nga pamatasan ug nabalaka kon unsaon sa pag-ila sa tiunay nga espirituhanon nga mga gasa gikan sa uban nga mga pagpakita.³ Pinaagi sa mga pagpadayag nga nahatag ngadto sa Propeta, ang mga Santos nakat-on nga ang mini nga mga espiritu makalingla sa mga indibidwal kinsa nagtinguha og espirituhanon nga mga pagpakita alang sa ilang kaugalingong kaayohan ug kana nga mga gasa kinahanglan gamiton sa pagserbisyo ug sa paghiusa.⁴ Ang Ginoo mipatin-aw usab nga kadtong mga naorden sa “pagbantay diha sa Simbahan” makabaton og gasa sa pag-ila kon ang paggamit sa piho nga mga gasa gikan ba sa Dios.⁵ Mipadayon ang mga lider sa Simbahan sa pagtinambagay sa usag-usa ug sa mga Santos mahitungod sa katuyoan ug tukmang paggamit sa espirituhanon nga mga gasa.⁶

Ang mga pamaagi nga ang espirituhanon nga mga gasa napakita sulod sa Simbahan nausab paglabay sa panahon. Pananglitan, niadtong ika-19 nga siglo, ang pagpamulong kabahin sa ug paghubad sa wala mailhi nga mga sinultihan diha sa mga panagtigum sa Simbahan komon ra. Sa kaulahian, nakasinati ang mga miyembro sa Simbahan og gasa sa mga sinultihan nga nagsugod isip balaan nga tabang nga nahatag ngadto sa mga misyonaryo aron sa pagtabang kanila sa pagsangyaw sa ebanghelyo sa langyaw nga mga pinulongan.⁷ Ang mga Santos sa Ulahing mga Adlaw karon nagpadayon sa pagtagamtam sa mga gasa nga gitanyag ngadto sa mga disipulo ni Kristo, nagmatuod nga ang adlaw sa mga milagro wala motapos.

May Kalabutan nga mga Hisgutanan: Gift of Tongues, Healing