“Pagdagsa sa Nangita og Bulawan sa California,” Mga Hisgutanan sa Kasaysayan sa Simbahan
“Pagdagsa sa Nangita og Bulawan sa California”
Pagdagsa sa Nangita og Bulawan sa California
Usa ka grupo sa mga beterano sa Mormon Battalion kinsa naningkamot sa paghiusa sa mga Santos sa Ulahing mga Adlaw didto sa Utah nakadawat og sugo gikan ni Brigham Young nga magpabilin sa California sulod sa mubong panahon tungod sa kakulang sa mga probisyon didto sa Walog sa Salt Lake. Kini nga mga beterano nakakita og trabaho ang pagtukod og larasan [sawmill] alang ni John Sutter sa habagatang kinasang-an sa American River sa Coloma.1
Hulagway sa pagkadiskobre sa bulawan sa Sutter’s Mill pinaagi sa artist nga si Valoy Eaton.
Usa ka buntag niadtong Enero 1848, ang kauban ni Sutter, si James Marshall, nagsusi sa konstruksyon sa usa ka agianan sa dihang nakakita siya og mga tipik diha sa agianan sa larasan. Gikolekta niya ang mga tipik nga gibutang sa iyang kalo ug mipakita niini ngadto sa ubang mga trabahante. Ang grupo misulay sa pagpaak sa usa sa mga sampol, midugmok niini gamit ang martilyo, ug giitsa ngadto sa kalayo. Ang matag pagtesting nagpakita nga sila nakakita og bulawan.2
Usa sa mga beterano sa batalyon, si Henry Bigler, mirekord sa pagkadiskobre sa bulawan diha sa iyang journal. Nangita usab siya sa ubos sa sapa alang sa dugang nga bulawan, ug sulod sa pipila ka adlaw nakakuha siya og mas labaw pa kay sa sweldo sa usa ka bulan. Si Bigler mipakigbahin sa mga balita sa ubang mga Santos sa Ulahing mga Adlaw, ug daling mikatap ang balita duol sa larasan ug sa palibut sa San Francisco. Sa wala madugay daghang tawo ang mianha sa lugar sa may American River aron mangita og bulawan. Ang mga Santos nagkampo sa minahan duol sa Sacramento, ang unang dako-dako nga kampo sa iyang matang sa Sierras, nga gitawag og “Mormon Island.”
Daghang mga beterano sa batalyon mibiya padulong sa Walog sa Salt Lake atol sa ting-init niadtong 1848, apan ang uban nakahukom nga magpabilin sa California. Si Samuel Brannan, usa ka Santos sa Ulahing mga Adlaw og tigpamuhunan, mipahimulos sa oportunidad sa pagkadiskobre sa bulawan sa pagpalapad sa iyang gamay nga negosyo, midala sa mga sampol sa bulawan ngadto sa San Francisco ug nagsinggit-singgit diha sa dakong mga dalan, “Bulawan! Bulawan! Bulawan, gikan sa American River!” Sulod nianang semanaha, ang kadaghanan sa mga residente sa San Francisco miadto sa minahan sa bulawan, ug si Brannan nag-abli og bugtong tindahan sa American River ug sa siyudad.3
Midagdagsa pag-ayo ang mga tawo nga nangita og bulawan sa misunod nga tuig, human ang presidente sa Estados Unidos nga si James K. Polk naghisgot sa bulawan sa California sa iyang tinuig nga mensahe niadtong Disyembre 1848. Liboan ka tigsuhid miadto sa dapit nga adunay bulawan sa California. Daghan ang mipili nga moagi sa malisud nga mga rota libut sa South America, tabok sa Panama, o agi sa Mexico samtang ang labaw sa katunga sa mga tigsuhid milatas sa kayutaan tabok sa kontinente sa Amihanang Amerika. Ang mga Santos sa Ulahing mga Adlaw sa Walog sa Salt Lake duol ra kaayo sa minahan sa bulawan kay sa ubang mga Amerikano ug nakadawat og mga balita sa bulawan pipila pa ka bulan sa wala pa ang mensahe ni Polk.
Bisan pa sa tintasyon sa bulawan sa California ug kakulang sa pagkaon sa Walog sa Salt Lake, kadaghanan sa mga Santos mipatalinghug sa tambag ni Brigham Young sa pagtukod sa Zion diha sa Utah ug sa palibut niini kay sa mangita og personal nga bahandi didto sa minahan sa bulawan. Ang mga lider sa Simbahan misaad sa mga miyembro nga ang ilang sitwasyon molambo.4 Bisan og ang kadaghanan sa 49ers—mao kadtong mga Amerikano nga miadto sa California niadtong 1849—wala moagi sa Walog sa Salt Lake sa ilang pag-adto sa kasadpan, pero daghan usab ang miagi. Sila sa kasagaran miabut sa walog nga gustong mopalit og preskong pagkaon ug gibaligya ang bisan unsa nga sobra nga mga suplay nga karga sa ilang mga karomata. Ang bag-ong mga komunidad sa mga Santos sa Ulahing mga Adlaw sa rehiyon sa ingon nakasinati og wala damha nga ekonomikanhong kauswagan gikan sa pagbinayloay uban sa mga 49ers. Sa wala pa mahurot ang tipik sa bulawan, si Young mipadala og pipila ka tawo sa usa ka tuig nga “Misyon sa Bulawan,” ang kinitaan niini gitumong aron makabenepisyo ang Simbahan. Human sa malisud nga trabaho ug gamay ra ang nakuha, ang mga misyonaryo sa bulawan mibiya sa minahan aron mopauli o ngadto sa ubang misyon.5
Ang pagdagsa sa nangita og bulawan misangpot ngadto sa dakong kausaban sa sosyal ug ekonomikanhong mga kausaban sa Estados Unidos ug nakahimo sa California nga sentro sa komersyo sa tibuok kalibutan. Ang dinaghan nga paglalin padulong sa kasadpan naingganyo tungod sa bulawan nga nakapahunong usab sa sayop nga pagtuo nga ang mga Santos magpabilin nga hingpit nga mabulag gikan sa uban nga nasud.
May Kalabutan nga mga Hisgutanan: Mormon Battalion, Samuel Brannan, Pioneer Economy