Konseho sa Kalim-an

Wala kaabut og upat ka bulan sa wala pa siya mamatay niadtong 1844, si Joseph Smith mipatawag og usa ka konseho aron sa paghisgut sa gisugyot nga mga puy-anan sa mga Santos sa Ulahing mga Adlaw diha sa mga dapit nga niadto gawas na sa Estados Unidos, sama sa California ug Texas. Ang konseho naghisgut dili lamang mahitungod kon unsaon pagdumala sa mga lider sa Simbahan niining mga puy-anan apan kon unsaon pag-establisar og politikanhong gingharian o gobyerno sa pagpangandam alang sa milenyal nga paghari ni Jesukristo. Si Joseph Smith ug iyang mga kauban nagtan-aw niining konseho isip sinugdanan sa samang gingharian. Ang konseho naglangkob og mga 50 ka mga sakop kinsa kasagaran nagtumbok niini isip “Gingharian sa Dios” o ang “Konseho sa Kalim-an.”¹

Tuyo ni Joseph Smith nga lahi ang katuyoan sa konseho gikan sa Simbahan. Samtang ang Simbahan maoy responsable alang sa espirituhanong mga kabalaka ug sa mahangturong kaluwasan sa mga anak sa Dios, ang Konseho sa Kalim-an usa ka politikal o sibiko nga organisasyon giumol aron sa “pagdumala sa mga katawhan sa sibil nga mga butang.” Daghan sa mga pinakasuod nga mga kaubanan ni Joseph miapil sa konseho, lakip na ang sakop sa Unang Kapangulohan, Korum sa Napulog Duha ka mga Apostoles, ug Nauvoo High Council.² Si Joseph midawat usab og tulo ka dili Mormon diha sa konseho.

Ang tinguha sa mga Santos sa Ulahing mga Adlaw sa pagtukod og pundasyon alang sa bag-ong sibil nga panggobyerno kabahin lamang sa tubag sa pagpanggukod nga ilang nasinati sa Missouri. Si Joseph Smith ug ang ubang mga lider sa Simbahan nakombinser nga ang lokal, estado, ug nasyonal nga pangagamhanan dili andam modepensa o dili makahimo sa pagprotekta sa katungod sa Simbahan isip relihiyoso nga minoriya. Usa ka importante nga katuyoan sa konseho mao ang paghimo og mga paagi nga makapanalipod sa “relihiyoso nga mga katungod ug pagsimba” sa mga Santos sa Ulahing mga Adlaw ug sa uban pa.³ Ang mga talaan sa konseho naglangkob og gamhanang mga panudlo gikan ni Joseph Smith mahitungod sa relihiyusong kagawasan. Siya mihisgut kabahin sa “kaimportante sa pagwagtang sa tanan natong kinaiya nga pagkapanatiko ug pagkamagahi ngadto sa relihiyusong mga sentimento sa tawo.”⁴

Atol sa tingpamulak sa 1844, ang konseho kanunay nga nagtigum aron sa paghimo og konstitusyon, pagpasiugda sa kampanya ni Joseph Smith alang sa pagka-presidente sa Estados Unidos niadtong 1844, ug pagpangita og potensyal nga mga dapit alang sa pagpundok diha sa Kasadpang Amerika. Human sa kamatayon ni Joseph Smith, ang konseho nagpundok pag-usab niadtong 1845 ug sa sayong bahin sa 1846 ubos sa direksyon ni Brigham Young sa paghimo og desisyon mahitungod sa pagdumala sa Nauvoo, sa pagtukod og diplomatiko nga mga relasyon uban sa mga American Indian, ug sa pag-andam alang sa pagbalhin sa mga Santos sa Ulahing mga Adlaw ngadto sa Kasadpan.

Sa Utah ang konseho magtigum panagsa gikan sa ulahing bahin sa 1840 hangtud sa mga 1860. Si John Taylor miorganisar pag-usab sa konseho niadtong 1880, apan ang mga panagtigum gihunong sa wala pa matapus ang maong dekada.⁵

May Kalabutan nga mga Hisgutanan: Departure from Nauvoo, Succession in Church Leadership