“Mga Organisasyon sa Batan-ong mga Lalaki,” Mga Hisgutanan sa Kasaysayan sa Simbahan
“Mga Organisasyon sa Batan-ong mga Lalaki”
Mga Organisasyon sa Batan-ong mga Lalaki
Atol sa usa ka panagtigum sa mga batan-ong mga tawo sa Nauvoo, Illinois, kaniadtong 1843, mitanyag si Elder Heber C. Kimball nga magporma sila og usa ka grupo alang sa espiritwal nga panudlo. Mirekomendar og dugang si Joseph Smith nga sila mag-organisar ngadto sa “usa ka kapunongan alang sa kahupayan sa mga kabus.” Gisunod sa grupo ang tambag ni Joseph ug gilunsad ang Relief Society sa Batan-ong mga Lalaki ug mga Babaye sa Nauvoo alang sa dili minyo nga batan-ong mga lalaki ug mga babaye ubos sa 30 anyos ang edad.1 Kini nga kapunongan hinoon, wala magdugay, tungod sa kamatayon ni Joseph Smith sa 1844 ug sa pagbiya gikan sa Nauvoo sa 1846 nga nakapalinga sa atensyon sa mga Santos.
Human sa hapit usa ka dekada didto sa Siyudad sa Salt Lake, mitawag si Heber C. Kimball sa tanan nga batan-ong mga lalaki sa duol nga mga pamuy-anan sa pagpundok alang sa usa ka espesyal nga mga miting sa pagpamatuod. Ang ubang independente nga mga grupo mitunga uban sa samang mga katuyoan sa pakighinigalaay, pakigdebate, pag-abi-abi, ug sa pag-andam sa batan-ong mga lalaki alang sa pagkapari nga serbisyo ug mga misyon. Sa mga 1870, daghang mga ward ang miabaga og susamang mga grupo nga, sama sa mga kapunongan sa batan-ong mga babaye sa pagdaginot, naningkamot sa pagpalambo sa “kauswagan”sa kabatan-onan sa Simbahan.2 Sa 1875 misugo si Brigham Young ni Junius F. Wells sa pag-organisar ug pagdumala sa unsay nailhan nga Young Men’s Mutual Improvement Association (YMMIA). “Gusto nato nga ang atong batan-ong mga lalaki magpasakop ug ma-organisar sa tibuok Simbahan,” mitudlo si Young ni Wells, “aron kita makagiya kanila sa bisan unsa nga panahon alang sa bisan unsa nga serbisyo nga mahimong gikinahanglan.”3 Ang mao nga organisasyon ilabi na nga gikinahanglan sa usa ka panahon nga kadaghanan sa batan-ong mga lalaki wala ma-orden ngadto sa mga katungdanan sa Aaronic nga Pagkapari. Gitataw ni Wells ug sa ubang mga pangulo ang moral nga kauswagan ug pagtabang sa usag usa sa pakigbatok sa katilingbanong mga bisyo ug katapulan pinaagi sa pagkat-on sa kamatuoran sa ebanghelyo ug sa pag-apil sa mga katilingbanong mga kalihokan.
Sugod sa 1877, ang mga pangulo sa Simbahan miawhag sa mga bishop sa pag-orden sa kadaghanan sa batan-ong mga lalaki diha sa Simbahan ngadto sa mga katungdanan sa Aaronic nga Pagkapari. Hinoon, tungod kay ang mga korum sa Aaronic nga Pagkapari sa karaan giapilan sa hingkod nga mga lalaki kinsa nag-una sa pagtuman sa mga buluhaton sa pagkapari, kadaghanan sa batan-ong mga lalaki mipabilin nga walay apil sa ilang mga korum. Ang mga pangulo sa Simbahan nabalaka nga ang mga Sunday School ug ang YMMIA “naghimo sa buluhaton nga kinahanglan buhaton sa mga korum.” Sa 1908 ang Unang Kapangulohan mitudlo og usa ka komitiba sa paglig-on sa buluhaton sa mga korum sa pagkapari. Mirekomendar ang komitiba og daghan nga mga kausaban, lakip ang paghimo og usa ka pagpauswag gikan sa katungdanan ngadto sa katungdanan sa gitakda nga mga edad ug sa pagdesinyo og kurikulum nga angay sa matag pundok sa edad. Ang YMMIA, sa samang panahon, mipadayon sa paglihok sa linain nga paagi.4
Sa 1913 ang YMMIA nakakuha og nasudnong katungod gikan sa mga Boy Scout sa America. Kini nga pakig-uban sa mga Scout miaghat sa mga pangulo sa YMMIA sa pagbuhat og mga programa sa Mutual pinaagi sa grupo sa edad: mga batang lalaki 12 ngadto sa 16 ginganlan og mga junior (o mga MIA Scout), mga lalaki 17 ngadto sa 21 mga senior (usahay gitawag og M Men), ug kadtong mga 22 ug mas magulang pa nga mas nauna nga mga senior. Kining mga pagbahin sa edad milambo sa hinay-hinay ug sa wala madugay gilinya sa mga edad sa pagpauswag sa Aaronic nga Pagkapari, ang mga ngalan sa grupo nga naghatag og dalan ngadto sa mga katungdanan sa pagkapari. Ang mga sakop sa YMMIA miapil pag-ayo sa daghang mga kalihokan pinaagi sa Scouting. Miapil usab sila sa tinuig nga mga komperensya ug ubang mga kalihokan sa Young Women’s Mutual Improvement Association.
Sa 1931, nanghinaut nga motubo ang tibuok nga pag-apil sa batan-ong mga lalaki sa Simbahan, gi-anunsyo sa Kinatibuk-ang mga Kadagkoan ang Aaronic Priesthood Correlation Plan aron sa paglig-on sa pagtakdo tali sa mga korum, sa YMMIA, mga Boy Scout, ug mga seminary. Kini mao ang sinugdanan sa usa ka malungtarong paningkamot sa paglangkob sa mga programa sa batan-ong mga lalaki sa Simbahan ug sa pagsumpay niini ngadto sa pagkapari.5
Sa mga 1970, ang mga Presidente nga si Harold B. Lee ug Spencer W. Kimball mipaila og mga serye sa mga pahiangay aron sa paghapsay sa programa sa batan-ong mga lalaki sa Simbahan ug sa pagdala kanila “ubos sa paggiya sa pagkapari.”6 Ang mga calling nga general board, mga stake board sa YMMIA, ug ward superintendent sa YMMIA, gihunong, ug ang programa alang sa batan-ong mga lalaki lapas sa edad nga 18 gibulag gikan sa programa alang sa batan-ong mga lalaki. Sa makadiyot, ang Tigdumalang Bishopric midumala sa bag-ong ginganlang Aaronic Priesthood MIA, nga naglakip sa mga programa alang sa batan-ong mga lalaki ug batan-ong mga babaye. Sa 1974 ang ngalan nga Mutual Improvement Association gihunong, ug sa 1977 ang mga programa gihiusa ug giilisan og ngalan nga Young Men ug Young Women, ug ang mga Kinatibuk-ang Kapangulohan ug mga general board gitukod pag-usab.
Sulod sa daghang mga katuigan gipabilin sa Simbahan ang katungod niini uban sa mga Boy Scout sa America diha sa Estados Unidos ug mitanyag og mga kapilian sa ubang mga nasud. Sa 2018 mianunsyo ang Simbahan sa pagbiya gikan sa Scouting ug sa pagpatuman og usa ka bag-ong programa sa kabatan-onan sugod sa 2020.7
Kalabutang mga Hisgutanan: Pagdaginot; Mga Organisasyon sa Batan-ong mga Babaye [Young Women Organizations]; Adjustments to Priesthood Organization [Mga Kausaban sa Organisasyon sa Pagkapari]