Relief Society

Ang Female Relief Society sa Nauvoo naorganisar niadtong Marso 1842.¹ Bisan og ang mga kalihokan sa Relief Society opisyal nga gihunong niadtong Marso 1845, ang sugo nga gihatag ni Joseph Smith sa mga kababayen-an sa paghupay sa kabus ug sa pagluwas sa mga kalag milahutay.² Bisan og walay pormal nga organisasyon, ang kababayen-an nga mga Santos sa Ulahing mga Adlaw mipadayon sa pagpundok aron sa pag-ampo, pagkanta, ug pagpamatuod ug aron sa pagpanalangin sa usa’g usa, sa ilang mga pamilya, sa mga masakiton, ug sa mga kabus.

Pag-establisar Pag-usab sa Relief Society

Niadtong 1854, ubos sa direksyon ni Brigham Young, ang kababayen-an nagsugod sa pag-organisar pag-usab sa lokal nga mga Relief Society.³ Ang kababayen-an mitabang sa ilang American Indian nga mga silingan, nangalagad ngadto sa kabus nga mga Santos, naghablon og karpet alang sa mga meetinghouse, ug mitabang sa pagsinina sa mga sakop sa militia nga nagpanalipod sa Teritoryo sa Utah. Dili mominos og 24 ka ward nga mga Relief Society ang naporma, apan ang pag-abut sa federal nga mga tropa niadtong 1857 hapit hingpit nga mitapos niini nga mga paningkamot.⁴

Pagka-1867 ang dakong gidaghanon sa nagkalisud nga langyaw nga mga Santos sa Utah ug ang panginahanglan sa usa ka makabarug sa kaugalingon nga ekonomiya ang nakapabalaka ni Brigham Young. Gitawag niya si Eliza R. Snow aron motabang sa mga bisop sa pag-establisar pag-usab sa lokal nga mga Relief Society. Isip sekretarya sa Nauvoo Relief Society, narekord ug napreserbar ni Snow ang mga tala sa miting niini ug gigamit kini isip usa ka batakang-balaod alang sa bag-ong mga society.

Handumanan nga bandera nga gihimo alang sa ika-50 ka tuig nga jubilee sa Simbahan.

Usa ka Sentral nga Organisasyon

Ang unang mga Relief Society sa Utah paspas nga midaghan—pagka-1869 sobra sa 100 ka mga branch na ang naglihok. Kini nga pagtubo nagkinahanglan og mas dakong koordinasyon, ug niadtong 1877 ang unang Relief Society sa stake nga lebel naorganisar sa Ogden, Utah, uban ni Jane Snyder Richards isip presidente. Naporma dayon ang mga Stake Relief Society sa tibuok Utah, ug tulo ka tuig ang milabay, ang Presidente sa Simbahan nga si John Taylor mihimo ni Eliza R. Snow isip presidente sa tanang mga Relief Society. Gi-organisar ni Snow ang usa ka sentral nga komite nga kadugayan nailhan isip ang Relief Society general board. Sulod sa usa ka dekada, ang gidaghanon sa mga sakop sa Relief Society mitubo ngadto sa hapit 17,000 latas sa Estados Unidos, Canada, England, Scotland, Germany, Switzerland, Norway, Sweden, Denmark, ang mga Isla sa Pasipiko, Australia ug New Zealand.⁵

kababayen-an nga nagtrabaho — Kababayen-an nga nagtrabaho og mga sida.

Ang mga sakop sa Relief Society sa ika-19 nga siglo miapil sa daghang mga proyekto, lakip na ang pagtipig og lugas, paggama og sida, mga tindahan sa kooperatiba, medikal nga pag-atiman, ug katungod sa kababayen-an sa pagboto.⁶ Nakahibalo usab ang mga lider sa mga panginahanglan sa kabatan-onan ug kabataan ug mitabang sa pag-organisar sa Mutual Improvement Associations ug sa Primary.⁷ Ang kababayen-an sa Relief Society mabination nga nanalipod sa kagawasan sa relihiyon atubangan sa nagtubo nga pagpamugos sa gobyerno nga biyaan ang dinaghan nga kaminyoon. Ang unang Kinatibuk-ang mga Presidente sa Relief Society sa Utah nagserbisyo isip mga matron sa templo.

Pagsagubang sa mga Hagit sa ika-20 nga Siglo

Sa ika-20 nga siglo ang Relief Society mipahiangay ngadto sa usa ka siyentipiko ug siyudadnong moderno nga kalibutan. Ang mga programa sa Relief Society mitutok sa pagpalambo sa komunidad. Atol sa kapangulohan ni Bathsheba W. Smith, ang Relief Society mipasiugda og mga klase sa home economics ug nursing ug mipadagan og usa ka buhatan sa pagpanarbaho alang sa mga batan-ong babaye.⁸ Ang mga lider sa Relief Society mitanyag sa ilang natipigan nga lugas aron itabang sa mga American Indian sa Utah, sa mga biktima sa 1907 nga kagutom sa China, ug sa mga naluwas sa 1906 nga linog sa San Francisco.⁹ Niadtong 1915, ubos sa direksyon ni Emmeline B. Wells, ang Woman’s Exponent nga mantalaan gipulihan sa Relief Society Magazine, usa ka mas modernong peryodiko nga naay kurikulum, mga report gikan sa lokal nga mga yunit, ug tambag sa pagdumala sa panimalay.¹⁰ Niadtong mga 1920 ang miyembro sa general board nga si Amy Brown Lyman nangulo sa mga paningkamot sa paggamit sa mga modernong pamaagi sa social work diha sa mga programa sa Relief Society ug midumala sa maternity [pagkainahan] ug child-welfare [kaayohan sa anak] nga mga kurso.

Sa samang higayon, ang Relief Society nag-atubang sa komplikado nga tahas sa pagpahiangay sa nagkausab nga organisasyon sa Simbahan. Ubos ni Bathsheba Smith, ang mga igsoong babaye sa Relief Society milikom og pundo alang sa usa ka gambalay sa kababayen-an diha sa Temple Square—apan ang mga opisina sa kinatibuk-ang Relief Society gibalhin hinoon didto sa Bishop’s Building.¹¹ Ang mga lawak-tigumanan sa Relief Society sa Ward napulihan og usa ka kwarto sulod sa lokal nga mga meetinghouse.¹² Ang dugay’ng nagdagan nga programa sa pagtipig og lugas sa Relief Society natapos niadtong 1918 sa dihang gibaligya sa mga lider sa Simbahan ang lugas ngadto sa gobyerno sa Estados Unidos aron sa pagtabang sa paningkamot sa Unang Gubat sa Kalibutan.¹³ Sugod niadtong 1936 ang mga sakop sa Relief Society adunay mahinungdanon nga bahin sa bag-ong Church Security Plan, nadugay nailhan nga welfare plan.¹⁴

Ang Reliefy Society human sa Ikaduhang Gubat sa Kalibutan

Niadtong mga 1950, ubos sa direksyon sa Presidente sa Kinatibuk-ang Relief Society nga si Belle S. Spafford ug sa Presidente sa Simbahan nga si David O. McKay, ang mga igsoong babaye sa Relief Society milikom pag-usab og mga pundo alang sa usa ka gambalay sa Temple Square, nga gipahinungod niadtong 1956.¹⁵ Ang buluhaton sa Relief Society nagpadayon nga nagkausab isip usa ka tibuok Simbahan nga kalabutang paningkamot nga nagdala sa daghang mga paningkamot sa Relief Society ubos sa direksyon sa lokal ug kinatibuk-ang mga lider sa pagkapari. Pagka-1970 ang responsibilidad sa paglikom og pundo, mga magasin, ug welfare gibalhin na ngadto sa mga komite ug mga departamento sa Simbahan. Sugod niadtong 1971 ang tanang kababayen-an nga mga Santos sa Ulahing mga Adlaw nga nag-edad og 18 ug pataas awtomatik nga nalista isip mga sakop sa Relief Society. Ang gikinahanglan nga pagbayad sa pagpasakop gihunong.¹⁶

Atol niadtong mga 1970 ang Kinatibuk-ang Presidente sa Relief Society nga si Barbara B. Smith mihatag og gibug-aton sa mga tahas sa panimalay ug sa pamilya ug namulong sa gisugyot nga Equal Rights Amendment [Kausaban sa Managsama nga Katungod] samtang gilantugian kini sa Estados Unidos; ang sunod nga Kinatibuk-ang Presidente, si Barbara Winder, miawhag og paghiusa human sa usa ka dekada nga nagkadaghang pagkabahin-bahin.¹⁷ Niadtong mga 1990 ang Kinatibuk-ang Presidente nga si Elaine L. Jack migahin og panahon sa pagtimbang-timbang sa mga panginahanglan sa mga igsoong babaye sa tibuok kalibutan ug misugod og usa ka bag-ong programa sa literacy.¹⁸

Giila sa tibuok kalibutan ang Relief Society alang sa mga paningkamot niini sa paghugpong sa kababayen-an sa espirituhanong pagpangalagad, pagserbisyo sa pamilya ug komunidad, ekonomikanhong pagbarug sa kaugalingon, ug sa humanitarian ug refugee nga mga serbisyo. Ang Relief Society nagpadayon usab sa pagtampo og importante nga tingog sa mga konseho sa Simbahan: sama nga ang lokal nga mga lider sa Relief Society nagserbisyo diha sa ilang ward ug branch nga mga konseho, ang Kinatibuk-ang Opisyales sa Relief Society nagsugod niadtong 2016 sa pagserbisyo sa Priesthood ug Family Executive Council, sa Missionary Executive Council, ug sa Temple ug Family History Executive Council.

duha ka babaye nga nagginaksanay — Ang mga igsoong babaye sa Relief Society mitabang og koordinar sa mga paningkamot sa paghupay human sa usa ka dako nga linog sa Chile.

May Kalabutan nga mga Hisgutanan: Female Relief Society of Nauvoo, Eliza R. Snow, Zina D. H. Jacobs Young, Emmeline B. Wells, Primary, Young Women Organizations.